Vakatakila e Vola o Joni 17:1-18

  • Lewai o “Papiloni na Ka Levu” (1-18)

    • Vodo tiko na saqamua levu ena manumanu kulakula (1-3)

    • Manumanu e “bula e liu, a sega tale, sa vakarau cabe mai na qara e sega ni vakabotona” (8)

    • Tini na ileu me vala kei na Lami (12-14)

    • Tini na ileu e cata na saqamua (16, 17)

17  E qai lako mai vei au e dua vei ratou na vitu na agilosi eratou taura tiko na vitu na boulu,+ e kaya: “Mai, au na vakaraitaka vei iko na nona lewai na saqamua levu e dabe toka ena wai levu,+  era veiyacovi tawadodonu*+ kei koya na tui kei vuravura, era qai mateni na tiko e vuravura ena waini ni nona veiyacovi tawadodonu.”*+  E qai kauti au o koya ena kaukaua ni yalo tabu ina dua na vanua talasiga. Au raica sara e dua na yalewa e vodo tiko ena dua na manumanu kila kulakula, e robota tu na manumanu na yaca e vosabeci kina na Kalou, e vitu na uluna qai tini na kena ileu.  E tokara tiko na yalewa qo na isulu lokaloka+ kei na isulu kulakula, e uku ena koula, na vatutalei, kei na mataniciva,+ e taura tiko e dua na bilo koula e sinai ena veika vakasisila kei na veika dukadukali ni nona veiyacovi tawadodonu.*  E volai e yadrena e dua na yaca, e yaca vuni: “O Papiloni na Ka Levu, na tinadra na saqamua+ kei na ka vakasisila kece e vuravura.”+  Au qai raica ni mateni na yalewa qo ena nodra dra na yalosavasava kei na nodra dra na ivakadinadina i Jisu.+ Ia niu raici koya, dua na ka na noqu kidroa.  E mani kaya vei au na agilosi: “Na cava o kidroataka? Au na tukuna vei iko na ka vuni me baleta na yalewa+ kei na manumanu kila e vodoka tiko, e vitu na uluna qai tini na kena ileu:+  Na manumanu kila o raica ni bula e liu, a sega tale, sa vakarau cabe mai na qara e sega ni vakabotona,+ oti ena qai vakarusai. Ia o ira na tiko e vuravura—o ira e sega sara ga ni volai na yacadra ena ivola ni bula+ mai na ivakatekivu kei vuravura—era na kidroa nira raica na manumanu kila a bula e liu, sa sega tale, ena qai tiko tale.  “Qo e vinakati kina na vakasama vuku: Na vitu na ulu+ e vakaibalebaletaka e vitu na ulunivanua, e dabe toka e delana na yalewa. 10  E vitu na tui: E lima sa bale, e dua e tiko qo, e dua tale e se bera mai, ia ni yaco mai, ena tiko ga vakalekaleka. 11  Na manumanu kila a bula e liu ia sa sega tale,+ o koya qo na ikawalu ni tui, e basika mai vei ratou na vitu, ena qai vakarusai. 12  “Na tini na ileu o raica e vakaibalebaletaka e tini na tui, se sega ni dua na nodratou matanitu, ia eratou lewa vakatui kei na manumanu kila me dua na aua. 13  Eratou lomavata kece, eratou mani solia na nodratou kaukaua kei na lewa vua na manumanu kila. 14  Eratou na vala kei na Lami,+ ia ni nodra Turaga na turaga qai nodra Tui na tui,+ ena vakamalumalumutaki ratou na Lami.+ Era na qaqa tale ga vata kei koya o ira na kacivi, era digitaki, ra qai yalodina.”+ 15  E kaya vei au: “Na wai o raica ni dabe toka kina na saqamua e vakaibalebaletaki ira na tamata, na ilala levu, na veimatanitu, kei na duivosavosa.+ 16  Na tini na ileu+ o raica kei na manumanu kila,+ era na cata na saqamua,+ era na ravuti koya, era na vakaluvawaletaki koya, era na kania na lewena, ra qai vakamai koya vakadua ena bukawaqa.+ 17  Ni uqeta na lomadra na Kalou mera cakava na nona inaki,+ oya mera lomavata ena nodra solia vua na manumanu kila na nodra matanitu,+ me vakayacori mada na vosa ni Kalou. 18  Ia na yalewa+ o raica e vakaibalebaletaka na koro levu e nodra ranadi na tui kei vuravura.”

iVakamacala e ra

Kirisi, por·neiʹa. Raica na iVakamacala ni Vosa.
Kirisi, por·neiʹa. Raica na iVakamacala ni Vosa.
Kirisi, por·neiʹa. Raica na iVakamacala ni Vosa.