Vakarua 30:1-20
30 “Ni sa yacovi iko na vosa kece qo, na vosa ni veivakalougatataki kei na vosa ni veicudruvi au sa biuta e matamu,+ o qai vakasamataka lesu*+ na veimatanitu kece e vakavuna o Jiova na nomu Kalou mo talabusese+ kina,
2 o mani lesu vei Jiova na nomu Kalou,+ qai vakarorogo ina domona me vaka na ka kece au vakaroti iko tiko kina nikua, o iko kei ira na luvemu, ena lomamu taucoko kei na nomu vinaka taucoko,*+
3 ena qai vakalesui ira mai na nomu era vesu tu+ o Jiova na nomu Kalou, ena yalololoma vei iko,+ qai kumuni iko tale o Jiova na nomu Kalou mai na veimatatamata a vakavuna o koya moni talabusese kina.+
4 Ke ra veiseyaki mada ga na nomu tamata ina iyalayala kei lomalagi, ena kumuni iko mai kea o Jiova na nomu Kalou qai kauti iko lesu mai.+
5 Ena kauti iko o Jiova na nomu Kalou ina vanua era taukena na tamamu, o na qai taukena, ena vakavutuniyautaki iko o koya qai vakaikuritaki iko mo le levu sara vei ira na tamamu.+
6 Ena vakasavasavataka* na lomamu kei na lomadra na nomu kawa+ o Jiova na nomu Kalou, mo lomani Jiova kina na nomu Kalou ena lomamu taucoko kei na nomu vinaka taucoko,* mo bula kina.+
7 Ena qai tauca na vosa ni veicudruvi kece qo o Jiova na nomu Kalou vei ira na kemu meca, era dau cati iko ra qai vakacacani iko.+
8 “O na qai lesu mai mo rogoca na domo i Jiova qai muria na nona ivakaro kece au vakarota tiko vei iko nikua.
9 Ena vakavutuniyautaki iko sara vakalevu o Jiova na nomu Kalou ena cakacaka kece ni ligamu,+ ena vakalevutaki na luvemu, na nomu manumanu, kei na vua ni nomu qele, ni na marautaka tale o Jiova me vakavutuniyautaki iko, me vaka ga nona marautaki ira na nomu qase.+
10 Ni o na qai rogoca na domo i Jiova na nomu Kalou, o na muria tale ga na nona ivakaro kei na nona Lawa e volai ena ivola ni lawa qo, o na qai lesu vei Jiova na nomu Kalou ena lomamu taucoko kei na nomu vinaka taucoko.*+
11 “E sega ni dredre sara na ivakaro qo au vakarota tiko vei iko nikua, se mo sega ni yacova rawa.*+
12 E sega ni tiko mai lomalagi, mo kaya kina, ‘O cei ena cabe i lomalagi me kauta mai vei keda, meda rawa ni rogoca kina qai muria?’+
13 Se tiko ena tai adua ni wasawasa, mo kaya, ‘O cei ena takoso ina tai adua ni wasawasa me kauta mai vei keda, meda rogoca kina qai muria?’
14 Ni voleka ga vei iko na vosa, ena gusumu kei na lomamu,+ mo rawa ni cakava.+
15 “Raica, au sa biuta e matamu nikua na bula kei na ka vinaka, na mate kei na ka ca.+
16 Ke o vakarorogo ena ivakaro i Jiova na nomu Kalou au vakarota tiko vei iko nikua, ni o lomani Jiova na nomu Kalou,+ o muria nona sala, o dei ena nona ivakaro, nona lawa, kei na nona lewa, o na bula+ qai vakalewevuqataki, ena qai vakalougatataki iko o Jiova na nomu Kalou ena vanua o na lai taukena.+
17 “Ia ke gole tani na lomamu,+ o sega ni vakarorogo qai temaki mo cuva vei ira na kalou tani qai qaravi ira,+
18 au tukuna vei kemuni nikua ni oni na vakarusai sara ga.+ Oni na sega ni bula dede ena vanua oni takosova tiko kina na Joritani moni lai taukena.
19 Me ivakadinadina nikua vei kemuni na lomalagi kei na vuravura, niu sa biuta e matamu na bula kei na mate, na veivakalougatataki kei na veicudruvi,+ mo qai digia na bula mo rawa ni bula,+ o iko kei ira na nomu kawa,+
20 ni o lomani Jiova na nomu Kalou,+ ni o rogoca na domona, o kabiti koya+ tale ga, ni o koya ga e nomu bula, ena vukuna tale ga ena dede kina nomu tiko ena vanua a bubuluitaka o Jiova me solia vei ratou na nomu qase, o Eparama, Aisake kei Jekope.”+
iVakamacala e ra
^ Ipe., “kauta lesu i utomu.”
^ Ipe., “ena nomu ne’phesh taucoko.” Raica na iVakamacala ni Vosa.
^ Ipe., “ciliva.”
^ Ipe., “ena nomu ne’phesh taucoko.” Raica na iVakamacala ni Vosa.
^ Ipe., “ena nomu ne’phesh taucoko.” Raica na iVakamacala ni Vosa.
^ Ipe., “sega ni yawa.”
