Taniela 9:1-27
9 Ena imatai ni yabaki nei Taraiasi+ na luvei Esuerosi, na kawa ni kai Mitia e buli me tui ena nodra matanitu na Kalitia,+
2 ena imatai ni yabaki ni nona veiliutaki, o yau o Taniela au kila ena ivola* na iwiliwili ni yabaki e tukuna o Jiova vei Jeremaia na parofita ni na lala tu o Jerusalemi+ me 70 na yabaki.+
3 Au mani rai vei Jiova na Kalou dina meu vakamasuti koya salavata kei na lolo+ kei na isulutaga kei na dravusa.
4 Au masu vei Jiova na noqu Kalou, au vakatutusa au kaya:
“Isa Jiova na Kalou dina, o kemuni ga oni cecere oni vakatubuqoroqoro, e dei na nomuni veiyalayalati, oni vakaraitaka na dei ni loloma+ vei ira era lomani kemuni kei ira na muria na nomuni ivakaro,+
5 keimami valavala ca, keimami cala, e ca na neimami ivakarau, keimami talaidredre,+ keimami gole tani mai na nomuni ivakaro kei na nomuni lewa.
6 Keimami sega ni vakarorogo vei ira na nomuni italai na parofita+ era vosa ena yacamuni vei ira na neimami tui, vei ira na neimami turaga, vei ira na tukai keimami, kei ira na lewe kece ni veivanua.
7 O kemuni ga Jiova oni yalododonu, ia keimami madua* ena siga qo, o keimami na lewe i Juta, o ira na lewe i Jerusalemi, kei ira kece na Isireli, o ira na tiko voleka kei ira na tiko vakayawa, ena vanua kece oni vakatalai ira kina nira sega ni yalodina vei kemuni.+
8 “Kemuni Jiova, keimami sa madua,* o ira na neimami tui, na neimami turaga, kei ira na tukai keimami ni keimami valavala ca vei kemuni.
9 Oni dauyalovinaka, oni dauveivosoti+ Jiova na neimami Kalou ni keimami talaidredre vei kemuni.+
10 Keimami sega ni vakarorogo ina domomuni Jiova na neimami Kalou me keimami muria na nomuni lawa oni vakarautaka vei keimami ena gusudra na nomuni dauveiqaravi na parofita.+
11 Era beca kece na Isireli na nomuni Lawa, era gole tani nira sega ni muria na domomuni, oni qai sova vei keimami na cudru kei na vosa ni bubului e volai ena Lawa e vola o Mosese na dauveiqaravi ni Kalou dina,+ ni keimami sa valavala ca vei kemuni.
12 Oni vakayacora na ka ca oni tukuna me baleti keimami+ kei ira na neimami turaga era lewai keimami,* ni oni kauta mai vei keimami na leqa levu, se sega vakadua ni yaco e ruku i lomalagi taucoko na leqa levu e tarai Jerusalemi.+
13 Me vaka e volai ena Lawa e vola o Mosese, e tarai keimami na leqa kece qo,+ ia keimami sega ni kerea na loloma* i Jiova na neimami Kalou me keimami biuta na neimami cala,+ me keimami vakaraitaka ni keimami kila na nomuni dina.*
14 “Ia qo kemuni Jiova moni yadra, moni vakayacora vei keimami na ca, ni dodonu na ka kece oni vakayacora Jiova na neimami Kalou, ia keimami sega ni muria na domomuni.+
15 “Kemuni Jiova na neimami Kalou oni kauti ira mai na nomuni tamata ena vanua o Ijipita ena ligamuni kaukaua,+ oni vakarogoya na yacamuni me yacova mai na siga qo,+ ia keimami valavala ca qai ca na neimami ivakarau.
16 Kemuni Jiova, me vaka na nomuni cakacaka dodonu kece,+ au kerea me ruru mada ga na nomuni cudru levu ena nomuni koro o Jerusalemi, na nomuni ulunivanua tabu, ena vuku ni neimami ivalavala ca kei na nodra cala na tukai keimami era vosabeci Jerusalemi kina kei ira na nomuni tamata o ira na tu volekati keimami.+
17 Moni rogoca mada kemuni na neimami Kalou na masu ni nomuni tamata kei na nona cikecike, ia ena vukumuni ga Jiova me serau na matamuni ena nomuni tikina tabu+ sa lala tu.+
18 Moni vakatudaliga na noqu Kalou moni rogoca! Moni dolava na matamuni moni raica na neimami vanua sa lala tu kei na koro e vakatokai ena yacamuni, keimami sega ni cikevi kemuni ena vuku ni neimami cakadodonu, ena vuku ga ni nomuni loloma levu.+
19 Moni rogoca mada kemuni Jiova. Moni vosoti+ keimami kemuni Jiova. Moni vakatudaliga kemuni Jiova moni yavala sara! Ena vukumuni ga moni kua ni bera na noqu Kalou, ni vakatokai ena yacamuni na nomuni koro kei ira na nomuni tamata.”+
20 Niu se vosa tiko, au masu meu vakatusa na noqu ivalavala ca kei na nodra ivalavala ca na kainoqu na Isireli, meu kerea na loloma i Jiova na noqu Kalou me baleta na ulunivanua tabu ni noqu Kalou,+
21 io niu se masu tiko ga sa lako mai vei au na tamata o Keperieli+ au raivotutaka e liu,+ niu oca sara tu ga donuya na gauna me cabori kina na isoro ena yakavi.
22 E vakamacalataka vei au meu kila, e kaya:
“I Taniela, au lako mai qo meu vakavukui iko mo kila.
23 Ni tekivu na nomu cikecike, e tukuni vei au meu mai tukuna vei iko ni o dua o mareqeti vakalevu.*+ Ia mo vakasamataka na ka qo, mo kila na ibalebale ni raivotu.
24 “Sa loku e 70 na macawa* vei ira na kainomu kei na nomu koro tabu+ me yalani kina na cakacala, me vakaoti na ivalavala ca,+ me vosoti na cala,+ me vakayacori na ivalavala dodonu+ me tawamudu, me dregati na raivotu kei na parofisai*+ qai lumuti na Loqi Tabu Sara.
25 Mo kila, me matata vei iko ni na 7 na macawa, ena 62 tale ga na macawa+ mai na gauna e vakaroti kina me tara tale o Jerusalemi+ me yacova na Mesaia*+ na iLiuliu.+ Ena vakavoui ena tara tale o Jerusalemi me tiko kina na rara kei na ikeliniwai, ia ena gauna ni leqa.
26 “Ni oti na 62 na macawa ena muduki*+ na Mesaia qai sega na ka e vo vua.+
“Ena lako mai e dua na iliuliu kei ira na nona tamata me vakarusa na koro kei na vanua tabu.+ Ena vakaoti koya na waluvu. Ena yaco tiko na ivalu me yacova na iotioti, e lewai me vakarusai.+
27 “Ena lewa o koya me toso tiko na veiyalayalati me baleti ira e lewe levu me dua na macawa, ena veimama ni macawa ena tinia o koya na vakacaboisoro kei na isolisoli.+
“Ena tiko na dauveivakarusai ena taba ni ka vakasisila,+ ena tau tale ga na lewa vei koya e vakalalai tu me rusa kina.”
iVakamacala e ra
^ Oya na ivolatabu.
^ Ipe., “matamadua.”
^ Ipe., “matamadua.”
^ Ipe., “na neimami turaganilewa era lewai keimami.”
^ Se “sega ni vakamamasu ena mata.”
^ Se “yalodina.”
^ Se “o taleitaki vakalevu, dokai vakalevu.”
^ Ipe., “parofita.”
^ Oya na “macawa ni veiyabaki.”
^ Se “na Lumuti.”
^ Se “vakamatei.”
