Taniela 4:1-37
4 “O Tui Nepukanesa, vei ira kece na lewe ni veivanua, na veimatatamata, kei na duivosavosa era tiko e vuravura taucoko: Me levu mada ga na nomuni vakacegu!
2 Au vinakata meu tukuna na ivakatakilakila kei na ka veivakurabuitaki e vakaraitaka vei au na Kalou Cecere Duadua.
3 E cecere na nona ivakatakilakila, e duatani na ka veivakurabuitaki e cakava! E sega ni mudu na nona matanitu kei na nona lewa ena veitabatamata.+
4 “O yau o Nepukanesa, au vakacegu tiko ena noqu vale, au tikovinaka ena noqu itikotiko vakatui.
5 Au tadra e dua na tadra e vakarerei au. Niu davo tiko ena noqu idavodavo e vakarerei au na ka au raitayaloyalotaka kei na ka au raivotutaka.+
6 Au vakarota sara mera kau mai vei au na tamata vuku kece ni Papiloni mera vakatakila vei au na ibalebale ni tadra.+
7 “Era lako mai ena gauna qori na bete daucakaiba, o ira na daurairai, o ira na Kalitia,* kei ira na dauraikalokalo.+ Niu tukuna vei ira na ka au tadra, era sega ni vakatakila rawa vei au na kena ibalebale.+
8 E muri sara mai o Taniela me tu e mataqu, na yacana tale ga o Pelitisasari+ me vaka na yaca ni noqu kalou,+ e tiko vua na yalodra na kalou yalosavasava,+ au mani tukuna vua na tadra:
9 “‘I Pelitisasari, na nodra iliuliu na bete daucakamana,+ au kila vinaka ni tiko vei iko na yalodra na kalou yalosavasava,+ e sega ni dua na ka vuni me dredre vei iko.+ Mo tukuna mada vei au na raivotu au tadra kei na kena ibalebale.
10 “‘Niu raivotu tiko ena noqu idavodavo, au raica ni tu e loma i vuravura e dua na vunikau,+ e balavu sara.+
11 E tubu na vunikau me kaukaua, e yaco i lomalagi na sovuna, e laurai ena iyalayala kei vuravura taucoko.
12 E rairai vinaka na drauna, e levu na vuana, e tu kina na kakana me kedra kece. Era vakaruru kina na manumanu ni vanua, era vakavale e tabana na manumanuvuka ni lomalagi, era kana kina na kabula kece.
13 “‘Niu se raivotu tiko ena noqu idavodavo au raica e dua na ivakatawa yalosavasava ni lako sobu mai lomalagi.+
14 E kacivaka o koya ena domolevu: “Moni taya na vunikau+ kei na tabana, moni kurea na drauna, moni qai veibiuyaka na vuana! Mera dro mai rukuna na manumanu, kei na manumanuvuka mai na tabana.
15 Ia me biu tu ga na vuna kei na wakana ena qele, me vesu wavoki ena wa kaukamea kei na kopa ena maliwa ni co ni vanua. Me suasua ena tegu ni lomalagi, me vakaivotavota kei ira na manumanu ena kau ni vanua.+
16 Me kau tani vua na yalo ni tamata me soli vua na yalo ni manumanu, me oti mada vua+ e vitu na gauna.+
17 Qo na ka era vakarogoya na ivakatawa+ kei na lewa era kacivaka na yalosavasava mera kila kina na bula tiko ni lewa na matanitu ni tamata o koya e Cecere Duadua,+ e solia vei koya e vinakata, e lesia tale ga vei koya e lailai sara vei ira na tamata.”
18 “‘Qo na tadra au raica, o yau o Tui Nepukanesa, mo tukuna na kena ibalebale Pelitisasari, nira sega ni vakatakila rawa vei au na kena ibalebale na vo ni tamata vuku ni noqu matanitu.+ Ia o iko ga o rawa ni tukuna, ni tiko vei iko na yalodra na kalou yalosavasava.’
19 “E kidroa ena gauna oya o Taniela, na yacana tale ga o Pelitisasari,+ e vakarerei koya na ka e vakasamataka.
“E kaya na tui, ‘Me kua ni vakarerei iko na tadra kei na kena ibalebale Pelitisasari.’
“E kaya o Pelitisasari, ‘Kemuni na noqu turaga, me yacovi ira mada ga na cati kemuni na tadra qo, kei na kena ibalebale vei ira na kemuni meca.
20 “‘Na vunikau oni raica, e tubu levu, e kaukaua, na vusona e yaco sara i lomalagi, e laurai e vuravura taucoko,+
21 e rairai vinaka na drauna, e levu na vuana, e tu kina na kakana me kedra kece, era vakaruru kina na manumanu ni vanua, era vakavale e tabana na manumanuvuka ni lomalagi,+
22 qori sara ga o kemuni na tui, oni tubu moni kaukaua, e tubu na nomuni lagilagi me yacovi lomalagi,+ kei na nomuni lewa e yacova na iyalayala kei vuravura.+
23 “‘Oni raica na tui ni lako sobu mai lomalagi e dua na ivakatawa yalosavasava,+ e kaya: “Moni taya na vunikau, moni vakarusa, ia moni biuta tu ga ena qele na vuna kei na wakana, me vesu wavoki ena wa kaukamea kei na kopa ena maliwa ni co ni vanua. Me vakasuasuataka na tegu ni lomalagi, me vakaivotavota kei ira na manumanu ni vanua me oti mada vua e vitu na gauna.”+
24 Qo na kena ibalebale kemuni na tui, ena tau vua na noqu turaga na tui na nona lewa o koya e Cecere Duadua.
25 Oni na cemuri tani mai vei ira na tamata, moni lai tiko kei ira na manumanu ni vanua, ena soli vei kemuni na co moni kania me vaka ga na bulumakau, oni na suasua ena tegu ni lomalagi+ me oti mada vei kemuni+ e vitu na gauna,+ moni kila kina ni lewa na matanitu ni tamata o koya e Cecere Duadua, e solia tale ga vei koya e vinakata.+
26 “‘Nira tukuna me biu tu ga na vuna kei na waka+ ni kau, ena nomuni tale na nomuni matanitu, ia moni kila mada ni veiliutaki tiko o lomalagi.
27 O koya gona kemuni na tui, moni rogoca mada na noqu ivakasala. Moni vakanadakuya na nomuni cala moni cakadodonu, kei na nomuni lewa ca moni lomani ira na dravudravua. De vakabalavutaki kina na nomuni tikovinaka.’”+
28 E yacovi Tui Nepukanesa na ka kece qo.
29 Oti e tinikarua na vula e veilakoyaki voli o koya ena dela ni valenitui e Papiloni.
30 E kaya na tui: “Qo o Papiloni na Ka Levu, au tara na kena valenitui ena noqu kaukaua levu me rogo kina na noqu lagilagi, se vakaevei?”
31 Ni se vosa tiko ga na tui, e rogo mai lomalagi e dua na domo: “E tukuni vei iko Tui Nepukanesa, ‘Sa kau tani vei iko na matanitu,+
32 o sa cemuri tani mai vei ira na tamata. Mo tiko kei ira na manumanu ni vanua, ena soli vei iko na co mo kania me vaka ga na bulumakau, me oti mada vei iko e vitu na gauna, mo kila kina ni lewa na matanitu ni tamata o koya e Cecere Duadua, e solia tale ga vei koya e vinakata.’”+
33 E vakayacori vei Nepukanesa ena gauna qori na vosa qo. E cemuri tani mai vei ira na tamata, e kana co sara me vaka na bulumakau, e suasua na yagona ena tegu ni lomalagi, e tubu na drauniuluna me vaka na vuti ni ikeli kei na nona itaukuku me vaka na iqaso ni manumanuvuka.+
34 “Ni cava na gauna qori,+ o yau o Nepukanesa au rai cake i lomalagi, au kilaiyaloqu tale, au vakavinavinakataki koya e Cecere Duadua, au vakacaucautaka, au vakalagilagi koya e bula tiko ni sega ni mudu na nona lewa kei na nona matanitu ena veitabatamata.+
35 E nanumi nira ka wale na lewe i vuravura kece, e vakayacora na ka e vinakata vei ira na mataivalu vakalomalagi kei ira na lewe i vuravura. E sega ni dua me tarovi koya,+ se kaya vua, ‘Na cava oni cakava?’+
36 “Au kilaiyaloqu tale ena gauna vata qori, e lesu mai vei au na lagilagi ni noqu matanitu, na kequ iserau, kei na kequ irogorogo.+ Era mai taro ivakasala tale vei au na noqu vakailesilesi liu, kei ira na noqu tamata vakaitutu, au vakataudeitaki tale ena noqu matanitu qai vakaikuritaki vei au na kequ irogorogo.
37 “O yau o Nepukanesa, au vakacaucautaka, au vakacerecerea, au vakalagilagia na Tui ni lomalagi+ ni dina na nona cakacaka kece, e dodonu na nona ivalavala,+ ni rawa tale ga ni vakamaduataki ira na dokadoka.”+
iVakamacala e ra
^ Qo na ilawalawa e kenadau ena rairai kei na raikalokalo.