Taniela 12:1-13
12 “Ena gauna oya ena tucake o Maikeli,*+ na turaga levu+ e totaki ira tiko na kainomu.* Ena yaco e dua na gauna ni rarawa se sega ni bau vakilai ena gauna e tauyavu kina na matanitu me yacova na gauna oya. Era na dro ena gauna oya na kainomu,+ o ira kece e laurai nira volai tu ena ivola.+
2 Era na yadra mai e levu era moce tu ena kuvuniqele, eso mera bula tawamudu, eso mera beci se cati tawamudu.
3 “Ia o ira na yalomatua era na serau me vaka na rarama ni maliwalala, kei ira na vukea e levu mera yalododonu era na vaka na kalokalo me tawamudu, io me tawamudu.
4 “O iko Taniela, mo tabonaka na vosa qo mo dregata na ivola me yacova na gauna ni icavacava.+ Era na veilakoyaki* e levu, ena vakalevutaki tale ga na kilaka dodonu.”+
5 O yau o Taniela, au rai yani au raica e rua tale ni rau duri tu e kea, e dua ena bati ni uciwai qo, e dua tale ena bati ni uciwai oya.+
6 E qai kaya yani e dua vei koya e vakaisulu lineni+ e toka e cake, e toka e ra na uciwai: “Ena vakacava na kena dede me qai cava kina na veika vakatubuqoroqoro qo?”
7 Au rogoci koya e vakaisulu lineni e toka e cake, e toka e ra na uciwai, ni laveta i lomalagi na ligana imatau kei na ligana imawi me vosa bubului ni cavuti koya e tawamudu na nona bula:+ “Sa lewai tu e dua na gauna, eso na gauna, kei na veimama ni gauna.* Ni musuki oti ga na nodra kaukaua na yalosavasava,+ sa na cava tale ga na ka kece qo.”
8 Ia niu rogoca au sega ni kila na kena ibalebale,+ au mani kaya: “Noqu turaga, ena tini vakacava na ka kece qo?”
9 E qai kaya o koya: “Mo lako Taniela ni sa tabonaki na vosa qo qai dregati me yacova na gauna ni icavacava.+
10 Levu era na vakasavasavataki ira, era na vakavulavulataki ira, era na vakatovolei.+ Era na caka ca na tamata ca, ena sega ni dua na tamata ca ena kila rawa, era na kila ga na yalomatua.+
11 “Mai na gauna e kau tani kina na isoro e cabori wasoma+ qai vakaduri na ka vakasisila e dauveivakarusai,+ ena 1,290 na siga.
12 “E marau o koya e wawa tiko ga me yacova yani na 1,335 na siga!
13 “Ia o iko mo lako tiko me yacova na icavacava. O na vakacegu ia o na tu ena nomu ivotavota* ena icavacava ni gauna.”+
iVakamacala e ra
^ Kena ibalebale “O Cei e Vaka na Kalou?”
^ Ipe., “luvedra na kainomu.”
^ Se “dikeva vinaka [oya na ivola].”
^ Oya e tolu veimama na gauna.
^ Se “ena vanua e votai vei iko.”
