Vei Taito 1:1-16
1 O yau o Paula na dauveiqaravi ni Kalou, au yapositolo i Jisu Karisito me vaka na nodra vakabauta na digitaki ni Kalou, kei na kilai ni ka dina me vaka na noda qarava na Kalou,
2 qai yavutaki ena inuinui ni bula tawamudu+ e yalataka makawa tu mai na Kalou, o koya e sega ni lasu rawa,+
3 ia ena nona gauna lokuci e vakatakila mai na nona vosa ena cakacaka vakavunau au vakaitavi kina,+ me vaka na ivakaro ni noda iVakabula na Kalou,
4 vei Taito na luvequ dina me vaka na vakabauta e tu vei keda:
Me sobuti iko mada ga na loloma soli wale kei na vakacegu ni Kalou na Tamada kei Karisito Jisu na noda iVakabula.
5 Au a biuti iko tiko mai Kiriti mo vakadodonutaka kina eso na leqa e kea, mo lesi ira tale ga na qase ena koro yadua me vaka au vakaroti iko kina:
6 ke dua na tagane e sega ni beitaki ena dua na ka, e dua ga na watina, mera vakabauta na luvena, me kua ni torosobu na nodra itovo se ra murilomadra.+
7 Me vaka ni dauniyau ni Kalou, me kua ni beitaki ena dua na ka na ivakatawa, me kua ni dau nanumi koya ga,+ me kua ni dau yalototolo,+ me kua ni dau mateni, me kua ni dau voravora, me kua ni kocokoco ena nona qara na sala me rawaka kina,
8 ia me dau veikauaitaki,+ me vinakata na ka dodonu, me yalomatua,+ me yalododonu, me yalodina,+ me dau lewai koya vinaka,+
9 me taura matua na vosa dina* ena nona veivakavulici me maqosa tale ga kina,+ me rawa ni veivakauqeti ena ivakavuvuli dina,+ me vunauci+ ira tale ga era saqata.
10 Era levu tu na tamata murilomadra, era dau talanoa wale ra qai dau vesumona, vakabibi o ira na tokona voli ga na cili.+
11 E dodonu mera vagalui nira vakasesea sara tiko ga na vuvale nira vakavulica na ka e sega ni dodonu, mera rawaka kina.
12 E dua mada ga na nodra parofita e kaya: “Era tamata lasulasu na kai Kiriti, era manumanu kila dau veivakamavoataki, era vucesa ra qai daukana.”
13 E dina na itukutuku qo. O koya gona, mo vunauci ira tiko ga vakavinaka me bulabula tale kina nodra vakabauta,
14 mera kua ni rogoca na nodra italanoa lasu na Jiu kei na nodra ivakavuvuli o ira na gole tani mai na ka dina.
15 E savasava na ka kece vei ira na tamata savasava,+ ia e sega ni dua na ka e savasava vei ira na dukadukali ra qai sega ni vakabauta, ni dukadukali na nodra vakasama kei na nodra lewaeloma.+
16 Era tukuna raraba nira kila na Kalou, ia era cakitaki koya ena ka era cakava,+ nira vakasisila ra qai talaidredre. Se mani ka vinaka cava era cakava, era na sega ga ni vakadonui.
iVakamacala e ra
^ Se “na itukutuku nuitaki.”
