Sakaraia 8:1-23
8 E vosa tale o Jiova ni lewe vuqa,* e kaya:
2 “Qo na ka e tukuna o Jiova ni lewe vuqa, ‘Au na vuvutaki Saioni ena vuvu levu,+ au na vuvutaki koya ena cudru levu.’”
3 “Qo na ka e tukuna o Jiova, ‘Au na lesu i Saioni+ meu tiko e loma i Jerusalemi,+ ena vakatokai o Jerusalemi me koro daudina*+ kei na ulunivanua i Jiova ni lewe vuqa, na ulunivanua tabu.’”+
4 “Qo na ka e tukuna o Jiova ni lewe vuqa, ‘Era na dabe tale na kenaturaga kei na kenamarama ena rara ni koro e Jerusalemi, o ira yadua kei na nodra ititoko e ligadra nira sa qase sara.+
5 Ena oso na rara ni koro ena gonetagane kei na goneyalewa era qito tiko kina.’”+
6 “Qo na ka e tukuna o Jiova ni lewe vuqa, ‘De dredre sara vei ira na vo ni tamata qo ena gauna oya, vakacava ena dredre tale ga vei au?’ e kaya o Jiova ni lewe vuqa.”
7 “Qo na ka e tukuna o Jiova ni lewe vuqa, ‘Ia qo au vakabulai ira na noqu tamata mai na veivanua ena tokalau kei na ra.*+
8 Au na kauti ira mai, era na tiko e loma i Jerusalemi,+ era na noqu tamata, au na nodra Kalou+ daudina,* au yalododonu.’”
9 “Qo na ka e tukuna o Jiova ni lewe vuqa, ‘Me kaukaua na ligamuni,*+ o kemuni na rogoca na vosa qo ena gusudra na parofita,+ na vosa vata ga e tukuni ena siga e tauyavutaki kina na vale i Jiova ni lewe vuqa, me tara na valenisoro.
10 Ni bera na gauna oya, e sega na isau ni tamata se na manumanu,+ e sega ni vinaka na lako mai se lako yani ena vuku ni meca, niu vakavuna mera veimecaki na tamata.’
11 “‘Ia qo au na sega ni cakava vei ira na vo ni tamata qo me vaka ena gauna e liu,’+ e kaya o Jiova ni lewe vuqa.
12 ‘Ni na kaburaki na sore ni veiyaloni, ena vua na vaini, ena vuataka na qele na vuana,+ ena solia mai na lomalagi na kena tegu, au na solia vei ira na vo ni tamata qo me nodra na ka kece qori.+
13 Me vaka ga nira vosavakacacataki kemuni na veimatanitu,+ o kemuni na vuvale i Juta kei na vuvale ni Isireli, au na vakabulai kemuni, oni na vakalougatataki.+ Moni kua ni rere!+ Me kaukaua na ligamuni.’*+
14 “Qo na ka e tukuna o Jiova ni lewe vuqa, ‘“Me vaka ga au nakita meu vakayacora vei kemuni na ka ca nira vakacudrui au na tukamuni,” e kaya o Jiova ni lewe vuqa, “au sega ni rarawataka,+
15 ia ena gauna qo au nakita meu caka vinaka vei Jerusalemi kei na vuvale i Juta.+ Moni kua ni rere.”’+
16 “‘Qo na ka moni cakava: Moni dui tukuna na ka dina,+ me salavata kei na dina kei na veiyaloni na vakataulewa ena nomuni matamata.+
17 Moni kua ni veinakicataki e lomamuni,+ moni kua ni vinakata na bubului lasu,+ niu cata na ka kece qori,’+ e kaya o Jiova.”
18 E vosa tale vei au o Jiova ni lewe vuqa, e kaya:
19 “Qo na ka e kaya o Jiova ni lewe vuqa, ‘Na lolo ena ikava ni vula,+ na lolo ena ikalima ni vula,+ na lolo ena ikavitu ni vula,+ na lolo ena ikatini ni vula+ e gauna ni marau kei na reki ena vuvale i Juta, e soqo ni marau levu.+ Moni vinakata gona na ka dina kei na veiyaloni.’
20 “Qo na ka e kaya o Jiova ni lewe vuqa, ‘Era na lako mai na lewe ni veivanua kei na lewe ni levu na veikoro,
21 era na lako na lewe ni dua na koro vei ira na lewe ni dua tale na koro, era kaya: “Meda kusa meda lai kerea na loloma* i Jiova, meda qarai Jiova ni lewe vuqa. Au na lako tale ga.”+
22 Era na lako e levu na lewe ni veivanua kei na veimatanitu qaqa mera qarai Jiova ni lewe vuqa e Jerusalemi,+ mera kerea na loloma* i Jiova.’
23 “Qo na ka e tukuna o Jiova ni lewe vuqa, ‘Ena gauna oya eratou na mai taura e tini na tamata eratou duivosavosa mai na veivanua kece,+ io, eratou na taura matua na nona isulu balavu* e dua na Jiu,* eratou kaya: “Keitou via lako vata kei kemudou,+ ni keitou rogoca ni tiko vata kei kemudou na Kalou.”’”+
iVakamacala e ra
^ Qo na mataivalu vakalomalagi.
^ Se “yalodina.”
^ Se “mai na vanua e cabe kina na siga kei na vanua e dromu kina na siga.”
^ Se “yalodina.”
^ Se “Moni yaloqaqa.”
^ Se “Moni yaloqaqa.”
^ Se “vakamamasu e matana.”
^ Se “vakamamasu e matana.”
^ Se “bele ni isulu.”
^ Ipe., “Jiu tagane.”
