Sakaraia 6:1-15
6 Au tacake tale au raica e va na qiqi ni lako tiko mai ena tadrua ni rua na ulunivanua, erau ulunivanua kopa.
2 Na imatai ni qiqi e damudamu na kena ose, na ikarua ni qiqi e loaloa na kena ose.+
3 Na ikatolu ni qiqi e vulavula na kena ose, na ikava ni qiqi e tavutonotono, e tavukadiridiri na kena ose.+
4 Au taroga na agilosi keirau veivosaki tiko: “Na cava qo noqu turaga?”
5 E kaya mai vei au na agilosi: “Qo e va na kabula vakayalo+ ni lomalagi eratou lako yani ni ratou rairai oti vua na Turaga ni vuravura taucoko.+
6 Na qiqi e loaloa na kena ose e lako yani ina vanua ena vualiku,+ na kena e vulavula e lako yani ena daku ni wasa, na kena e tavutonotono e lako yani ina vanua ena ceva.
7 Na kena e tavukadiridiri e gu me lako yani me veilakoyaki e vuravura.” E qai kaya o koya: “Dou lako, dou veilakoyaki e vuravura.” Eratou veilakoyaki sara e vuravura.
8 E qai kacivaka mai vei au o koya, e kaya: “Raici ratou na lako yani qori ena vanua ena vualiku, eratou vakavuna me vakacegu na yalo i Jiova ena vanua ena vualiku.”
9 E vosa tale vei au o Jiova, e kaya:
10 “Mo kauta mai vei Elitai, vei Tovaia, kei Jitaia na ka eratou kauta mai vei ira na vesu tu, ena siga oya mo lako ina vale nei Josaia na luvei Sefanaia kei ratou na lako mai Papiloni.
11 Mo kauta na siliva kei na koula mo cakava e dua na isala vakaturaga qai biuta e ulu i Josua+ na luvei Jiosataki na bete levu.
12 Mo tukuna vua,
“‘Qo na ka e tukuna o Jiova ni lewe vuqa:* “Na tamata qo na yacana o Sulina.+ Ena tubu ga ena nona vanua, ena tara na valenisoro i Jiova.+
13 Ena tara o koya na valenisoro i Jiova, ena tu vua na kena iukuuku. Ena dabe ena nona idabedabe vakaturaga me veiliutaki, me bete tale ga ena nona idabedabe vakaturaga,+ erau* na duavata.
14 Na isala vakaturaga ena kedratou ivakananumi o Elimi, o Tovaia, o Jitaia,+ kei Eni na luvei Sefanaia ena valenisoro i Jiova.
15 Era na lako mai o ira na tiko vakayawa mera tara na valenisoro i Jiova.” Oni na qai kila ni o Jiova ni lewe vuqa e talai au vei kemuni. Ena yaco ke oni rogoca sara ga na vosa i Jiova na nomuni Kalou.’”
iVakamacala e ra
^ Qo na mataivalu vakalomalagi.
^ Oya na nona itavi vakailiuliu kei na itavi vakabete.
