Vei Ira mai Roma 9:1-33

  • Rarawataki ira na Isireli o Paula (1-5)

  • Kawa dina nei Eparama (6-13)

  • Sega ni vakalewai rawa na digidigi ni Kalou (14-26)

    • iYaya cudruvi kei na iyaya lomani (22, 23)

  • Vica wale ga era na vakabulai (27-29)

  • Tarabe o Isireli (30-33)

9  O yau na imuri i Karisito, au tukuna tiko na ka dina, me vaka e vakadinadinataka na noqu lewaeloma ena veidusimaki ni yalo tabu, io au sega ni lasu  ena noqu kaya niu rarawa vakalevu qai mosi tu ga na lomaqu.  Au diva meu tawasei tani vei Karisito, meu cudruvi ga o yau ena vukudra na taciqu, o ira na wekaqu vakayago  na Isireli, o ira e vakadonui ira na Kalou mera luvena,+ e nodra na lagilagi, na veiyalayalati,+ na Lawa,+ na veiqaravi tabu,+ kei na vosa ni yalayala.+  O ira na Isireli qo era nodra kawa na tukadra,+ e sucu vakatamata mai vei ira na Karisito.+ Me vakacaucautaki na Kalou me tawamudu, o koya e lewa na ka kece ga. Emeni.  E sega ni kena ibalebale qo ni sega ni yaco na vosa ni Kalou. Ni sega ni o ira kece na kawa i Isireli era “Isireli” dina.+  Era sega tale ga ni luvena o ira kece na kawa i Eparama,+ ia, “O koya ena qai okati me nomu kawa ena basika mai vei Aisake.”+  Kena ibalebale ni o ira na luvena vakayago era sega dina ni luve ni Kalou,+ ia o ira na luve ni vosa ni yalayala+ era okati mera kawa.  Ni a yalataka na Kalou: “Au na lako mai ena gauna vata qo, ena qai vakasucuma o Sera e dua na gonetagane.”+ 10  E sega ni o koya ga oya, a yalayala tale ga ena gauna e kunekunetaka kina o Repeka e dua na drua vei Aisake na tukada.+ 11  Ni rau se bera ni sucu se rau cakava na ka e vinaka se ca, e qai vakaraitaka na Kalou ni o koya ga e veidigitaki me salavata kei na nona inaki, ni nona veidigitaki e vakatau ena nona veikacivi, e sega ni vakatau ena ka e cakava e dua. 12  E kaya na Kalou vei Repeka: “O koya e qase ena bobula nei koya e gone.”+ 13  Me vaka ga e volai: “Au lomani Jekope, ia au cati Iso.”+ 14  Na cava meda qai kaya? E sega ni dodonu na lewa ni Kalou? Sega sara!+ 15  Ni a kaya vei Mosese: “Au na yalololoma vei koya au via yalololoma kina, au na yalovinaka ga vei koya au via yalovinaka vua.”+ 16  O koya gona, e sega ni vakatau vei koya e diva se na nona sasaga, ia e vakatau ga vua na Kalou dauloloma.+ 17  Ni kaya vei Fero na tikinivolatabu: “Qo na vuna au vakabulai iko tiko kina, meu vakaraitaka kina vei iko na noqu kaukaua, me vakatakilai tale ga e vuravura taucoko na yacaqu.”+ 18  O koya gona, e lomani koya ga e via lomana, qai laivi koya e via domoqa me domoqa.+ 19  Oni na qai kaya vei au: “Na cava ga e veibeitaki tiko kina? O cei e bau vorata na nona inaki sa vakatakilai mai?” 20  O koya gona na wekaqu, o cei o iko mo vosa lesu vua na Kalou?+ Me kaya na ka e tuli vei koya e tulia, “Na cava o buli au kina va qo?”+ 21  Vakacava, e sega ni lewa na qele o koya na dautulituli,+ me bulia e dua na iyaya e talei kei na dua tale e sega ni talei ena dua ga na ibuli qele? 22  Vakacava ke sa loma ni Kalou me vakaraitaka nona cudru kei na nona kaukaua vei ira na iyaya cudruvi e ganita mera vakarusai, e qai vosoti ira ga vakadede? 23  Me vakatakila na levu ni nona lagilagi vei ira na iyaya lomani+ a vakarautaki ira e liu mera vakalagilagi, 24  oya o keda eda a sega ni kacivi wale ga mai vei ira na Jiu, vei ira tale ga mai na veimatanitu,+ me cava kina? 25  E vaka tale ga na ka e tukuna ena ivola i Osea: “O ira era sega ni noqu tamata,+ au na vakatokai ira mera ‘noqu tamata,’ na yalewa a sega ni lomani me ‘lomani,’+ 26  na vanua tale ga a tukuni vei ira na lewena, ‘Oni sega ni noqu tamata,’ era na vakatokai mera ‘luve ni Kalou bula.’”+ 27  A kacivaka tale ga o Aisea me baleti Isireli: “Ena rairai vaka na nuku ni matasawa na kedra iwiliwili na Isireli, ia e vica wale ga era na vakabulai.+ 28  Ni na vakataulewa e vuravura o Jiova,* ena tinia qai vakalekalekataka.”*+ 29  Me vaka tale ga a kaya o Aisea: “Ke sega ni dua na kawa e biuta mai vei keda o Jiova* ni lewe vuqa,* eda na tautauvata ga kei Sotoma, eda na vakataki Komora.”+ 30  Na cava meda qai kaya? Era sega ni qara tiko na yalododonu o ira na lewe ni veimatanitu, era vakadonui+ ga mera yalododonu ena vuku ni nodra vakabauta.+ 31  Ia o ira na Isireli, era qara tiko na yalododonu e yavutaki ena lawa, era sega ga ni rawata na ka e lavaki ena lawa oya. 32  Ena vuku ni cava? Nira sega ni qara ena vakabauta, era qara ga ena nodra nanuma nira na rawata ena levu ni ka era cakava. Era tarabe ena “vatu ni veivakatarabetaki.”+ 33  Me vaka ga e volai: “Raica! Au sa tuvana mai Saioni na vatu+ ni veivakatarabetaki kei na vatu ni veivakacalai, ia o koya e yavutaka kina nona vakabauta ena sega ni rarawa.”+

iVakamacala e ra

Raica na iKuri A5.
Se “qai vakayacora vakatotolo.”
Raica na iKuri A5.
Qo na mataivalu vakalomalagi.