Vei Ira mai Roma 6:1-23
6 Na cava meda qai kaya? Meda sa valavala ca tiko ga me laurai vakalevu kina na loloma soli wale ni Kalou?
2 Me kua sara ni yaco qori! Nida a mate ena ivalavala ca,+ ena rawa vakacava meda bula tiko ga ena ivalavala ca?+
3 Se oni sa lecava ni o keda kece eda papitaiso vei Karisito Jisu+ eda papitaisotaki ina nona mate?+
4 Eda bulu vata gona kei koya nida papitaisotaki ina nona mate,+ me rawa kina nida qai bula ena dua na ivakarau ni bula vou me vaka ga na nona vakaturi mai na mate na Karisito ena lagilagi nei Tamana.+
5 Ke da duavata kei koya ena noda mate me vakataki koya,+ eda na duavata tale ga kei koya ena noda vakaturi me vakataki koya.+
6 Nida kila ni noda bula makawa a lauvako vata kei koya ena kau+ me vakamatei kina na yagoda ivalavala ca,+ meda kua tale ni bobula tiko ina ivalavala ca.+
7 O koya sa mate sa bokoci* na nona ivalavala ca.
8 O koya gona, ke da mate vata kei Karisito, eda vakabauta nida na bula vata tale ga kei koya.
9 Eda kila ni sa vakaturi mai na mate na Karisito,+ ena sega tale ni mate.+ Sa sega ni qai lewai koya o mate.
10 Ni mate a mate kina, a mate ga vakadua me bokoca na ivalavala ca,+ ia na nona bula, e bula vua na Kalou.
11 E vaka tale ga kina o kemuni, ni okati kemuni moni mate ena vuku ni ivalavala ca, ia moni bula moni qarava na Kalou ena vuku i Karisito Jisu.+
12 O koya gona, ni kua ni vakalaiva na ivalavala ca me veiliutaki vaka na tui e yagomuni vakatamata,+ moni muria tiko kina na kena gagadre.
13 Ni kua tale ga ni solia na yagomuni* ina ivalavala ca me iyaragi ni tawayalododonu, ni soli kemuni ga vua na Kalou ni oni bula mai na mate, ni solia tale ga na yagomuni* vua na Kalou me iyaragi ni yalododonu.+
14 E sega ni dodonu me lewai kemuni na ivalavala ca ni oni sega ni vauci ena lawa,+ oni vauci ga ena loloma soli wale.+
15 Na cava e kena ibalebale qo? Meda sa valavala ca tiko ga nida sega ni vauci ena lawa, ia eda vauci ena loloma soli wale?+ Me kua sara ni yaco qori!
16 E vakaevei, oni kila tiko ke oni soli kemuni vua e dua moni talairawarawa vua, oni sa nona bobula ni oni talairawarawa vua,+ se moni bobula ina ivalavala ca+ qai kena itinitini na mate,+ se moni talairawarawa qai kena itinitini na nomuni okati moni yalododonu?
17 Me vakavinavinakataki na Kalou ni oni a bobula ina ivalavala ca, ia oni talairawarawa mai vu ni lomamuni ena ivakarau ni ivakavuvuli oni vakavulici kina.
18 Io, ena gauna oni sereki kina mai na ivalavala ca,+ oni sa bobula ina ivalavala dodonu.+
19 Au vosa vakatamata ga baleta ni malumalumu na yagomuni: me vaka ga oni a solia na veitikiniyagomuni me bobula ina ivalavala tawasavasava kei na ca me levu kina na ka ca, ia qo moni solia na veitikiniyagomuni me bobula ina ivalavala dodonu moni savasava kina.+
20 Ena gauna oni bobula tu kina ina ivalavala ca, oni a galala mai na ivalavala dodonu.
21 Na cava soti oni a vuataka ena gauna ya? Na veika oni madualaka ena gauna qo. Na itinitini kece ni veika oya na mate.+
22 Ia qo ni oni sa sereki mai na ivalavala ca ena nomuni sa bobula ni Kalou, e sa laurai na vuana ena nomuni sa yalosavasava,+ qai kena itinitini na bula tawamudu.+
23 Na isau ni ivalavala ca na mate,+ ia na iloloma ni Kalou na bula tawamudu+ ena vuku i Karisito Jisu na noda Turaga.+
