Vei Ira mai Roma 4:1-25

  • Okati o Eparama me yalododonu ena vakabauta (1-12)

    • Eparama na tamadra kece na vakabauta (11)

  • Vosa ni yalayala e vu ena vakabauta (13-25)

4  O koya gona, na cava meda kaya ena ka e rawata o Eparama na tukada?  Kena ivakaraitaki, ke a vakadonui o Eparama ena vuku ni ka e cakava, ke a yavu vinaka me sakitaki koya kina, ia e sega ni va qori na rai ni Kalou.  Na cava e kaya na tikinivolatabu? “E vakabauti Jiova* o Eparama, oya na vuna e okati kina me yalododonu.”+  Vei koya e cakacaka, na kena isau e sega ni okati me loloma soli wale, e soli ga vua me isau ni ka e cakava.  Ena yasana adua, na tamata e sega ni cakacaka ia e vakabauti koya e vakadonui ira na ivalavala ca, na nona vakabauta e okati me yalododonu.+  E va tale ga qo na ka e tukuna o Tevita me baleta na marau e vakila e dua ni okati koya na Kalou me yalododonu, dina ni sega ni yavutaki ena nona cakacaka:  “Era marau o ira e vosoti nodra caka cala qai ubi* na nodra ivalavala ca,  e marau o koya ena sega ni wilika o Jiova* na nona ivalavala ca.”+  Era vakila ga na marau qo o ira na cili se ra vakila tale ga na sega ni cili?+ Nida kaya: “E okati Eparama na Kalou me yalododonu ena vuku ni nona vakabauta.”+ 10  Ia e yaco ena gauna cava qo? Ena gauna sa cilivi oti kina se ni bera ni cilivi? Ni se bera ni cilivi, sega ni gauna sa cilivi oti kina. 11  E soli vua e dua na ivakatakilakila+—na nona cilivi—me ivakadei ni nona yalododonu ena vuku ni nona vakabauta ni se bera ni cilivi, me rawa ni tamadra kece na vakabauta+ era sega ni cilivi, mera okati kina mera yalododonu. 12  E tamadra tale ga na cilivi, qo e sega wale ga ni vauci ira na cili, ia era vauci tale ga kina o ira era vakatotomuria na vakabauta e laurai vei Eparama+ na tamada ni se bera ni cilivi. 13  Na kena yalataki vei Eparama kei na nona kawa ni na taukena e dua na vuravura*+ a sega ni vu ena nona muria na lawa, e vu ga ena nona okati me yalododonu ena vuku ni nona vakabauta.+ 14  Ke ra itaukei ga o ira era muria na lawa, sa na qai tawayaga na vakabauta, ena bokoci tale ga na vosa ni yalayala. 15  Na Lawa ga ena kauta mai na cudru ni Kalou,+ ia ke sega na lawa ena sega na cala.+ 16  A yalataki vei Eparama me itaukei ena vuku ni nona vakabauta. O koya gona, na cavuti ni vosa ni yalayala qo e ivakaraitaki tale ga ni loloma soli wale ni Kalou.+ Ni vosa ni yalayala qo e vu mai na vakabauta qai vakadeitaki vei ira kece na nona kawa,+ sega ni o ira ga era muria na Lawa, vei ira tale ga era vakatotomuri Eparama ena nona vakabauta, e tamada kece o koya.+ 17  (Me vaka e volai: “Au sa lesi iko mo tamadra na veimatanitu.”)+ A vakadeitaki na vosa ni yalayala qo ena mata ni Kalou e vakabauta o koya. Na Kalou e vakabulai ira na mate, e cavuta na ka era sega ni tu me vaka ga era tu dina. 18  Ni sega na yavu me vakanuinui kina, e dei ga na nona vakanuinui ena vuku ni nona vakabauta, me tamadra na veimatanitu, me vaka sa tukuni oti: “Ena vaka tale ga kina na nomu kawa.”+ 19  E sega ni malumalumu nona vakabauta, e dina ni vakila ni sa mate oti tu na yagona (ni sa volekata na yabaki 100),+ ni sa mate tale tu ga na katonigone i Sera.+ 20  Ia e sega ni luluqa vakalailai na nona vakabauta na vosa ni yalayala ni Kalou, sa qai kaukaua ga na nona vakabauta. E vakalagilagi kina na Kalou 21  qai vakadeitaka ni na vakayacora dina na nona vosa ni yalayala.+ 22  Qo na vuna “e okati kina me yalododonu.”+ 23  Ia na ka e “okati kina o koya” e sega ni volai ga me baleti koya,+ 24  e volai tale ga me baleti keda eda na okati meda yalododonu, nida vakabauti koya e vakaturi Jisu na noda Turaga mai na mate.+ 25  A soli yani me mate ena vuku ni noda cala,+ e qai vakaturi meda okati kina meda yalododonu.+

iVakamacala e ra

Raica na iKuri A5.
Se “vosoti.”
Raica na iKuri A5.
Se “na vuravura vou.”