Vei Ira mai Roma 16:1-27

  • Tukuni Fipi o Paula ni dua na dauveiqaravi (1, 2)

  • Loloma vei ira na lotu vaKarisito mai Roma (3-16)

  • Qarauna na veisei (17-20)

  • Nodra iloloma na itokani vakacakacaka i Paula (21-24)

  • Vakatakilai na ka vuni tabu (25-27)

16  Qori o Fipi e dua na tacida yalewa, e dauveiqaravi ena ivavakoso e Kenikiria,+  au kerea moni ciqomi koya ena vuku ni Turaga me vaka na nomuni dau ciqomi ira na yalosavasava, moni vakarautaka vua na ka e gadreva,+ ni dau vukei ira tale ga e levu, wili kina o yau.  Au loloma vei Pirisila kei Akuila,+ o rau na noqu itokani keitou dau cakacaka vata ena veika e baleti Karisito Jisu,  erau a bolemate ena vukuqu.+ Au vakavinavinaka vei rau, o yau kei na ivavakoso kece ni veimatanitu.  Au loloma tale ga ina ivavakoso e dau soqoni ena nodrau vale.+ Au loloma vua na noqu itokani lomani o Epinito, e dua vei ira na isevu ni kai Esia* me imuri i Karisito.  Loloma tale ga vei Meri, e dua e dau ogaoga ena vukumuni.  Loloma vei rau na wekaqu keitou a vesu vata, o Adroniko kei Junia,+ eratou dau nuitaki rau na yapositolo, e dede cake vei au na nodrau muri Karisito voli.  Au loloma vei Abilia, na noqu itokani lomani ena veika me baleta na Turaga.  Au loloma vei Uripenu, noda itokani ena cakacaka i Karisito, kei na noqu itokani lomani o Siteki. 10  Loloma vei Apeli, na turaga yalodina i Karisito. Loloma ina vuvale i Arisitopulo. 11  Loloma vei Erotioni na wekaqu. Loloma vei ratou na lewe ni vuvale i Narikiso, eratou qarava na Turaga. 12  Loloma vei Taraivina kei Taraivosa, erau marama gugumatua ena cakacaka ni Turaga. Loloma vua na noda itokani o Perisi, na marama e dau ogataka na cakacaka ni Turaga. 13  Loloma vei Rufu, na nona digitaki na Turaga. Loloma vei tinana, e tinaqu tale ga. 14  Loloma vei Asinikirito, Filekoni, Eremesi, Patiropa, Erimi, kei ira na veitacini era tiko vata voli. 15  Loloma vei Filoloko kei Julia, o Niriu kei ganena, o Olimipia, kei ira na yalosavasava kece era tiko vata voli. 16  Ni kidavaki ira na tacimuni ena iregu ni veitacini. E loloma tu yani vei kemuni na ivavakoso kece i Karisito. 17  Au uqeti kemuni raveitacini moni qarauni ira na dau vakavuveisei kei ira na dau veivakatarabetaki, ni ka era cakava e veibasai sara ga kei na ka oni vulica, ni kua ni veimaliwai kei ira.+ 18  O ira na dau cakava qori era sega ni bobula ni noda Turaga o Karisito, era bobula ga ina ketedra, na nodra vosa kamikamica tale ga kei na nodra vosa ni veicavilaki era lawakitaka na lomadra o ira na wele tu. 19  Sa kilai levu na nomuni talairawarawa. Qo na vuna au marautaki kemuni kina vakalevu. Ia au vinakata moni yalomatua ena ka e vinaka, moni yalowai ena ka e ca.+ 20  Sega ni dede, na Kalou ni vakacegu ena qai butuqaqi Setani+ ena ruku ni yavamuni. Me nomuni mada ga na loloma soli wale ni noda Turaga o Jisu. 21  E loloma yani vei kemuni o Timoci na noqu itokani vakacakacaka, kei ratou na wekaqu o Lusiu, Jesoni, kei Sosipeta.+ 22  O yau o Teritiu, au vola na ivola qo, au vakauta tale tiko ga yani na noqu loloma vaKarisito. 23  E loloma yani vei kemuni o Keio,+ o koya e vakaicilitaki au ena nona vale, e soqoni tale ga kina na ivavakoso. E loloma tale ga yani o Erasito na dauniyau ni koro, kei na tacina o Kuaritu. 24  *—— 25  Vei koya e rawa ni vakataudeitaki kemuni me salavata kei na itukutuku vinaka au kacivaka, oya na tukuni ni veika me baleti Jisu Karisito, me vaka na vakatakilai ni ka vuni tabu+ a vunitaki tu ena dua na gauna balavu 26  ia sa mai vakaraitaki, e vakatakilai vei ira na veimatanitu ena parofisai ni iVolatabu me salavata kei na ivakaro ni Kalou tawamudu. Qo mera vakabauta kina, ra talairawarawa sara. 27  Me vakalagilagi me tawamudu na Kalou vuku duadua ga+ ena vuku i Jisu Karisito. Emeni.

iVakamacala e ra

Raica na vmr ni Cak 2:9.
Raica na iKuri A3.