Vei Ira mai Roma 11:1-36
11 Ia meu taro mada, na Kalou a sega ni cati ira na nona tamata, se vakacava?+ Sega sara! Au Isireli tale ga o yau, au kawa i Eparama ena yavusa i Penijamini.
2 Na Kalou e sega ni cati ira nona tamata a kauaitaki ira e liu.+ Oni sega ni kila na ka e kaya na tikinivolatabu ena nona vakamamasu o Ilaija vua na Kalou me beitaki ira na Isireli?
3 “I Jiova,* era sa vakamatei ira na nomuni parofita, era vakarusa na nomuni icabocabonisoro, au sa qai vo taudua, ia qo era vinakata tale ga mera vakamatei au.”+
4 Na cava e qai kaya vua na Kalou? “Se vo tiko vei au e 7,000 na tagane era sega ni tekiduru vei Peali.”+
5 E vaka tale ga kina ena gauna qo, e dua na kena vo+ era sa digitaki ena vuku ni loloma soli wale.
6 Ke yavutaki na veidigitaki ena loloma soli wale,+ e kena ibalebale ni sega ni yavutaki ena ka e caka,+ ke yavutaki ena ka e caka, sa na sega ni okati na loloma soli wale qori me loloma soli wale.
7 Cava gona meda qai kaya? Na ka sara ga e saga tiko o Isireli e qai sega ni rawata, ia o ira ga na digitaki era rawata.+ Na kena vo era domoqa,+
8 me vaka ga e volai: “E qai vakalaiva na Kalou mera mocelutu yani vakayalo,+ me kua ni rai na matadra, me kua ni rogo na daligadra me yacova mai nikua.”+
9 E kaya tale ga o Tevita: “Me icori, me dai, me ka ni veivakatarabetaki, me itotogi tale ga vei ira na nodra teveli.
10 Me butobuto na matadra mera kua kina ni rai, mera sa vakalairoro tu ga.”+
11 Au mani taroga, Era tarabe ra qai bale vakadua kina? Sega sara! Ia ena nodra butucala era vakabulai kina na lewe ni veimatanitu, qo e vakavuna mera vuvu.+
12 Ke vutuniyau o vuravura ena nodra butucala, ke ra vutuniyau tale ga na lewe ni veimatanitu ena nodra vakalailaitaki,+ sa na qai wacava na vutuniyau ke taucoko na kedra iwiliwili!
13 Au vosa tiko qo vei kemuni na lewe ni veimatanitu. O yau na yapositolo au talai ina veimatanitu,+ au doka* na noqu cakacaka vakaitalatala,+
14 ia ke rawa, meu uqeti ira na kainoqu mera vuvu mera vakabulai kina eso vei ira.
15 Ke veiyaloni kei na Kalou o vuravura ena nodra biu tani,+ na cava ena yacovi ira ke ra na vakalesui mai? Era sa na veisau mai na mate ina bula!
16 Kena ikuri, ke savasava e dua na tiki ni ibuli me isevu, kena ibalebale e savasava na ibuli taucoko, ke savasava tale ga na wakana, e kena ibalebale ni savasava na tabana kece.
17 Ia ke sa ramusu eso na tabana, o qai semati yani ena taba ni olive ni veikau, mo vakaivotavota ena veika bulabula mai na wakana,
18 mo kua ni vakalevulevui iko vei ira na tabana dina. Ke o vakalevulevui iko,+ mo nanuma ni sega ni bula na wakana ena vukumu, o iko ga o bula ena vuku ni wakana.
19 O qai kaya: “Era musuki sara ga na tabana meu veisosomitaki.”+
20 Io, era musuki tani ni vovodea nodra vakabauta,+ ia o iko o mai tu qo ena vuku ni vakabauta.+ Kua ni nanuma ni o sa dua na ka, mo qarauni iko ga.
21 Ke a sega ni maroroya na Kalou na tabana dina, ena sega tale ga ni maroroi iko.
22 O koya gona, mo kila tiko ni dau yalovinaka na Kalou,+ ia e veitotogitaki tale ga. Vei ira na bale, ena totogitaki ira,+ ia vei iko ena yalovinaka vei iko ke o tiko ga ena nona loloma. Ke sega, o na musuki tani tale ga.
23 Ia o ira tale ga na bale, ke ra veisautaki ira mai na vovodea ni nodra vakabauta, era na semati tale,+ ni rawa vua na Kalou me semati ira lesu.
24 Ke o sa musuki laivi mai na vuniolive ni veikau mo semati ena vuniolive e tei, na ka e sega ni dau caka, sa na rawarawa sara vei ira na taba dina ni vuniolive e tei mera semati lesu i vudra!
25 Niu sega ni vinakata kemuni na taciqu moni lecava na ka vuni tabu qo,+ moni kua ni nanuma kina ni oni sa vuku: Nira a domoqa eso na Isireli me yacova ni sa kumuni na kedra iwiliwili kece na lewe ni veimatanitu.
26 Na sala qo era na vakabulai kina na Isireli kece.+ Me vaka na ka e volai: “O koya e veivakabulai* ena lako mai Saioni+ me kauta tani vei Jekope na ivalavala kece e sega ni vakalou.
27 Qo na noqu veiyalayalati kei ira+ niu sa na kauta tani na nodra ivalavala ca.”+
28 Era meca ni Kalou nira cata na itukutuku vinaka mo dou vinaka kina. Ia ena veidigitaki ni Kalou era lomani kina ena vuku ni vosa ni yalayala ni Kalou vei ira na tukadra.+
29 Ni na sega ni veivutunitaka na Kalou na nona iloloma kei na nona veikacivi.
30 Me vaka ga na nomuni a talaidredre vua na Kalou,+ ia qo oni sa lomani+ ena vuku ni nodra talaidredre,+
31 e vaka tale ga kina o ira, ni nodra talaidredre oni lomani kina, me rawa nira lomani tale ga kina.
32 Mani vakalaiva na Kalou mera bobula kece ina talaidredre,+ me rawa ni qai lomani ira kece.+
33 Sa titobu dina na veivakalougatataki ni Kalou, na nona vuku kei na nona kilaka! E sega ni katumi rawa na titobu ni ka e vakananuma, e dredre tale ga ni kilai na nona sala kece!
34 “O cei e kila na vakanananu i Jiova?* Se o cei me vakasalataki koya?”+
35 Se, “o cei e bau soli ka e liu vua me rawa ni saumi tale vua?”+
36 Ni bulia o koya na ka kece, era bula ena nona kaukaua, era tudei tale ga ena vukuna. O koya gona, me vakalagilagi ga o koya me tawamudu. Emeni.
