Niemaia 9:1-38
9 Ena ika24 ni siga ni vula qo era soqoni vata na Isireli, era lolo nira vakaisulutaga, era kaburaka vei ira na kuvuniqele.+
2 Era qai tawasei ira na kawa nei Isireli vei ira kece na vulagi,+ era duri sara mera vakatusa na nodra dui ivalavala ca kei na cala i tukadra.+
3 Era duri sara ena vanua era tu kina, era wilika e cake na ivola ni Lawa+ i Jiova na nodra Kalou ena ikava ni wase ni siga,* ena dua tale na ikava ni iwase era vakatutusa ra qai cuva sobu vei Jiova na nodra Kalou.
4 Eratou tucake ena dela ni nodra buturara+ na Livai o Jesua, o Pani, o Katimieli, o Sipanaia, o Puni, o Serepaia,+ o Pani kei Kinani, eratou qai tagi ena domoilevu vei Jiova na nodra Kalou.
5 Eratou mani kaya na Livai, oya o Jesua, o Katimieli, o Pani, o Esapinaia, o Serepaia, o Otaia, o Sipanaia kei Pecaia: “Moni tucake, moni vakacaucautaki Jiova na nomuni Kalou me tawamudu.+ Mera vakacaucautaka na yacamuni lagilagi, na yaca e uasivia na vakavinavinaka kei na veivakacaucautaki kece.
6 “O kemuni duadua ga Jiova,+ oni bulia na lomalagi, io na veilomalagi kei na kedra mataivalu kece, na vuravura kei na ka kece e tiko kina, na wasawasa kei na ka kece e tiko kina. Oni vakabulai ira kece, ra qai cuva tiko vei kemuni na mataivalu vakalomalagi.
7 O kemuni Jiova na Kalou dina, oni digitaki Eparaama+ moni kauti koya tani mai Uri+ ena nodra vanua na Kalitia, oni qai vakatokai koya ena yaca Eparama.+
8 Oni raica ni dina vei kemuni na lomana,+ oni qai veiyalayalati kei koya moni solia vua na nodra vanua na kai Kenani, o ira na Itaiti, o ira na Amoraiti, o ira na Perisaiti, o ira na Jepusaiti, kei ira na Kakesaiti, me solia vua na nona kawa,+ oni qai vakayacora na nomuni vosa ni oni yalododonu.
9 “Oni a raica gona na nodra rarawa na tukai keimami mai Ijipita,+ oni rogoca na nodra tagi ena Wasa Damudamu.
10 Oni qai vakatakila na ivakatakilakila, oni cakamana vei Fero kei ira kece na nona tamata, kei ira kece na lewe ni nona vanua,+ ni oni kila ni viavialevu+ na nodra ivalavala vei ira. Oni vakarogoya na yacamuni me yacova mai na siga qo.+
11 Oni wasea na wasawasa e matadra mera takosova na loma ni wasawasa ena vanua mamaca,+ oni kolotaki ira na veivakasavi ina loma ni wasa titobu me vaka na vatu e kolotaki ina wasawasa voravora.+
12 Oni tuberi ira ena siga ena duru o, ena bogi ena duru bukawaqa me vakararamataka na sala mera muria.+
13 Oni lako sobu mai e Ulu i Saineai,+ oni vosa vei ira mai lomalagi,+ oni qai solia vei ira na lewa dodonu, na lawa dina,* na ivakasala vinaka kei na ivakaro.+
14 Oni vakatakila vei ira na nomuni Siga ni Vakacecegu+ tabu, oni solia vei ira na ivakaro, na ivakasala, kei na lawa ni oni vakayagataki Mosese na nomuni dauveiqaravi.
15 Oni solia vei ira na madrai mai lomalagi nira viakana,+ oni vakavurea na wai mai na vatu nira karamaca,+ oni qai tukuna vei ira mera curuma mera taukena na vanua oni bubuluitaka* moni solia vei ira.
16 “Ia o ira, oya na tukai keimami e viavialevu+ na nodra ivalavala ra qai domoqa,+ era sega ni rogoca na nomuni ivakaro.
17 Era bese ni vakarorogo,+ era sega ga ni nanuma na cakacaka veivakurabuitaki oni vakayacora vei ira, era domoqa ga ra qai lesia e dua na nodra iliuliu mera suka mera bobula tale i Ijipita.+ Ia oni Kalou dau via veivosoti, oni yalovinaka, oni dauloloma, oni dau berabera ni cudru, e levu na dei ni nomuni loloma,*+ oni sega sara ni biuti ira.+
18 Io, nira bulia oti na nodra ivakatakarakara kaukamea ni luvenibulumakau, era kaya, ‘Qo na nomuni Kalou a kauti kemuni tani mai Ijipita,’+ era qai vakayacora na itovo e laurai kina na levu ni nodra veibeci,
19 ia ena levu ni nomuni loloma oni sega kina ni biuti ira tu ena vanua talasiga.+ E sega ni biuti ira na duru o ena siga ni liutaki ira ena sala mera muria, se na duru bukawaqa ena bogi ni vakararamataka na sala mera muria.+
20 Oni solia vei ira na yalomuni vinaka mera yalomatua+ kina, oni sega ni bureitaka i gusudra+ na nomuni mana, oni solia vei ira na wai nira karamaca.+
21 Oni vakarautaka vei ira na kedra ena vanua talasiga me 40 na yabaki.+ E sega na ka me yali vei ira. E sega ni madra na nodra isulu,+ e sega ni vuvuce na yavadra.
22 “Oni solia vei ira na veimatanitu kei ira na lewe ni veivanua, oni wasewasea+ vei ira na vanua, era taukena kina na vanua nei Sioni+ oya na vanua nei tui Esiponi,+ kei na vanua nei Oki+ na tui Pasani.
23 Oni vakalevutaka na luvedra me vaka na kalokalo ni lomalagi.+ Oni qai kauti ira ina vanua oni yalataka vei tukadra mera curuma mera taukena.+
24 Era mani lako yani na luvedra mera taukena na vanua,+ oni qai vakamalumalumutaki ira na kai Kenani+ era tiko ena vanua, oni soli ira e ligadra, na nodra tui kei ira na lewe ni veivanua mera vakayacora vei ira na ka era vinakata.
25 Era kaba na nodra koro vakabai+ kei na nodra qele bula+ mera taukena na vale e sinai ena ka vinaka kece, na mataniwai sa keli oti, na loganivaini, na veiolive+ kei na kau e vua vakalevu. Era kana era mamau, era levulevu, ra qai marautaka na levu ni nomuni yalovinaka.
26 “Ia era talaidredre, era be vei kemuni,+ era vakanadakuya na nomuni Lawa. Era vakamatei ira na nomuni parofita era vakasalataki ira mera lesu vei kemuni, ra qai vakayacora na itovo e laurai kina na levu ni nodra veibeci.+
27 Qo na vuna oni soli ira kina e ligadra na kedra meca+ era vakararawataki ira tiko ga.+ Ia era tagici kemuni ena gauna era rarawa kina oni qai rogoca mai lomalagi, oni solia eso mera vakabulai ira mai na ligadra na kedra meca me vaka ga na nomuni loloma levu.+
28 “Ia ena gauna ga era vakacegu kina era vakayacora tale na ka ca e matamuni,+ oni soli ira e ligadra na kedra meca mera lewai ira.*+ Era qai lesu yani mera kere veivuke vei kemuni,+ oni rogoca mai lomalagi, oni qai vakabulai ira wasoma me vaka na nomuni loloma levu.+
29 Oni vunauci ira moni vakalesui ira ina nomuni Lawa, ia era viavialevu ga ra qai bese ni rogoca na nomuni ivakaro,+ era cala nira sega ni muria na nomuni lawa, ena bula kina na tamata ke muria.+ Ia era vakanadakuya nira beca, era domoqa ra qai bese ni vakarorogo.
30 Oni vosoti+ ira tiko ga me vica vata na yabaki, oni vakasalataki ira tiko ga ena yalomuni ni oni vakayagataki ira na nomuni parofita, ia era bese ni vakarorogo. Oni qai soli ira e ligadra na lewe ni veivanua.+
31 Ena levu ni nomuni loloma oni sega ni vakawabokotaki+ ira kina se biuti ira, ni oni Kalou yalovinaka oni dauloloma.+
32 “Ia qo kemuni na neimami Kalou, na Kalou cecere, oni kaukaua qai vakatubuqoroqoro, oni dau dina ena nomuni veiyalayalati, oni vakaraitaka na dei ni nomuni loloma,+ moni kua mada ga ni vakawalena na ka dredre kece keimami sotava tiko, era sotava na neimami tui, o ira na neimami turaga,+ o ira na neimami bete,+ o ira na neimami parofita,+ o ira na tukai keimami, kei ira kece na nomuni tamata ena nodra gauna na tui Asiria+ me yacova mai na siga qo.
33 Oni yalododonu tu ga ena ka kece keimami sotava, ni oni daudina ena nomuni ivalavala, ia o keimami ga e dau ca na neimami ivalavala.+
34 O ira na neimami tui, na neimami turaga, na neimami bete kei ira na tukai keimami era sega ni muria na nomuni Lawa, se ra vakarorogo mada ga ina nomuni ivakaro, se na veivakadreti* oni vakasalataki ira kina.
35 Na gauna mada ga era tiko kina ena nodra matanitu, era marautaka na ka vivinaka oni solia vakalevu vei ira, era tiko ena qele raba bulabula oni vakarautaka vei ira, era sega ga ni qaravi+ kemuni se biuta na nodra ivakarau ca.
36 Keimami sa bobula+ tu nikua, io keimami sa bobula ena vanua oni solia vei ira na tukai keimami mera kania na vuana kei na kena ka vinaka.
37 E levu na vuaniqele e nodra na tui oni lesia mera lewai keimami ena vuku ni neimami ivalavala ca.+ Era lewa na yago i keimami kei na neimami manumanu me vaka na ka era vinakata, sa dua na ka na levu ni neimami rarawa.
38 “Ena vuku gona ni ka kece qo, keimami vakayacora e dua na veidinadinati bibi+ me vakaivolataki qai vakadinadinataki nira dregata na neimami turaga, o ira na neimami Livai, kei ira na neimami bete.”+
iVakamacala e ra
^ Se “tolu na aua.”
^ Se “lawa nuitaki.”
^ Ipe., “oni laveta na ligamuni.”
^ Se “yalololoma.”
^ Se “qaqi ira.”
^ Se “ivakasala.”
