Niemaia 8:1-18
8 Era kumuni vata kece na lewenivanua me vaka ga e le dua ena rara donuya na Matamata ni Wai,+ era kaya sara vei Esera+ na vunivola* me kauta mai na ivola ni Lawa e vola o Mosese+ e vakarota o Jiova vei ira na Isireli.+
2 Ena imatai gona ni siga ena ikavitu ni vula+ e kauta na Lawa o Esera na bete e matadra na ivavakoso,+ o ira na turaga, o ira na marama, kei ira kece na rawa ni rogoca mera kila na kena ibalebale.
3 E wilika i cake+ ena mata ni rara donuya na Matamata ni Wai mai na kida ni mataka me yacova na sigalevu tutu, vei ira na turaga, na marama, kei ira na rawa ni kila na kena ibalebale. Era vakatudaliga+ vinaka sara na lewenivanua ina ivola ni Lawa.
4 E tucake tu o Esera na vunivola ena buturara kau e caka me baleta na soqo oya. Eratou duri volekati koya ena imatau o Maticaia, o Sema, o Anaia, o Uraia, o Ilikaia kei Mesea, ena imawi o Petaia, o Misaeli, o Malikaia,+ o Asumi, o Asipatani, o Sakaraia kei Mesulame.
5 E tevuka na ivola o Esera e matadra kece na lewenivanua ni rewaicake toka o koya vei ira kece na lewenivanua. Ena gauna e tevuka kina o koya, era tucake kece na lewenivanua.
6 E qai vakacaucau o Esera vei Jiova na Kalou dina, o koya e cecere, era sauma kece na lewenivanua, “Emeni!* Emeni!”+ era laveta cake na ligadra. Era cuva ra qai tekicuva vei Jiova ni tara na matadra na qele.
7 Ia o Jesua, o Pani, o Serepaia,+ o Jamini, o Akupi, o Sapicei, o Otaia, o Mesea, o Kilita, o Asaraia, o Josapati,+ o Anani, kei Pelaia era Livai, era vakamacalataka na Lawa vei ira na lewenivanua+ nira duri tu na lewenivanua.
8 Era wilika tiko ga e cake na ivola mai na Lawa ni Kalou dina, era vakamacalataka vinaka, era tukuna na kena ibalebale, era mani vukei ira na lewenivanua mera kila na ka e wiliki.*+
9 E qai tukuna vei ira kece na lewenivanua o Niemaia na kovana* ena gauna oya, o Esera+ na bete na vunivola, kei ira na Livai era vakavulici ira na lewenivanua: “Na siga qo e tabu vei Jiova na nomuni Kalou.+ Moni kua sara ni rarawa se tagi.” Era tagi tiko na lewenivanua kece nira rogoca na vosa ni Lawa.
10 E tukuna vei ira o Niemaia: “Moni lako moni kania na ka vinaka,* moni gunuva na ka kamikamica, moni vakauta tale ga na ivotavota kakana+ vei ira na sega ni vakarautaka rawa e dua na ka, ni tabu na siga qo vua na noda Turaga, ni kua ni rarawa ni nomuni koro kaukaua na marau e solia o Jiova.”
11 Era qai vakaroti ira na lewenivanua o ira na Livai mera galu, era kaya: “Moni vakanomodi! ni tabu na siga qo, moni kua sara ni rarawa.”
12 Era mani lako kece yani na lewenivanua mera kana mera gunu, era vakauta tale ga na ivotavota kakana, ra qai marau+ vakalevu nira sa kila na ibalebale ni vosa e tukuni vei ira.+
13 Ena ikarua ni siga, era soqoni vata vei Esera na vunivola o ira na nodra turaga ni mataqali na lewenivanua kece, o ira na bete, kei ira na Livai mera kila eso tale na ka me baleta na vosa ni Lawa.
14 Era qai kunea ni volai ena Lawa e vakarota o Jiova vei Mosese, ni dodonu mera vakaitikotiko ena valetabanikau* o ira na Isireli ena gauna ni soqo ena ikavitu ni vula,+
15 mera tukuna yani+ mera kacivaka ena nodra koro taucoko, kei Jerusalemi taucoko, mera kaya: “Moni lako yani ena veiulunivanua moni kauta mai na tabanikau e levu na drauna mai na vuniolive, na vuniwaiwai, na vunimateli, na vuniniuniu, kei na so tale na tabanikau e levu na drauna me caka kina na valetabanikau me vaka na ka e volai.”
16 Era qai lako yani na lewenivanua mera kauta mai mera cakava kina na nodra valetabanikau, o ira yadua ena dela ni nodra vale, ena nodra raranivale, ena rara ni vale ni Kalou dina,+ ena rara ni Matamata ni Wai,+ kei na rara ni Matamata nei Ifireimi.+
17 O koya gona, era cakava na nodra valetabanikau na ivavakoso taucoko era lesu mai na kau vakavesu mera vakaitikotiko kina, era sega ni cakava va qori na Isireli mai na gauna i Josua+ na luvei Nuni me yacova mai na siga oya, era marau vakalevu kina.+
18 E wiliki tiko na ivola ni Lawa ni Kalou dina+ ena veisiga, mai na imatai ni siga me yacova na iotioti ni siga. Era soqo tiko me vitu na siga, ia e qai vakayacori na soqo bibi ena ikawalu ni siga me vaka e vakaroti.+
iVakamacala e ra
^ Kena vosa vakaIperiu era okati kina na lavetaka na Lawa kei na so na tiki ni iVolatabu. (Raica Ese 7:6)
^ Se “Me yaco mada ga!”
^ Se “ra vakamacalataka na veika e wiliki.”
^ Se “Tiriseica,” na icavuti vakaPerisia ni kovana ena dua na yasana.”
^ Ipe., “ka uro.”
^ Se “vale sega ni tudei.”
