Vola o Marika 9:1-50

Matalia o Jisu (1-13)
Vakabulai na gonetagane e curumi timoni (14-29)
- Sega na ka e dredre vei koya e vakabauta (23)
Tukuni tale na mate nei Jisu (30-32)
Veibataka na tisaipeli se o cei e levu (33-37)
Nodatou ito o koya e sega ni saqati kedatou (38-41)
Veivakatarabetaki (42-48)
“Dou vakamasimataki kemudou” (49, 50)

9 E kaya tale vei ira o Jisu: “Au tukuna vakadodonu vei kemuni, era tiko qo eso era na sega mada ni mate, ia era na raica rawa ni sa veiliutaki na Matanitu ni Kalou.”+ ² Ni oti e ono na siga, e kauti ratou ga o Pita, Jemesa, kei Joni ina dua na ulunivanua cecere o Jisu. E qai matalia na kena irairai e matadratou,+ ³ e ramase na nona isulu e sau qai sekavula. E sega ni dua na dausavaisulu e vuravura me vakavulavulataka rawa e dua na isulu me va ya. ⁴ E rairai tale ga vei ratou o Mosese kei Ilaija ni rau veivosaki tiko kei Jisu. ⁵ E qai tukuna o Pita vei Jisu: “Rapai,* e vinaka dina na nodatou tiko e ke. Me keitou birika mada e tolu na valelaca, e dua me nomuni, dua me nei Mosese, dua me nei Ilaija.” ⁶ E sega ni kila o Pita na cava tale me kaya, ni sa tuburi ratou na rere levu. ⁷ E kumukumuni mai na o qai vakaruguti ratou, mani rogo mai na o e dua na domo:+ “Qo na Luvequ lomani,+ dou rogoci koya.”+ ⁸ Eratou veiraiyaki vakasauri, eratou raici Jisu ga, sega ni dua tale. ⁹ Ni ratou siro mai na ulunivanua, e vakaroti ratou o Jisu me ratou kua sara ni tukuna vua e dua na ka eratou raica,+ me yacova ni vakaturi mai na mate na Luve ni tamata.+ ¹⁰ Eratou taura vakabibi* na nona vosa, ia eratou veivosakitaka vakataki ratou na ibalebale ni vakaturi mai na mate e tukuna tiko. ¹¹ Eratou mani tarogi koya: “Na cava ga era kaya kina na vunivola ni na liu+ mai o Ilaija?”+ ¹² E sauma vei ratou: “E liu dina mai o Ilaija me vakalesuya mai na ka kece,+ ia na cava na ibalebale ni kena volai ena iVolatabu ni na vakararawataki vakalevu+ qai beci na Luve ni tamata?+ ¹³ Ia au tukuna vei kemudou, sa lako oti mai o Ilaija,+ era qai cakava vua na ka ga era vinakata me vaka e volai me baleti koya.”+ ¹⁴ Ni ratou lesu vei ratou na vo ni tisaipeli, eratou raica sara ni wavoliti ratou tu e dua na ilala levu kei ira na vunivola nira veiba tiko kei ratou.+ ¹⁵ Era kurabui na ilala levu ya nira raici Jisu, ra qai cici yani mera kidavaki koya. ¹⁶ E tarogi ira: “Na cava oni veiba tiko kina kei ratou?” ¹⁷ E sauma e dua vei ira: “Qasenivuli, au kauta mai vei kemuni na luvequ tagane ni curumi koya tiko e dua na yalo velavela e galu.+ ¹⁸ Ena gauna e curumi koya kina, e bitalaki koya ina qele, e vuso na gusuna qai dau katibati, oti sa qai malumalumu tu yani. Au kerei ratou nomuni tisaipeli me ratou vakasava na timoni, ia eratou sega ni rawata.” ¹⁹ E kaya vei ira o Jisu: “Isa na itabatamata sega ni yalodina,+ me vakacava na dede ni noqu tiko vata kei kemuni? Me vakacava na dede ni noqu vosoti kemuni? Kauti koya mai vei au.”+ ²⁰ Era kauta sara vua na gonetagane. Ni raici Jisu ga na timoni e cuquraki koya na gone, e lutu ena qele, sa qai veiqiqiyaki voli ni vuso na gusuna. ²¹ E qai tarogi tamana o Jisu: “Sa dede na kena yacovi koya tiko na ka qo?” E sauma: “Io, tekivu ga ni se gone, ²² e dau kolotaki koya vakalevu ina bukawaqa kei na wai me vakamatei koya. Ke oni rawa ni cakava kina e dua na ka, ni lomani keirau, ni vukei keirau.” ²³ E kaya vua o Jisu: “O taroga tiko ‘Ke oni rawa ni cakava’? E sega ni dua na ka e dredre vei koya e vakabauta.”+ ²⁴ E kacivaka yani ena gauna vata ya na tamanigone: “Au vakabauta! Yalovinaka ni vukei au meu vaqaqacotaka tale noqu vakabauta!”+ ²⁵ Ni raica o Jisu nira sa tabili yani e dua tale na ilala levu, e vunauca na yalo velavela: “O iko yalo velavela galu qai didivara, au vakaroti iko mo biuti koya, kua tale ni lesu vua!”+ ²⁶ Oti nona qoqolou kei na nona cuquraki koya tale vakavica, e qai lako tani vua na timoni, mai davo cibaciba yani o gonetagane. Levu era kaya: “Sa mate!” ²⁷ Ia e taura na ligana o Jisu, vakaduri koya cake, mai tucake sara yani o gonetagane. ²⁸ Ni curu i vale o Jisu, eratou tarogi koya lo nona tisaipeli: “Na cava keitou sega ni vakasava rawa kina na timoni ya?”+ ²⁹ E tukuna vei ratou: “Na masu ga ena vakasavi rawa kina na timoni va ya.” ³⁰ Eratou biuta na vanua ya me ratou gole i Kalili, ia e sega ni vinakata o Jisu me dua e kila na nodratou lako. ³¹ E vakavulici ratou nona tisaipeli ni kaya: “Sa vakarau soli na Luve ni tamata ina ligadra na lewenivanua, era na vakamatei koya.+ E dina ni na vakamatei, ena vakaturi ga ena ikatolu ni siga.”+ ³² Ia eratou sega ni kila na ka e tukuna, eratou rere tale ga na tarogi koya. ³³ Eratou mani yaco sara i Kapenaumi. Ni ratou curu i vale, e qai tarogi ratou nona tisaipeli: “Na cava dou veibataka tiko e gaunisala?”+ ³⁴ Eratou veigaluvi, ni ratou veibataka tiko se o cei e levu duadua vei ratou. ³⁵ E dabe, kacivi ratou na le Tinikarua qai kaya: “O koya e via liu me muri duadua, me dauveiqaravi.”+ ³⁶ Sa qai kauta mai e dua na gonelailai mai vakaduri koya ena kedratou maliwa, e mokota qai kaya vei ratou: ³⁷ “O koya e vakaceguya e dua na gonelailai va qo+ ena yacaqu, e vakacegui au, o koya e vakacegui au e sega ni vakacegui au wale ga, e vakacegui koya tale ga e talai au mai.”+ ³⁸ E kaya vua o Joni: “Qasenivuli, keitou raica e dua na tagane ni vakasavi ira voli na timoni ena yacamuni, keitou via tarovi koya ni sega ni dau tomani kedatou.”+ ³⁹ Ia e kaya o Jisu: “Dou kua ni saga mo dou tarovi koya, ni sega ni dua ena cakamana oti ga ena yacaqu me na qai vakasewasewani au tale. ⁴⁰ Ni nodatou ito o koya e sega ni saqati kedatou.+ ⁴¹ Au tukuna vakadodonu vei kemudou, ena vakaicovitaki dina ga+ o koya e solia vei kemudou e dua na bilo wai mo dou gunuva ni dou itokani i Karisito.+ ⁴² Ia o koya e vakatarabetaka e dua vei ira na lalai qo e vakabauti au, e vinaka cake me vesu i domona e dua na vatuniqaqaqi levu e dau dreta na asa, me qai kolotaki i wasawasa.+ ⁴³ “Ke vakatarabetaki iko na ligamu, muduka laivi. E vinaka cake mo bula ni o ligadua, e ca me rua na ligamu mo qai biu i Qiena,* na vanua e sega ni boko rawa kina na buka.+ ⁴⁴ * — ⁴⁵ Ke vakatarabetaki iko na yavamu, muduka laivi. E vinaka cake mo bula ni o yavadua, e ca me rua na yavamu mo qai kolotaki i Qiena.*+ ⁴⁶ * — ⁴⁷ Ke vakatarabetaki iko na matamu, kolotaka tani.+ E vinaka cake mo curu matadua ina Matanitu ni Kalou, e ca me rua na matamu mo qai kolotaki i Qiena,*+ ⁴⁸ na vanua era sega ni mate kina na ulo, e sega ni boko tale ga kina na buka.+ ⁴⁹ “Nira na vakamasimataki ena bukawaqa.+ ⁵⁰ E vinaka na masima, ia ke yali na kena tuituina dou na qai vakatuituinataka tale ena cava?+ Mo dou vakamasimataki kemudou,+ dou veiyaloni tiko ga.”+