Vola o Marika 7:1-37
7 Era soqoni vata yani vei Jisu+ na Farisi kei na so na vunivola era lako mai Jerusalemi.
2 Era raica ni so na tisaipeli i Jisu era kana ni duka tu na ligadra, era sega ni vuluvulu
3 (Ni o ira kece na Jiu kei ira na Farisi, era dau vuluvulu me yaco sara i duruduru ni ligadra ra qai kana, nira muria tiko ga na nodra ivakarau na nodra qase,
4 nira lesu tale ga mai na makete era na sega ni kana, vakavo ke ra sa vakasavasavataki ira. Era muria tale tiko ga e levu na ivakarau makawa me vaka na papitaisotaki ni bilo, na saqa, kei na iyaya kopa.)+
5 Ra mani tarogi koya na Farisi kei na vunivola: “Na cava era sega ni muria kina nomu tisaipeli na nodra ivakavuvuli na qase nira kana ni duka tu ga na ligadra?”+
6 E qai kaya vei ira: “Ni dau veivakaisini! E tukuni kemuni vinaka o Aisea ni vola, ‘O ira qo era vakarokorokotaki au ga ena tebenigusudra, ia na lomadra e yawa sara vei au.+
7 E tawayaga nodra sokaloutaki au, nira vakavulica na ivakaro vakatamata me ivakavuvuli.’+
8 Oni biuta tani na ivunau ni Kalou, oni qai taura matua na ivakavuvuli vakatamata.”+
9 E kaya tale vei ira: “Oni biuta vaqaseqase na ivakaro ni Kalou moni muria tiko ga kina nomuni ivakarau makawa.+
10 Kena ivakaraitaki, a kaya o Mosese, ‘Mo rokovi tamamu kei tinamu,’+ a kaya tale ga: ‘Me vakamatei+ o koya e vosavakacacataka na tamana se tinana.’
11 Ia oni kaya, ‘Ke dua e tukuna vei tamana se tinana: “Na ka e tiko vei au me bau yaga vei kemudrau e sa koripani (kena ibalebale, e sa soli me nona vakatabakidua na Kalou),”’
12 oni sega ni vakatara me cakava e dua na ka vei tamana se tinana.+
13 Ena sala qo oni sa vakatanitaka kina na vosa ni Kalou ni oni vakadewataka tiko ga na nomuni ivakarau makawa.+ E levu tale na ka va qo oni cakava.”+
14 E kacivi ira tale na ilala levu qai kaya vei ira: “Ni rogoci au kece moni kila na ibalebale ni noqu vosa.+
15 E sega ni vakadukadukalitaka na tamata na ka e curu yani i lomana, na ka ga e lako tani mai na loma ni tamata e vakadukadukalitaki koya.”+
16 *——
17 E biuti ira na ilala levu o Jisu, lai curu sara ena dua na vale, ratou sa qai vakatarogi koya na nona tisaipeli me baleta na vosa vakatautauvata.+
18 E kaya vei ratou: “Dou sa lecava tale ga na kena ibalebale me vakataki ira? Dou lecava ni sega ni vakadukadukalitaka na tamata na ka e tiko e tuba qai lako yani i loma,
19 ni ka e lako yani i loma e sega ni curu i lomada, e curu ga i keteda, oti e lako tani yani me benu?” E vakaraitaka o koya ni savasava na kakana kece.
20 E tomana: “E vakadukadukalitaka ga na tamata+ na ka e lako tani mai vua.
21 E vu mai na loma ni tamata+ na vakanananu ca: na veiyacovi tawadodonu,* na butako, na laba,
22 na veibutakoci, na kocokoco, na ivalavala e ca, na lawaki, na ivalavala vakasisila,* na mata e vuvu, na vosavakacaca, na dokadoka, kei na veika sesewa.
23 Na ka ca kece qo e vu mai na loma ni tamata qai vakadukadukalitaki koya.”
24 E biuta na vanua ya qai gole sara ina yasayasa o Taia kei Saitoni.+ E sega ni vinakata me dua e kila ni sa curu ina dua na vale, ia e sega ga ni dro rawa.
25 E rogoca sara na kena itukutuku e dua na marama, e curuma tiko na luvena yalewa lailai na yalo velavela, mani lai tekiduru e yava i Jisu.+
26 E marama ni Kirisi, e vakaitikotiko mai Finaisi e Siria; qai vakamasuti Jisu vakavica me vakasava na timoni e curumi luvena tiko.
27 Ia e kaya vua: “Mera mamau mada e liu na gone, ni sega ni dodonu me soli na kedra madrai na gone vei ira na luvenikoli.”+
28 Ia e sauma na marama: “E dina turaga, na luvenikoli mada ga ena ruku ni teveli era dau kania na tikitiki ni kedra kakana na gone.”
29 E qai kaya vua o Jisu: “Ena vuku ni ka o tukuna qori, lako; sa lako tani na timoni a curuma tu na luvemu yalewa.”+
30 E gole tale i nona vale na marama qo qai raici luvena ni davo toka ena imocemoce, sa lako tani vua na timoni.+
31 Ni biubiu mai na yasayasa o Taia o Jisu, e gole sara ina wasawasa o Kalili ni muria na sala i Saitoni kei na yasayasa o Tikapoli.*+
32 Era qai kauta vua e dua na didivara, e galu tale ga,+ ra qai kerea me tarai koya.
33 E kauti koya vakatikitiki o Jisu mai vei ira na ilala levu. E qai daramaka nona iqaqalo e daligana, ni kasivi oti, sa qai tara na yamena.+
34 E tacake i lomalagi, cegu vinaka, e qai kaya vua: “Efeta,” kena ibalebale, “Mo tadola mai.”
35 E tadola sara na daligana,+ e tasere na yamena, mai vosa yani.
36 E qai vakaroti ira mera kua ni lai tukuna na ka e yaco,+ ia na levu ga ni nona veivakaroti na levu tale ga ni nodra veitukuniyaka.+
37 Dua na ka nodra kurabui,+ era kaya: “E totoka na ka kece e cakava. E bau vakavuna me rogo na didivara, e vosa tale ga na galu.”+
iVakamacala e ra
^ Ena vosa vaKirisi, na por·neiʹa e rabailevu na kena ibalebale. Raica na iVakamacala ni Vosa.
^ Se “na ivalavala vakamadua.” Kirisi, a sel’gei a. Raica na iVakamacala ni Vosa.
^ Se “na Yasayasa ni Koro e Tini.”
