Vola o Marika 2:1-28
2 Oti e vica na siga sa qai curu tale i Kapenaumi, e tete na kena itukutuku ni sa tiko e vale o koya.+
2 Ra baci tabili yani na lewenivanua, e osodrigi na vale bau lai yaco sara i katuba, sa qai tekivu vunautaka vei ira na itukutuku vinaka.+
3 E kau yani vua e dua na paralasi, eratou laveti koya yani e le va na tagane.+
4 Ia eratou sega ni kauti koya rawa vei Jisu ena vukudra na ilala levu, ratou mani basuka na delanivale donuya na vanua e tiko kina o Jisu, ratou qai vakalutulututaka sobu na idavodavo e davo tiko kina na paralasi.
5 Ni raica o Jisu na nodratou vakabauta,+ e kaya vua na paralasi: “Luvequ, sa vosoti na nomu ivalavala ca.”+
6 Era veinanuyaka e lomadra+ na nona vosa o ira na vunivola era dabe tiko e kea:
7 “Na cava e kaya tiko o ka qo? E vosabeca na Kalou! E sega tale ni dua e rawa ni vosota na ivalavala ca, na Kalou duadua ga.”+
8 Ia ni kila o Jisu na ka era veinanuyaka tiko, e qai kaya vei ira: “Na cava oni veinanuyaka tiko kina na ka kece qo e lomamuni?+
9 I vei e rawarawa me tukuni vua na paralasi, ‘Sa vosoti na nomu ivalavala ca,’ se me tukuni, ‘Tucake, taura nomu idavodavo, lako’?
10 Ia moni kila ni tu vua na Luve ni tamata+ na lewa me vosota na ivalavala ca e vuravura—”+ sa qai kaya vua na paralasi:
11 “Au tukuna vei iko, tucake, taura nomu idavodavo, lako i nomu vale.”
12 E tucake sara ga o koya, e taura nona idavodavo, mai taubale yani e matadra. Era kurabui kece, ra qai vakalagilagia na Kalou, era kaya: “Eda se sega ni bau raica e dua na ka va qo.”+
13 Oti ya e lako tale i baravi, era tabili yani na lewenivanua, mani tekivu vakavulici ira o koya.
14 Ni tomana tiko ga nona ilakolako, e raici Livai na luvei Alifio ni dabe tiko ena valenivolavola ni saumi ivakacavacava, mani kaya vua: “Muri au mai.” E tucake, a muri koya sara.+
15 Ni oti ya, sa qai lai kana o Jisu kei ratou na nona tisaipeli ena vale nei Livai. Eratou kanavata kei na levu na daukumuni ivakacavacava kei ira na tamata ivalavala ca, ni levu era sa muri koya voli.+
16 Ia nira raica na nodra vunivola na Farisi ni kanavata tiko o Jisu kei ira na tamata ivalavala ca kei ira na daukumuni ivakacavacava, era kaya vei ratou na nona tisaipeli: “E dau kanavata o koya kei ira na daukumuni ivakacavacava kei ira na tamata ivalavala ca?”
17 Ni rogoca qo o Jisu, e kaya vei ira: “E sega ni yaga na vuniwai vei ira na bula vinaka, e yaga ga vei ira na tauvimate. Au sega ni lako mai meu kacivi ira na yalododonu, meu kacivi ira ga na valavala ca.”+
18 Era dau lolo na tisaipeli i Joni kei ira na Farisi. Era mani tarogi koya eso: “Na cava era lolo kina na tisaipeli i Joni kei na nodra tisaipeli na Farisi, ia era sega ni lolo na nomu tisaipeli?”+
19 E kaya vei ira o Jisu: “Vakacava era na lolo na itokani ni taganevou+ ni se tiko vata kei ira o taganevou? Era na sega ni lolo ni se tiko na taganevou.
20 Ia ena yaco mai na gauna ena kau tani vei ira na taganevou,+ ya na gauna era na qai lolo kina.
21 E sega ni dua e dau cula na tikinisulu vou ena isulu makawa. Ke cakava qori, erau na sega ni veitauri vinaka na isulu makawa kei na tikinisulu vou, ena lai kadresu kina vakalevu.+
22 E sega tale ga ni dua e dau tawana na waini vou ena taganiwaini makawa. Ke cakava qori ena kabote na taganiwaini, ena maumau na waini, ena vakacacani tale ga na taga. Ia e dau tawa ga na waini vou ena taganiwaini vou.”
23 Ni lakova yani eso na loganiwiti ena Siga ni Vakacecegu, eratou mani tauca eso na witi na nona tisaipeli ni ratou lako tiko.+
24 Era qai kaya vua na Farisi: “Raica mada! Na cava eratou cakava kina nomu tisaipeli na ka e vakatabui ena Siga ni Vakacecegu?”
25 Ia e kaya vei ira: “Oni sega ni bau wilika na ka e cakava o Tevita ni viakana kei ratou na nona itokani qai sega vua na kakana?+
26 E vola o Epaiaca+ na iliuliu ni bete, ni a curu o Tevita ina vale ni Kalou qai kania na madrai e vakacabori* vua na Kalou, na madrai era dau kania ga na bete,+ sega tale ni dua, e solia tale ga eso vei ratou na nona itokani me ratou kania.”
27 E qai kaya vei ira: “E vakarautaki na Siga ni Vakacecegu me baleta na tamata,+ e sega ni vakarautaki na tamata me baleta na Siga ni Vakacecegu.
28 O koya gona, na Luve ni tamata e Turaga sara ga ni Siga ni Vakacecegu.”+
iVakamacala e ra
^ Se “na madrai dauraici.”
