Vola o Marika 15:1-47
15 Ni se qai kida ga na mataka, era sa bose vata na lewe ni Sanadrini kece, qo o ira na iliuliu ni bete, o ira na qase, kei ira na vunivola, era vesuki Jisu, era kauti koya qai soli koya vei Pailato.+
2 Mani tarogi koya o Pailato: “O iko na nodra tui na Jiu?”+ E sauma o Jisu: “O sa kaya tiko ga mai qori.”+
3 Ia era beitaki koya na iliuliu ni bete ena levu na ka.
4 E tarogi koya tale o Pailato: “O sega ni sauma rawa ya?+ O sega ni rogoca na levu ni ka era beitaki iko tiko kina?”+
5 E sega ni tukuna tale e dua na ka o Jisu, e kurabui vakalevu kina o Pailato.+
6 E dau nona ivakarau na kovana ena gauna kece ni kanavata ni Lakosivia me sereka e dua na kaivesu era kerea na lewenivanua.+
7 Ena gauna ya e vesu tiko e dua na tagane era dau vakatoka me o Parapa kei na so tale nira saqata na matanitu, era laba tale ga.
8 Era lako yani na lewenivanua mera kerei Pailato me sereka e dua na kaivesu me vaka sa dau cakava tiko mai.
9 E kaya vei ira o Pailato: “Oni vinakata meu sereka yani vei kemuni na nomuni Tui na Jiu?”+
10 Ni kila o Pailato nira soli Jisu yani na iliuliu ni bete ena levu ni nodra vuvu.+
11 Ia era bukani ira na lewenivanua na iliuliu ni bete mera tukuna me sereki o Parapa, sega ni o Jisu.+
12 E kaya tale vei ira o Pailato: “Na cava meu qai cakava vei koya oni vakatoka me nomuni Tui na Jiu?”+
13 Era baci kacivaka: “Me lauvako ena kau!”*+
14 Ia e tarogi ira o Pailato: “Na cava nona cala?” Era kacivaka tiko ga yani: “Me lauvako ena kau!”*+
15 Mani sereki Parapa o Pailato ni via vakamarautaki ira na lewenivanua. Ni warolaki oti o Jisu,+ e soli koya sara me vakamatei ena kau.+
16 Era kauti Jisu na sotia ina rara ni vale ni kovana, ra kacivi ira kece mai na vo ni sotia.+
17 Era qai vakaisulutaki koya ena isulu lokaloka, ra talia e dua na isala wavakavotona ra qai vakaisalataki koya kina,
18 era kailavaka yani vua: “Ni bula vinaka, nodra Tui na Jiu!”+
19 Era mokuta tale ga na uluna ena gasau, ra kasiviti koya, ra qai tekiduru mera cuva vua.*
20 Nira vakalialiai koya oti, era qai luvata na iovi lokaloka ya, ra vakasulumi koya tale ena nona isulu e sau, ra qai kauti koya me lai lauvako ena kau.+
21 Era qai sotavi Saimoni na kai Kirini ni lesu tiko mai na lomanivanua, na tamadrau o Alekisada kei Rufo. Era mani vakaroti koya me colata na kaunirarawa*+ i Jisu.
22 Era kauti Jisu sara ina vanua e vakatokai o Kolikoca, kena ibalebale na “Vanua ni Qavokavoka.”+
23 Era saga mera vagunuva vua na waini e waki vata kei na waigaga ni veivakamatenitaki na mura,+ ia e bese ni gunuva.
24 Nira vakoti koya oti ena kau, era qai wasea na nona isulu e sau ena nodra vakawirimadigi, mera kila kina nodra ivotavota.+
25 Era sa qai vakoti koya ena kau ena ikatolu ni aua.*
26 E volai va qo na ka e beitaki kina: “Na nodra Tui na Jiu.”+
27 Rau lauvako tikivi koya e rua na daubutako, dua ena yasana imatau, dua tale ena yasana imawi.+
28 *——
29 Era vosavakacacataki koya, ra kurekure o ira na tavali,+ era tukuna: “Qori! O kaya sara mo na talaraka na valenisoro o qai tara tale ena tolu na siga,+
30 siro mada mai na kaunirarawa* mo vakabulai iko.”
31 Era vakalialiai koya tale ga va ya na iliuliu ni bete kei ira na vunivola nira kaya: “E lai veivakabulai sara tiko, e sega mada ga ni vakabulai koya rawa!+
32 Meda raica mada ni siro mai na kaunirarawa* na Karisito na nodra Tui na Isireli meda qai vakabauti koya.”+ Rau bau vosavakacacataki koya+ tale ga na tagane erau lauvako tikivi koya.
33 E qai butobuto na vanua taucoko mai na ikaono ni aua* me yacova sara na ikaciwa ni aua.*+
34 Ena ikaciwa ni aua sa qai kaci ena domoilevu o Jisu: “Ilai Ilai lama sabakcani?” e kena ibalebale, “Noqu Kalou, noqu Kalou, na cava oni sa biuti au kina?”+
35 Nira rogoca qori eso era tu e kea, era kaya: “Raica! E kacivi Ilaija tiko o koya.”
36 Mani cici e dua vei ira, taura e dua na vutovuto,* tonia ena waini wiwi, biuta ena mua ni gasau qai solia vei Jisu me gunuva,+ e kaya: “Laivi koya tu mada! Me laurai sara qo se na kauti koya sobu mai o Ilaija se sega.”
37 E kaci tale ena domoilevu o Jisu, sa qai ciba.*+
38 E qai kasei rua na ilati ni valenisoro,+ tekivu sara ga mai cake me yaco i ra.+
39 E dua na turaganivalu a tucake volekati Jisu tiko. Ni raica na veika e yacovi Jisu kei na nona ciba, e kaya: “Qo dina na Luve ni Kalou.”+
40 Era tiko tale ga e kea eso na yalewa, era raica tu mai vakayawa na ka e yaco. Eratou maliwai ira o Meri Makitala, o Meri na tinadrau o Jemesa na Lailai kei Josese, kei Salome,+
41 eratou dau tomani Jisu me ratou vukei koya+ ena so na itavi ni se tiko mai Kalili. Era tiko tale ga e kea e levu na yalewa era lako vata yani kei koya i Jerusalemi.
42 Sa yakavi sara na vanua, e siga ni Vakavakarau tale ga, na siga ni bera na Siga ni Vakacecegu,
43 e qai lako mai o Josefa na kai Arimacea, e dua na turaga nuitaki ena Matabose,* e waraka tale tiko ga na Matanitu ni Kalou. E doudou me kerea na yago i Jisu vei Pailato.+
44 E via kila mada o Pailato se sa mate o Jisu se sega. E qai kaciva na turaganivalu me taroga se sa mate dina o Jisu.
45 Ni sa vakadeitaka vua o turaganivalu, sa qai solia na yago i Jisu vei Josefa.
46 E volia mai o Josefa na lineni matailalai, kauta mai na yago i Jisu, solega ena lineni matailalai ya qai vakadavora ena ibulubulu*+ a taya ena babanivatu. Oti sa qai vaqiqica e dua na vatu ena icurucuru ni ibulubulu.+
47 Erau vakaraica toka ga o Meri Makitala kei Meri na tinai Josese na vanua e vakadavori kina na yago i Jisu.+
iVakamacala e ra
^ Se “Vakoti koya ena kau!”
^ Se “Vakoti koya ena kau!”
^ Se “mera vakarokoroko vua.”
^ Raica na iVakamacala ni Vosa.
^ Oya, rauta na 9 na kaloko ena mataka.
^ Raica na iVakamacala ni Vosa.
^ Raica na iVakamacala ni Vosa.
^ Oya, rauta na 12 na kaloko ena sigalevu.
^ Oya, rauta na 3 na kaloko ena yakavi.
^ E dua na mataqali ka bula ni waitui e malumu, e rawa ni domica na wai.
^ Se “solia na iotioti ni nona icegu.”
^ Se “Sanadrini.”
^ Se “ibulubulu nanumi.”
