Malakai 3:1-18

  • Vakasavasavataka nona valenisoro na Turaga dina (1-5)

    • iTalai ni veiyalayalati (1)

  • Uqeti mera lesu vei Jiova (6-12)

    • Sega ni veisau o Jiova (6)

    • “Lesu mai vei au, au na lesu yani vei kemuni” (7)

    • ‘Moni kauta mai na ikatini kece, ena sovara na veivakalougatataki o Jiova’ (10)

  • Ira na yalododonu kei ira na tamata ca (13-18)

    • Volai ena mata ni Kalou na ivola ni ivakananumi (16)

    • Duidui ni tamata yalododonu kei na tamata ca (18)

3  “Raica! Au sa tala yani na noqu italai ena caramaka* vei au na sala.+ Ena lako totolo mai ina nona valenisoro na Turaga dina oni vaqara tiko,+ ena lako mai na italai ni veiyalayalati oni rekitaka. Raica! Ena lako dina mai o koya,” e kaya o Jiova ni lewe vuqa.*  “Ia o cei ena yalodei ena siga ni nona lako mai, o cei ena tudei rawa ena gauna ena laurai mai kina? Ni na vaka na nona yameyamenibuka na dauveivakasavasavataki o koya, ena vaka tale ga na nodra sovu+ na dausavaisulu.  Ena dabe o koya me vakasavasavataka me samaka na siliva,+ ena vakasavasavataki ira na luvei Livai, ena vakasavasavataki ira me vaka na koula kei na siliva, ena raica sara ga o Jiova me tiko na tamata era cabora na isoro dodonu.  Ena marautaka o Jiova na isoro nei Juta kei Jerusalemi me vaka ga ena veigauna sa oti, me vaka na veiyabaki makawa.+  “Au na toro voleka yani vei kemuni meu lewai kemuni, ena totolo na noqu vakadinadinataka na nodra ca na daucakaisausau,+ o ira na dauveibutakoci, o ira na bubului lasu,+ o ira na lawakitaka na kedra isau na tamata cakacaka,+ o ira na yada, o ira na gone sega na tamadra,*+ kei ira na sega ni via vukei ira na vulagi.*+ Era sega ni dokai au,” e kaya o Jiova ni lewe vuqa.  “O yau o Jiova, au sega ni veisau.+ Ni oni luvei Jekope, oni se sega kina ni rusa.  Tekivu mai na nodra gauna na tukamuni oni vakanadakuya na noqu ivakaro, oni sega ni muria.+ Moni lesu mai vei au, au na lesu yani vei kemuni,”+ e kaya o Jiova ni lewe vuqa. Ia oni kaya: “Me keimami lesu yani vakacava?”  “Ena dua na tamata wale me butakoca na Kalou? Ia o kemuni oni butakoci au tiko.” Oni kaya: “Keimami butakoci kemuni vakacava?” “Ena ikatini kei na cau.  Oni cudruvi sara ga* ni oni butakoci au tiko, io e cakava tiko na lewe taucoko ni matanitu. 10  Moni kauta mai na ikatini kece ina valeniyau,+ me so kina na kakana ena noqu vale,+ moni vakatovolei au mada ena ka qo,” e kaya o Jiova ni lewe vuqa, “moni raica niu na dolava vei kemuni se sega na matamata ni lomalagi,+ meu sova vei kemuni na veivakalougatataki me kua ni dua e leqa ena dua na ka.”+ 11  “Ia au na cudruva na dauvakacaca* ena vukumuni, ena sega ni vakacacana na vua ni nomuni qele, se na tawavua na nomuni vaini,”+ e kaya o Jiova ni lewe vuqa. 12  “Era na tukuna na veimatanitu kece moni marau,+ oni na vanua daurekitaki,” e kaya o Jiova ni lewe vuqa. 13  “Na nomuni vosa e kaukaua vei au,” e kaya o Jiova. Oni kaya: “Keimami vosavakacacataki kemuni vakacava vakataki keimami?”+ 14  “Oni kaya, ‘E sega ni yaga na qarava na Kalou.+ Na cava eda rawata nida qarava tiko na noda itavi vua da qai lako tu ena lomabibi ena mata i Jiova ni lewe vuqa? 15  Ena gauna qo eda tukuna tiko nira marau na tamata viavialevu. Era tikovinaka tale ga na daucaka ca.+ Era vakatovolea vakaca na Kalou, era sega ni leqa kina.’” 16  Era veivosaki ena gauna oya o ira na dokai Jiova, o ira yadua kei na nodra itokani, e vakarorogo tiko qai vakatudaliga o Jiova. E volai e matana e dua na ivola ni ivakananumi me baleti ira+ era dokai* Jiova kei ira era vakananuma* tiko na yacana.+ 17  “Era na noqu,”+ e kaya o Jiova ni lewe vuqa, “ena siga oya au kumuna kina e dua na iyau talei.*+ Au na lomani ira, me vaka ga na tamata e lomana na luvena e qaravi koya tiko.+ 18  Oni na raica tale na kedrau duidui na tamata yalododonu kei na tamata ca,+ o koya e qarava na Kalou kei koya e sega ni qaravi koya.”

iVakamacala e ra

Se “vakarautaka.”
Qo na mataivalu vakalomalagi.
Se “o ira na luveniyali.”
Se “kei ira na bureitaka vua na ka e dodonu me nona.”
Se rawa ni, “Ena vosavakacaca oni rulaki au.”
Rairai dusia na manumanu lailai dauveivakarusai.
Ipe., “rerevaki.”
Se “vakasamataka.” Se rawa ni, “vakamareqeta.”
Se “na ivotavota vakamareqeti.”