Lako Yani 9:1-35
9 E mani kaya vei Mosese o Jiova: “Lako yani vei Fero qai kaya vua, ‘Qo na ka e kaya o Jiova na nodra Kalou na Iperiu: “Laivi ira na noqu tamata mera lako mera lai qaravi au.+
2 Ia ke o bese ni laivi ira mera lako, o qai tarovi ira tiko ga,
3 raica! Ena tara na nomu manumanu ena vanua na liga i+ Jiova. Ena veitauvi e dua na matedewa rerevaki+ vei ira na ose, na asa, na kameli, na bulumakau, kei na sipi.
4 Ena vakaraitaka sara ga o Jiova nira duatani na manumanu ni Isireli mai na manumanu ni Ijipita, ena sega ni mate e dua na ka era taukena na Isireli.”’”+
5 Kena ikuri, e qai lokuca na kena gauna o Jiova ni kaya: “Nimataka ena cakava na ka qo o Jiova ena vanua.”
6 E qai cakava sara ga qori o Jiova ena siga tarava, ra qai tekivu mate na veimataqali manumanu kece ni Ijipita,+ ia e sega ni mate e dua na nodra manumanu na Isireli.
7 Ni vakataroga mai o Fero, raica! a sega ni bau dua na nodra manumanu na Isireli e mate. Ia, se sega tiko ga ni kauai na loma i Fero, qai sega ni laivi ira na tamata mera lako.+
8 E tukuna sara o Jiova vei Mosese kei Eroni: “Vakasinaita ruarua na ligamudrau ena dravusa mai na dua na lovo, me qai kaburaka i macawa o Mosese ena mata i Fero.
9 Ena vuki me pauta ena vanua kece o Ijipita, ena qai vuki me bo vuvuca vei ira na tamata kei na manumanu ena vanua taucoko o Ijipita.”
10 Erau mani kauta na dravusa mai na dua na lovo rau lai tu sara ena mata i Fero, e qai kaburaka i macawa o Mosese, mani vuki me bo vuvuca vei ira na tamata kei na manumanu.
11 Era sega ni qai tu rawa ena mata i Mosese o ira na bete daucakaiba ena vuku ni bo, ni sa tauvi ira tu na bete daucakaiba kei ira na kai Ijipita taucoko.+
12 Ia e vakalaiva o Jiova me kaukaua na loma i Fero, e sega kina ni vakarorogo vei rau, me vaka ga e tukuna o Jiova vei Mosese.+
13 E kaya o Jiova vei Mosese: “Yadra vakatotolo ena mataka qai lai duri ena mata i Fero, oti mo tukuna vua, ‘Qo na ka e kaya o Jiova na nodra Kalou na Iperiu: “Laivi ira na noqu tamata mera lako mera lai qaravi au.
14 Niu sa na vagolea qo na noqu kuita kece me tau e lomamu, vei ira nomu dauveiqaravi, kei ira na nomu tamata, mo kila kina ni sega tale ni dua e vakataki au ena vuravura taucoko.+
15 Ena gauna qo, keu sa dodoka yani na ligaqu meu mokuti iko kei ira na nomu tamata ena dua na matedewa rerevaki, o na qai kawaboko* mai vuravura.
16 Ia qo na vuna au se vakabulai iko tiko kina: meu vakaraitaka vei iko na noqu kaukaua, me vakatakilai tale ga na yacaqu e vuravura taucoko.+
17 Vakacava, se qaciqacia voli ga na nomu itovo vei ira na noqu tamata ni o sega ni laivi ira mera lako?
18 Au na vakatauca mai na ucaqereqere vakarerevaki ena gauna va qo nimataka, na kena mataqali e se sega ni bau tau vakadua e Ijipita mai na siga a tauyavu kina me yacova mai qo.
19 Mo vakau itukutuku gona mera kau kece mai na nomu manumanu kei na ka kece e nomu ena were mera mai vakaruru. Ena gauna e lulutu mai kina na ucaqereqere, ena mate na tamata kei na manumanu kece ga e donuya ena vanua qai sega ni kau mai e loma ni vale.”’”
20 O koya ga vei ira na dauveiqaravi i Fero e rerevaka na vosa i Jiova e kusa yani me kauti ira mai na nona tamata kei na nona manumanu i vale,
21 ia o koya e sega ni kauai na lomana ena vosa i Jiova, e laivi ira tu ga na nona tamata kei na nona manumanu ena were.
22 E kaya vei Mosese o Jiova: “Dodoka yani i lomalagi na ligamu, me tau mai na ucaqereqere ena vanua taucoko o Ijipita,+ vei ira na tamata kei na manumanu, kei na kau kece ena were ena vanua taucoko o Ijipita.”+
23 E dodoka yani i lomalagi o Mosese na nona ititoko, qai tala mai o Jiova na kurukuru kei na ucaqereqere, e lulutu sobu i vuravura na bukawaqa,* e qai vakatauca tiko ga o Jiova na ucaqereqere ena vanua taucoko o Ijipita.
24 E tau mai na ucaqereqere qai waqa tiko ga na buka ena maliwa ni ucaqereqere. E bi sara ga, e se sega vakadua ni yaco e dua na ka va qori ena vanua o Ijipita mai na gauna e matanitu kina.+
25 E lutuka na vanua taucoko o Ijipita na ucaqereqere. E lutuka na ka kece ga, mai na tamata yaco sara ina manumanu, e vakacacana kece tale ga na kau, qai yamaraka kece na veimataqali vunikau ena vanua.+
26 Ena vanua duadua ga o Koseni, era tu kina na Isireli, e sega kina na ucaqereqere.+
27 E mani talatala o Fero vei Mosese kei Eroni, e kaya vei rau: “Au sa valavala ca qo. E yalododonu o Jiova, ia o yau kei ira na noqu tamata keimami sa cala.
28 Vakamamasu vei Jiova me bau oti kina na kurukuru kei na ucaqereqere. Au na qai yalorawarawa meu laivi kemuni moni lako, oni na sega ni tiko tale.”
29 E mani kaya vua o Mosese: “Ena gauna ga au biubiu kina mai na koro au na dodoka yani na ligaqu ena mata i Jiova. Sa na cegu na kurukuru, sa na sega ni tau tale tiko na ucaqereqere, moni kila kina ni nei Jiova o vuravura.+
30 Ia vei kemuni kei ira na nomuni dauveiqaravi, au sa kila rawa tu qo ni oni na sega ni rerevaka na Kalou o Jiova ena gauna mada ga oya.”
31 Sa vakacacani tu na feleki* kei na varile, ni se qai matua na varile, sa seraka tale tu ga na se ni feleki.
32 Ia na witi* e sega ni vakacacani, ni bera toka na kena matua ena gauna oya.
33 E lako tani mai vei Fero o Mosese, e biuta na koro, qai dodoka yani na ligana ena mata i Jiova, sa qai cegu na kurukuru kei na ucaqereqere, sa oti tale ga na tau ni uca e vuravura.+
34 Ni raica o Fero ni sa cegu na uca, na ucaqereqere, kei na kurukuru, e valavala ca tale qai vakaukauataka na lomana,+ o koya kei ira na nona dauveiqaravi.
35 E kaukaua tiko ga na loma i Fero, e sega ni laivi ira na Isireli mera lako, me vaka ga e tukuna o Jiova ena gusu i Mosese.+
iVakamacala e ra
^ Se “qeavu.”
^ De dusia tiko na kaukaua ni tibi ni liva.
^ E dua na kau e tei e Ijipita me caka kina na isululineni.
^ Ipe., “na witi kei na sipeleti.” Na sipeleti e dua na mataqali witi e dau tei e Ijipita makawa, e sega soti ni witi vinaka.
