Lako Yani 8:1-32
8 E kaya vei Mosese o Jiova: “Lako yani vei Fero qai tukuna vua, ‘Qo na ka e kaya o Jiova: “Laivi ira na noqu tamata mera lako mera lai qaravi au.+
2 Ke o bese tiko ga ni laivi ira mera lako, au na totogitaka na nomu yasana kece ena boto.+
3 Ena vakasinaita na Uciwai na Naile na boto, era na cabe mai ra qai curuma na nomu vale, na nomu rumu, na nomu loga, curuma na nodra vale na nomu dauveiqaravi, na nomu tamata, curuma na nomu ovani, kei na nomu boulu ni balibali.+
4 Era na lakovi iko na boto, na nomu tamata, kei ira kece na nomu dauveiqaravi.”’”
5 Sa qai kaya vei Mosese o Jiova: “Tukuna vei Eroni, ‘Dodoka yani na ligamu kei na nomu ititoko i uciwai, ena ikelimusu ni Naile, kei na vanua lolobo, mera cabe yani na boto ena dela ni vanua o Ijipita.’”
6 E mani dodoka yani na ligana o Eroni ina wai kece e Ijipita, era tekivu lako cake mai na boto ra qai robota na vanua o Ijipita.
7 Ia era cakava na ka vata ga oya na bete daucakaiba nira vakayagataka na nodra kaukaua vuni, era cakava mera lako cake tale ga mai na boto ena dela ni vanua o Ijipita.+
8 E mani kacivi Mosese kei Eroni o Fero qai kaya: “Vakamamasu vei Jiova me kauta laivi vei au na boto, vei ira tale ga na noqu tamata,+ niu sa via laivi ira na tamata mera lako yani mera lai vakacaboisoro vei Jiova.”
9 E kaya vei Fero o Mosese: “Au laiva vei kemuni na itavi dokai moni tukuna vei au na gauna cava meu vakamamasu kina mera kau laivi vei kemuni na boto, vei ira na nomuni dauveiqaravi, na nomuni tamata kei na nomuni vale. Era na qai vo tu ga ena Uciwai na Naile.”
10 E mani tukuna o koya: “Nimataka.” Sa qai kaya o koya: “Ena yaco me vaka na nomuni vosa, moni kila kina ni sega ni dua tale e vakataki Jiova na neimami Kalou.+
11 Na boto kece era na lako laivi mai vei kemuni, na nomuni vale, mai vei ira na nomuni dauveiqaravi, kei ira na nomuni tamata. Era na qai vo tu ga ena Naile.”+
12 Erau mani lako tani mai vei Fero o Mosese kei Eroni, sa qai vakamamasu vei Jiova o Mosese me baleta na boto e kauta yani o koya vei Fero.+
13 E qai cakava o Jiova na ka a kerea o Mosese, era tekivu mate sara na boto ena veivale, ena veirara ni vale, ena were tale ga.
14 Era mani binibinia qai sega ni wili rawa na kedra ibinibini, sa qai tekivu bona na vanua.
15 Ni sa kunea o Fero na vakacegu, sa qai vakaukauataka o koya na lomana,+ e bese kina ni vakarorogo vei rau, me vaka ga e tukuna o Jiova.
16 E qai kaya o Jiova vei Mosese: “Tukuna vei Eroni, ‘Dodoka yani na nomu ititoko qai samuta na kuvuniqele, me basika kina na nana ena vanua taucoko o Ijipita.’”
17 Erau sa qai cakava qori. E dodoka yani o Eroni na ligana kei na nona ititoko qai samuta na kuvuniqele, ra qai sosova na tamata kei na manumanu na nana. E vuki me nana na kuvuniqele kece ena vanua taucoko o Ijipita.+
18 Era saga na bete daucakaiba mera cakava na ka vata ga oya, mera basika mai na nana nira vakayagataka nodra kaukaua vuni,+ ia era sega ni rawata. Era qai sosova yani na tamata kei na manumanu na nana.
19 Era mani kaya vei Fero o ira na bete daucakaiba: “Qo sara ga na iqaqaloniliga ni Kalou!”+ Ia e kaukaua tiko ga na loma i Fero, e sega ni vakarorogo, me vaka ga e tukuna o Jiova.
20 E qai kaya vei Mosese o Jiova: “Yadra vakatotolo ena mataka qai lai duri ena mata i Fero. Raica! Ena lako yani i wai o koya! Mo qai kaya vua, ‘Qo na ka e tukuna o Jiova: “Laivi ira na noqu tamata mera lako mera lai qaravi au.
21 Ke o sega ni laivi ira na noqu tamata mera lako, au na tala yani vei iko na lago dau gunu dra,* vei ira na nomu dauveiqaravi, vei ira na nomu tamata, kei na nomu vale, na vale kece e Ijipita ena sinai ena lago dau gunu dra, ena robota tale ga na qele era* butuka tu.
22 Ena siga oya, au na wasea tani sara ga na vanua o Koseni era tiko kina na noqu tamata. Ena sega ni bula e kea e dua na lago dau gunu dra,+ ena ka qo o na kila kina ni o yau, o Jiova, au tiko qo ena vanua.+
23 Au na vakaraitaka nira duidui na noqu tamata kei na nomu tamata. Ena yaco na ivakatakilakila qo nimataka.”’”
24 E qai cakava qori o Jiova, era tekivu sosova yani na qelenilago dau gunu dra na vale i Fero, na nodra vale na nona dauveiqaravi, kei na vanua kece o Ijipita.+ Era vakacaca ena vanua na lago dau gunu dra.+
25 Kena itinitini, e kacivi Mosese kei Eroni o Fero qai kaya: “Lako, ni lai vakacaboisoro vua na nomuni Kalou ena vanua.”
26 Ia e tukuna o Mosese: “E sega ni vinaka me caka qori, ni ka keimami na cabora vei Jiova na neimami Kalou era dau sevaka na kai Ijipita.+ Ke keimami cabora e matadra na kai Ijipita e dua na ka era sevaka, vakaevei era na sega ni vakaviriki keimami ena vatu?
27 Keimami na gole ena ilakolako siga tolu ina vanua talasiga, keimami na qai vakacaboisoro e kea vei Jiova na neimami Kalou, me vaka ga na ka sa tukuna vei keimami.”+
28 E qai tukuna o Fero: “Au na laivi kemuni moni lai vakacaboisoro vei Jiova na nomuni Kalou ena vanua talasiga. Moni kua ga ni lako sara vakayawa. Lai vakamamasu ena vukuqu.”+
29 E kaya o Mosese: “Au sa na biuti kemuni qo, au na lai vakamamasu vei Jiova, era na qai gole tani vei Fero na lago dau gunu dra, vei ira na nona dauveiqaravi, kei ira na nona tamata nimataka. O Fero ga me kua ni lasutaki* keimami voli, ni bese tiko ni laivi keimami me keimami lai vakacaboisoro vei Jiova.”+
30 E lako tani mai vei Fero o Mosese qai vakamamasu vei Jiova.+
31 E qai cakava o Jiova me vaka na vosa i Mosese, ra qai lako tani mai vei Fero na lago dau gunu dra, vei ira tale ga na nona dauveiqaravi, kei na nona tamata. Sega tale ni dua e vo.
32 Ia e vakaukauataka tale na lomana o Fero qai sega ni laivi ira na tamata mera lako.
iVakamacala e ra
^ Dua na mataqali lago e dau veikati.
^ Oya o ira na kai Ijipita.
^ Se “ni lawakitaki.”
