Lako Yani 7:1-25
7 E qai kaya vei Mosese o Jiova: “Raica, au sa cakava mo vaka na Kalou* vei Fero, ia ena nomu parofita o Eroni na tuakamu.+
2 Mo lai tukuna na ka kece au na vakarota vei iko, ia ena vosa vei Fero o Eroni na tuakamu, ena qai laivi ira na Isireli o koya mera lako tani mai na nona vanua.
3 Ia o yau, au na vakalaiva me kaukaua na loma i Fero,+ au na qai vakalevutaka na noqu ivakatakilakila kei na noqu cakamana ena vanua o Ijipita.+
4 Ia ena sega ni rogoci kemudrau o Fero, au na qai tarai Ijipita ena ligaqu meu kauti ira mai na noqu ilawalawa levu,* na noqu tamata, na Isireli, mai na vanua o Ijipita kei na itotogi lelevu.+
5 Era na qai kila sara ga na kai Ijipita ni o yau o Jiova+ ena gauna au dodoka yani kina na ligaqu vei Ijipita, qai kauti ira tani na Isireli mai na kedra maliwa.”
6 Erau qai cakava o Mosese kei Eroni na ka e vakarota vei rau o Jiova, erau cakava sara ga na ka e tukuni vei rau.
7 E yabaki 80 o Mosese, qai yabaki 83 o Eroni ena gauna rau vosa kina vei Fero.+
8 E qai tukuna vei Mosese kei Eroni o Jiova:
9 “Ke mani kaya vei kemudrau o Fero, ‘Drau cakava e dua na cakamana,’ tukuna sara vei Eroni, ‘Taura na nomu ititoko qai viritaka i ra ena mata i Fero.’ Ena qai vuki me gata levu.”+
10 Erau lako gona vei Fero o Mosese kei Eroni, rau qai cakava sara ga na ka e vakarota o Jiova. E viritaka i ra o Eroni na nona ititoko ena mata i Fero kei ira na nona dauveiqaravi, e qai vuki na ititoko me gata levu.
11 Ia e vakarota o Fero mera lako yani vua na nona tamata vuku kei ira na daucakaisausau, era sa qai cakava na bete daucakaiba kei Ijipita+ na ka vata ga oya ena nodra cakaiba.+
12 Era dui viritaka i ra na nodra ititoko, ra qai vuki mera gata lelevu, ia na ititoko i Eroni e qai tiloma na nodra ititoko.
13 Ia se kaukaua ga na loma i Fero,+ e sega ni rogoci rau, me vaka ga na ka e tukuna o Jiova.
14 E qai kaya vei Mosese o Jiova: “E sega ni kauai na loma i Fero.+ E bese ni laivi ira na tamata mera lako.
15 Lako vei Fero ena mataka. Raica! Ena lako yani i wai o koya! Mo lai duri tu mo tavaki koya ena batiniuciwai na Naile, qai kauta tiko e ligamu na ititoko a vuki me gata.+
16 Mo kaya vua, ‘O Jiova na nodra Kalou na Iperiu e talai au mai vei iko,+ e kaya o koya: “Laivi ira na noqu tamata mera lai qaravi au ena vanua talasiga,” ia o se sega ni talairawarawa me yacova mai qo.
17 Qo na ka e kaya o Jiova: “Ena ka qo o na kila kina ni o yau o Jiova.+ Au na samuta qo na wai ena Uciwai na Naile ena ititoko e tu e ligaqu, ena qai vuki me dra.
18 Era na mate na ika ena Naile, ena qai bona na Naile, era na sega tale ga ni gunuva rawa na kai Ijipita na wai mai na Naile.”’”
19 E qai tukuna vei Mosese o Jiova: “Kaya vei Eroni, ‘Taura nomu ititoko qai dodoka yani na ligamu ena dela ni wai e Ijipita,+ ina kena uciwai, ina kena ikelimusu,* ina kena veivanua lolobo,+ kei na kena baniwai kece, mera vuki me dra.’ Ena qai tu na dra ena vanua taucoko o Ijipita, bau wili kina na wai ena kena itawatawa kau kei na itawatawa vatu.”
20 Erau cakava sara o Mosese kei Eroni na ka e vakarota o Jiova. E laveta na ititoko qai samuta na wai ena Uciwai na Naile e mata i Fero kei ira na nona dauveiqaravi, qai vuki me dra na wai kece ena uciwai.+
21 Era mani mate na ika ena uciwai,+ e tekivu bona na uciwai ra qai sega ni gunuva rawa na kai Ijipita na wai mai na Naile,+ sa qai robota tu na vanua o Ijipita na dra.
22 Ia era cakava na ka vata ga oya na bete daucakaiba ni Ijipita nira vakayagataka na nodra kaukaua vuni,+ e mani kaukaua tiko ga na loma i Fero, qai sega ni rogoci rau, me vaka ga na ka e tukuna o Jiova.+
23 E qai lesu o Fero i nona vale, ia e sega ni bau tara na lomana na ka qo.
24 Era qai kelikeli wavokita na Naile na kai Ijipita kece mera vaqara wai ni gunu, nira sega ni gunuva rawa na wai mai na Naile.
25 E vitu taucoko na siga mai na gauna e samuta kina na Naile o Jiova.
iVakamacala e ra
^ Ipe., “cakava mo Kalou.”
^ Ipe., “ira na noqu mataivalu.”
^ Oya na ikelimusu mai na Naile.
