Lako Yani 30:1-38
30 “Mo cakava ena kau na akasia+ e dua na icabocabo me vakamai kina na ka boivinaka.+
2 Me sukuea,* me dua na kiupiti* na kena balavu, dua na kiupiti na kena raba, qai rua na kiupiti na kena cere. Me caka vata kei na kena ileu.+
3 Mo ubia ena koula dina: na delana, na dagona kece e wavolita, kei na kena ileu, mo qai cakava na iukuuku koula me wavokita na batibatina.
4 Mo cakava tale ga me rau yarua na rigi koula na ruku ni batibatina ena rua na yasana erau veibasai, me taura na ivua me dau kau kina.
5 Cakava mai na kau na akasia na kena ivua, qai ubia ena koula.
6 Mo biuta qori ena mata ni ilatilati volekata na kato ni iVakadinadina,+ ena mata ni isogo ni iVakadinadina, na vanua au na vakaraitaki au kina vei iko.+
7 “Ena vakama e kea+ na ka boivinaka+ o Eroni,+ me kubou kina ena dela ni icabocabo, ni vakarautaka tiko na cina+ ena veimataka.
8 Ni dau waqara na cina o Eroni ni sa karobo,* ena vakama na ka boivinaka. E ka boivinaka me dau cabori ena mata i Jiova ena nomuni itabatamata kece.
9 Moni kua ni cabora kina na ka boivinaka+ e sega ni vakadonui, se isoro kama se isoro kakana, moni kua tale ga ni livia kina na isoro livi.
10 Me dau cakava vakadua ena veiyabaki+ o Eroni na veibuluti ena dela ni kena ileu. Ena cakava na kena veibuluti o koya ena dra ni isoro ni ivalavala ca ni veibuluti,+ me vakadua ena veiyabaki ena nomuni veitabatamata. E ka tabu sara vei Jiova.”
11 E qai kaya vei Mosese o Jiova:
12 “Ni o dau wili lewenivanua o qai wiliki ira na luvei Isireli,+ me solia na tamata yadua na ivoli ni nona bula vei Jiova ena gauna ni wili lewenivanua. Me kua kina ni tau vei ira e dua na kuita ena gauna era volayacataki kina.
13 Qo na ka mera solia o ira kece era volai: me veimama na sikeli,* ena ivakarau tudei ni sikeli ni vanua tabu.*+ E 20 na kera* e tautauvata kei na dua na sikeli. Me cau vei Jiova e veimama na sikeli.+
14 Ena solia na cau vei Jiova o ira kece era volayacataki mai na yabaki 20 lako cake.+
15 Me kua ni sivia na ka era solia na vutuniyau, me kua tale ga ni lailai na ka era solia na dravudravua mai na veimama na sikeli* me cau vei Jiova me sorovaki kina na nomuni bula.
16 Mo taura mai vei ira na Isireli na ilavo siliva ni veisorovaki, mo qai solia ena vuku ni veiqaravi ena valelaca ni veitavaki, me ivakananumi ena mata i Jiova ena vukudra na Isireli, me isoro ni nomuni bula.”
17 E vosa tale vei Mosese o Jiova, e kaya:
18 “Cakava e dua na beseni kopa kei na kena itutu me ka ni sasavui,+ biuta sara ena tadrua ni valelaca ni veitavaki kei na icabocabonisoro qai vakatawana ena wai.+
19 Ena savata kina o Eroni kei ratou na luvena tagane na ligadratou kei na yavadratou.+
20 Ni ratou curu yani ina valelaca ni veitavaki, se ni ratou torova na icabocabonisoro me ratou veiqaravi qai vakacaboisoro ena bukawaqa kei na kubou vei Jiova, eratou na sasavui ena wai me ratou kua kina ni mate.
21 Me ratou savata na ligadratou kei na yavadratou me ratou kua kina ni mate, qo me ivakaro tudei vei ratou, vei koya kei ira na nona kawa, ena nodratou itabatamata kece.”+
22 E kaya tale vei Mosese o Jiova:
23 “Oti, mo qai taura mai na isaluaki talei: 500 na ivakarau na drega ni mura, me veimama ni ivakarau qori na sinamoni kamica, me 250 na ivakarau, 250 na ivakarau na kalamo* kamica,
24 qai 500 na ivakarau na kasia, mera vakarautaki ena ivakarau tudei ni sikeli ena vanua tabu,*+ kei na dua na hini* na waiwai olive.
25 Me qai caka mai kina na waiwai tabu ni veilumuti, me waki vata vakamaqosa.*+ Qo me waiwai tabu ni veilumuti.
26 “Mo lumuta kina na valelaca ni veitavaki+ kei na kato ni iVakadinadina,
27 na teveli tale ga kei na kena iyaya kece, na itutu ni cina kei na kena iyaya, na icabocabo ni ka boivinaka,
28 na icabocabo ni isoro kama kei na kena iyaya kece, na beseni kei na kena itutu.
29 Mo vakatabuya mera ka tabu sara.+ O koya e tara e dodonu me savasava.+
30 O na lumuti Eroni+ tale ga kei ratou na luvena tagane,+ qai vakatabui ratou me ratou veiqaravi vakabete vei au.+
31 “O na vosa vei ira na Isireli, qai kaya, ‘Qo me dau noqu waiwai tabu ni veilumuti ena nomuni itabatamata kece ga.+
32 Me kua ni vakayagataki ena yago ni tamata, moni kua tale ga ni cakava e dua me tautauvata na kedrau iwakiwaki. Qo e ka tabu. Me ka tabu tiko ga vei kemuni.
33 O koya e cakava e dua na waiwai va qori, qai biuta eso vua e dua e sega ni vakadonui,* me muduki laivi* vei ira na nona tamata.’”+
34 E qai kaya vei Mosese o Jiova: “Me tautauvata na ivakarau ni ka boivinaka mo taura mai:+ na drega ni sitakite, na onika, na kalipeno boi kamica kei na drega dina e boivinaka.
35 Cakava kina e dua na ka boivinaka e dau vakamai,+ e waki vata kina vakamaqosa* na isaluaki, e vakamasimataki,+ e savasava qai tabu.
36 Mo vutuka eso me pauta matailalai, qai biuta eso ena mata ni iVakadinadina ena valelaca ni veitavaki, ena tikina au na vakaraitaki au kina vei iko. Me ka tabu sara vei kemuni.
37 Mo kua ni cakava me nomu na ka boivinaka e dau vakamai o cakava mai na ka era waki vata.+ Mo raica me ka tabu vei Jiova.
38 O koya e cakava e dua na ka va qo me boica, me muduki laivi* vei ira na nona tamata.”
iVakamacala e ra
^ Tautauvata na balavu ni yasana kece.
^ Ipe., “maliwa ni rua na yakavi.”
^ Se “ni sikeli tabu.”
^ E kau boi. Ena vosa vakavalagi, “calamus.”
^ Se “ni sikeli tabu.”
^ Se “me vaka na cakacaka ni dua na daucaka ilumu.”
^ Ipe., “vulagi,” oya dua e sega ni kawa i Eroni.
^ Se “vakamatei.”
^ Se “me vaka na cakacaka ni dua na daucaka ilumu.”
^ Se “vakamatei.”
