Lako Yani 19:1-25
19 Ena ikatolu ni vula nira sa biuta na vanua o Ijipita na Isireli, ena siga vata ga oya, era yaco ena vanua talasiga kei Saineai.
2 Era biubiu mai Rifitimi+ ra yaco sara ena vanua talasiga kei Saineai, ra qai keba ena vanua talasiga. Era keba i kea na Isireli, donuya na ulunivanua.+
3 E qai cabe yani o Mosese vua na Kalou dina, e kacivi koya sara o Jiova mai na ulunivanua,+ e kaya: “Qo na ka mo kaya ina mataqali i Jekope, qai tukuna vei ira na Isireli,
4 ‘Oni raica sara ga na ka au cakava vei ira na kai Ijipita,+ meu tabei kemuni kina ena taba ni ikeli, qai kauti kemuni mai vei au.+
5 Ke oni vakarorogo vinaka ina domoqu qai dei ena noqu veiyalayalati, oni na yaco dina moni noqu iyau talei mai na veimatatamata kece,+ ni noqu o vuravura taucoko.+
6 Oni na yaco moni matanitu bete qai matanitu tabu vei au.’+ Qo na vosa mo tukuna vei ira na Isireli.”
7 E mani lako yani o Mosese qai kacivi ira na qase ni Isireli, e tukuna vei ira na vosa kece e vakarota vua o Jiova.+
8 Oti oya era sauma ena lomavata na tamata kece: “Keimami na yalorawarawa ni cakava na ka kece e tukuna o Jiova.”+ E lesu sara vei Jiova o Mosese me lai tukuna na nodra vosa na tamata.
9 E qai kaya vei Mosese o Jiova: “Raica! Au na lako yani vei iko ena o loaloa, mera rogoca kina na tamata niu vosa vei iko, me rawa nira vakabauti iko tiko ga.” E qai tukuna vei Jiova o Mosese na nodra vosa na tamata.
10 E kaya sara vei Mosese o Jiova: “Lako vei ira na tamata, vakasavasavataki ira nikua, nimataka tale ga, mera savata na nodra isulu.
11 Mera qai vakarau tu ena vuku ni ikatolu ni siga, baleta ena ikatolu ni siga ena lako sobu mai o Jiova ena Ulu i Saineai ena matadra na tamata kece.
12 Mo biuta wavolita na iyalayala vei ira na tamata qai kaya vei ira, ‘Qarauna me kua ni cabeti na ulunivanua se tarai na kena iyalayala. O koya ga e tara na ulunivanua ena vakamatei dina.
13 Me kua ni dua na liga e tarai koya, ke sega ni vakaviriki ena vatu, ena lauvana* o koya. Se mani manumanu se tamata ena sega ni bula.’+ Ia era na rawa ga ni cabe mai ena ulunivanua ni rogo na davui.”*+
14 E qai siro mai na ulunivanua o Mosese me lako vei ira na tamata, e tekivu vakasavasavataki ira, ra qai savata na nodra isulu.+
15 E kaya vei ira na tamata o koya: “Ni vakarau tiko ena vuku ni ikatolu ni siga. Ni kua ni veiyacovi.”*
16 Ena mataka ni ikatolu ni siga, e kurukuru qai veitibiyaki na liva, e solega na ulunivanua na o vavaku,+ qai rogo levu mai na domo ni davui, era tekivu sautaninini na tamata kece ena keba.+
17 E kauti ira tani na tamata mai na keba o Mosese mera tavaka na Kalou dina, ra qai lai tu ena nodra tikina ena ruku ni ulunivanua.
18 E qai kubou taucoko tu na Ulu i Saineai, ni lako sobu mai kina o Jiova ena bukawaqa,+ ia na kena kubou e lako cake tiko ga vaka na kubou ni lovo, qai sakure vakalevu na ulunivanua taucoko.+
19 Ni toso cake tiko ga na rogo levu ni davui, e vosa o Mosese, qai rogo mai na domo ni Kalou dina.
20 E lako sobu mai o Jiova ena Ulu i Saineai me mai tu ena dela ni ulunivanua. Sa qai kacivi Mosese o Jiova me cabe yani ina dela ni ulunivanua, e cabe sara o Mosese.+
21 E qai kaya vei Mosese o Jiova: “Lako sobu, vakasalataki ira na tamata mera kua ni via sugulaki ira yani mera raici Jiova, de qai mate e levu vei ira.
22 Mera vakasavasavataki ira tale ga na bete era dau toro volekati Jiova, me kua gona ni totogitaki ira o Jiova.”+
23 E qai tukuna vei Jiova o Mosese: “Era sega ni cabe rawa mai ina Ulu i Saineai o ira na tamata, ni oni sa vakasalataki keimami oti kina, ena nomuni kaya, ‘Biuta wavolita na iyalayala ena ulunivanua qai vakatabuya.’”+
24 Ia e kaya vua o Jiova: “Lako, siro sobu, oti mo cabe tale mai, o iko kei Eroni, ia mo kua ni laivi ira na bete kei ira na tamata mera sugulaki ira mera cabe mai vei Jiova, me kua ni totogitaki ira kina o koya.”+
25 E siro sara o Mosese vei ira na tamata qai tukuna vei ira.
iVakamacala e ra
^ Ipe., “ileu ni tamanisipi.”
^ De dua e lauvana ena dakaititi.
^ Ipe., “Kua ni torova e dua na yalewa.”
