Lako Yani 18:1-27
18 Ia o Jecoro na bete ni Mitiani, na vugoi Mosese,+ e rogoca na ka kece e cakava na Kalou ena vuku i Mosese kei ira na nona tamata na Isireli, na sala e kauti ira tani kina mai Ijipita na Isireli o Jiova.+
2 O Jecoro na vugoi Mosese e maroroi Sipora na wati Mosese, ni a talai lesu vua,
3 kei rau na luvena tagane.+ E dua na luvena tagane na yacana o Kerisomi,*+ baleta e tukuna o Mosese, “au sa mai vulagi tu e vanuatani,”
4 qai dua tale na yacana o Eliesa,* ni kaya o koya, “E dau vukei au na Kalou i tamaqu, e vakabulai au mai na iseleiwau i Fero.”+
5 Eratou qai lako yani o Jecoro na vugoi Mosese, rau na luvei Mosese tagane kei watina, vei Mosese ena vanua talasiga, na vanua e keba toka kina ena ulunivanua ni Kalou dina.+
6 E qai vakauitukutuku vei Mosese: “O yau o Jecoro na vugomu,+ keitou sa lako tiko yani kei watimu kei rau na luvemu tagane.”
7 E lako sara yani i tuba o Mosese me tavaki vugona, e cuva qai reguci koya. Erau veivakabulataki, rau curu sara ina valelaca.
8 E talanoataka sara vei vugona o Mosese na ka kece e cakava o Jiova vei Fero kei Ijipita ena vuku i Isireli,+ na ka dredre kece era sotava ena nodra ilakolako,+ kei na sala e vakabulai ira kina o Jiova.
9 E marautaka o Jecoro na ka vinaka kece e cakava o Jiova vei Isireli, ni vakabulai ira mai Ijipita.*
10 E kaya sara o Jecoro: “Me vakacaucautaki mada ga o Jiova, o koya e vakabulai kemuni mai Ijipita, vei Fero tale ga, e vakabulai ira na tamata mai na lewa i Ijipita.
11 Au sa qai kila qo ni uasivi ira na vo ni kalou o Jiova,+ ena ka e cakava vei ira era viavialevu vei ira na nona tamata.”
12 E qai kauta yani o Jecoro na vugoi Mosese na nona isoro kama kei na so tale na ka me cabora vua na Kalou, e qai gole yani o Eroni kei ira kece na qase ni Isireli mera kanavata kei na vugoi Mosese ena mata ni Kalou dina.
13 Ena siga e tarava, e dabe sara o Mosese me vakataulewa vei ira na tamata, me vaka na kena ivakarau, era duri tu ga na tamata ena mata i Mosese mai na mataka me yacova na yakavi.
14 Ni raica na vugoi Mosese na ka kece e cakava tiko o koya vei ira na tamata, e kaya sara: “Na cava o cakava tiko qo vei ira na tamata? Na cava o dabe duadua tiko kina i ke, mera qai mai duri tu e matamu o ira qo mai na mataka me yacova na yakavi?”
15 E tukuna o Mosese vei vugona: “Nira lako tiko ga mai vei au na tamata mera taroga na Kalou.
16 Ni basika e dua na kisi, ena kau mai vei au meu vakataulewa ena kedrau maliwa e dua na tamata kei koya tale adua, au na qai vakatakila na vakatulewa ni Kalou dina kei na nona lawa.”+
17 E qai kaya vei Mosese o vugona: “E sega ni vinaka na ka o cakava tiko.
18 O na oca dina, o iko kei ira na tamata era tiko qo kei iko, ni sa rui icolacola levu qo vei iko, o na sega tale ga ni rawa ni colata duadua.
19 Mo rogoci au mada. Au na vakasalataki iko, ena tiko kei iko na Kalou.+ O na matataki ira na tamata vua na Kalou dina,+ mo qai kauta na kisi vua na Kalou dina.+
20 Mo vakasalataki ira ena ivakaro kei na lawa,+ mo qai vakatakila vei ira na sala mera muria kei na cakacaka mera cakava.
21 Mo digia mai vei ira na tamata eso na tagane yalomatua,+ era rerevaka na Kalou, era tagane nuitaki, era cata na tubu e rawati vakailawaki,+ mo lesi ira qo mera turaga ni veiya1000, mera turaga ni veiya100, mera turaga ni veiya50, mera turaga ni veiyatini.+
22 Mera vakataulewa vei ira na tamata ni basika eso na kisi,* era na qai kauta mai vei iko na kisi dredre kece,+ ia na kisi lalai taucoko era na vakataulewa kina. Cakava me mamada vei iko ni o wasea vei ira mera colata kei iko na icolacola.+
23 Ke o cakava qori qai vakaroti iko kina na Kalou, o na vosota rawa na kena tarabi, era na lako kece ena vakacegu ina nodra vale.”
24 E rogoca sara o Mosese na vosa i vugona, qai cakava na ka kece e tukuna vua.
25 E digitaka o Mosese eso na tagane yalomatua mai vei ira kece na Isireli, qai lesi ira mera iliuliu, mera turaga ni veiya1000, mera turaga ni veiya100, mera turaga ni veiya50, eso tale mera turaga ni veiyatini.
26 Era qai vakataulewa vei ira na tamata ni basika eso na kisi. Na kisi dredre era kauta vei Mosese,+ ia na kisi lalai kece era vakataulewa kina.
27 Oti oya, sa qai lai talaci vugona o Mosese,+ e suka yani o koya i nona vanua.
iVakamacala e ra
^ Kena ibalebale “E Tiko Vulagi e Kea.”
^ Kena ibalebale “E Dauveivuke Noqu Kalou.”
^ Ipe., “mai na liga i Ijipita.”
^ Ipe., “gauna kece.”
