Lako Yani 16:1-36
16 Oti oya era biubiu mai Elimi na isoqosoqo taucoko ni Isireli, era yaco sara ina vanua talasiga o Sini,+ ena kedrau tadrua o Elimi kei Saineai, ena ika15 ni siga ni ikarua ni vula, ni oti nodra biubiu mai na vanua o Ijipita.
2 Era qai tekivu vosakudrukudrutaki Mosese kei Eroni mai na vanua talasiga na isoqosoqo taucoko ni Isireli.+
3 Era kaya tiko ga na Isireli vei rau: “Ke keimami se mate ga ena liga i Jiova ena vanua o Ijipita, ni keimami se dabe tu ena yasa ni kuro lewe ni manumanu,+ ni keimami a mamau voli ena kana madrai. Qo drau sa kauti keimami tu mai ena vanua talasiga me keimami mai mate kina na ivavakoso taucoko ena leqa ni kakana.”+
4 E qai tukuna vei Mosese o Jiova: “Qo au sa vakatauca na madrai vei kemuni mai lomalagi,+ mera dui lako yani na tamata mera kumuna na nona ivotavota ni veisiga yadua,+ meu vakatovolei ira me laurai kina se ra na muria na noqu lawa se sega.+
5 Ia ena ikaono ni siga+ nira vakarautaka na ka era kumuna, me vakaruataki na levu ni kena ivakarau era dau tomika ena vo ni siga tale eso.”+
6 Erau qai kaya o Mosese kei Eroni vei ira kece na Isireli: “Ena yakavi, oni na kila sara ga ni o Jiova ga e kauti kemuni tani mai na vanua o Ijipita.+
7 Ena mataka, oni na raica na lagilagi i Jiova, ni sa rogoca o Jiova na nomuni vosakudrukudrutaki koya. O cei o keirau moni vosakudrukudrutaki keirau kina?”
8 E tomana o Mosese: “Ni solia o Jiova na lewe ni manumanu moni kania ena yakavi, kei na madrai moni mamau kina ena mataka, oni na raica ni sa rogoca o Jiova na nomuni vosakudrukudru ni oni vosakudrukudrutaki koya tiko. Ia o cei o keirau? Oni sega ni vosakudrukudrutaki keirau tiko, o Jiova ga.”+
9 E qai kaya vei Eroni o Mosese: “Tukuna vei ira na isoqosoqo taucoko ni Isireli, ‘Ni toro mai ena mata i Jiova, ni sa rogoca o koya na nomuni vosakudrukudru.’”+
10 Ni vosa oti ga vei ira na isoqosoqo taucoko ni Isireli o Eroni, era vuki sara ra qai qara vaka ina vanua talasiga, ia raica! sa basika ena o na lagilagi i Jiova.+
11 E kaya tale vei Mosese o Jiova:
12 “Au sa rogoca na nodra vosakudrukudru na Isireli.+ Tukuna vei ira, ‘Moni kania na lewe ni manumanu ni sa karobo,* ia ena mataka moni mamau ena madrai,+ oni na kila sara ga ni o yau ga o Jiova na nomuni Kalou.’”+
13 Ena yakavi oya, era sa babasika mai na manumanuvuka* ra qai robota na keba,+ ia ni mataka mai sa ubia wavolita tu na keba taucoko na tegu.
14 Ni cawa cake na tegu, e qai vo tu mai na ka vulavula matailalai ena dela ni vanua talasiga,+ e matailalai vaka na tegu cevata ena dela ni qele.
15 Nira raica na Isireli era veikayaka sara: “Na cava qo?” nira sega ni kila se cava oya. E tukuna vei ira o Mosese: “Qo na madrai e solia mai o Jiova me kemuni kakana.+
16 Qo na ka e vakarota o Jiova, ‘Na tamata yadua me kumuna ga na ka e rawa ni kania. Moni taura e dua ga na ivakarau oma*+ me baleta ga na tamata yadua, me vaka na iwiliwili ni tamata e tiko ena nomuni dui valelaca.’”
17 Era tekivu cakava qori na Isireli, nira lai kumuna, eso era kumuna vakalevu, eso tale e vakalailai.
18 Nira vakarautaka ena oma, o koya e kumuna vakalevu e sega ni sivia tale, o koya e kumuna vakalailai e sega ni lailai tale.+ Era dui kumuna me rauta na ka ga e rawa nira kania.
19 E qai kaya vei ira o Mosese: “Me kua ni dua e vakavoca e dua na ka me yacova na mataka.”+
20 Ia era sega ni vakarorogo vei Mosese. Ni so vei ira na tagane era vakavoca me yacova na mataka, e ulouloa mai qai bona, mani katakatataki ira o Mosese.
21 Era dau tomika ena veimataka me rauta na ka ga e rawa ni kania na tamata yadua. E waicala ni katakata na siga.
22 Ena ikaono ni siga era vakaruataka na madrai era tomika,+ dua na tamata e rua na ivakarau oma na kena. Era qai lako kece mai na iliuliu ni isoqosoqo mera mai tukuna qo vei Mosese.
23 E kaya vei ira o koya: “Qo na ka e tukuna o Jiova. Vakacegu sara ga* nimataka, me siga ni vakacecegu tabu vei Jiova.+ Na ka oni via vavia ni vavia, na ka oni via saqara ni vakasaqara,+ me maroroi na kena vo, me biu tiko ga yacova na mataka.”
24 Era maroroya gona me yacova na mataka me vaka ga e vakarota o Mosese, e sega ni bona se ulouloa.
25 E qai kaya o Mosese:“Moni kania nikua, baleta nikua na siga ni vakacecegu vei Jiova. Nikua oni na sega ni raica kina ena qele.
26 Oni na tomika tiko me ono na siga, ia na ikavitu ni siga na Siga ni Vakacecegu,+ ena sega kina.”
27 Eso vei ira na tamata era lako yani mera lai tomika ena ikavitu ni siga, ia era sega ni kunea e dua na ka.
28 E mani kaya vei Mosese o Jiova: “Ena vakacava na dede ni nomuni beca noqu ivakaro kei na noqu lawa?+
29 Moni nanuma tiko ni solia vei kemuni o Jiova na Siga ni Vakacecegu.+ Oya na vuna e solia kina vei kemuni ena ikaono ni siga na madrai ni rua na siga. Na tamata yadua me tiko ga ena nona vanua, me kua ni dua e biuta na nona yasayasa ena ikavitu ni siga.”
30 Era qai vakatatabutaka na tamata na Siga ni Vakacecegu* ena ikavitu ni siga.+
31 Na mataqali o Isireli e vakayacana na madrai me “mana.”* E vulavula vaka na sore ni koriada, na kena ikanakana e vaka na keke rabaraba vakaoni.+
32 E qai kaya o Mosese: “Qo na ka e vakarota o Jiova, ‘Tawana e dua na ivakarau oma, me maroroi tu ena nomuni itabatamata kece,+ mera raica kina na madrai au solia moni kania ena vanua talasiga, ena gauna au kauti kemuni tani mai kina ena vanua o Ijipita.’”
33 E kaya sara vei Eroni o Mosese: “Kauta e dua na saqa qai tawana na mana me dua na ivakarau oma, lai biuta sara ena mata i Jiova me maroroi tu ena nomuni itabatamata kece.”+
34 E qai biuta o Eroni ena mata ni iVakadinadina+ me maroroi vinaka tu kina, me vaka ga e vakaroti Mosese kina o Jiova.
35 Era kania tiko na mana me 40 na yabaki na Isireli,+ me yacova nira tadu ena vanua sa tawani tu.+ Era kania tiko na mana, me yacova nira sa lai tu ena iyalayala ni vanua o Kenani.+
36 E dua na oma e dua na ikatini na ivakarau efa.*
iVakamacala e ra
^ Ipe., “maliwa ni rua na yakavi.”
^ E dua na mataqali manumanuvuka lailai munemuneke, rauta ni 18 na sedimita na kena balavu. E dau laukana.
^ Se “dua na siga ni vakacecegu.”
^ Se “vakacegu.”
^ Rairai dusia na kena ibalebale vakaIperiu, “Na cava qo?”
