Lako Yani 10:1-29

  • 8 Kuita: vodre (1-20)

  • 9 Kuita: butobuto (21-29)

10  E kaya vei Mosese o Jiova: “Lako vei Fero, niu sa vakalaiva me kua ni kauai na lomana+ kei na lomadra na nona dauveiqaravi, meu cakava sara ga kina e matana na noqu ivakatakilakila qo,+ 2  mo tukuna kina vei ira na luvemu tagane, kei ira na makubumu tagane na itotogi au tauca e Ijipita, kei na ivakatakilakila au vakayacora ena kedra maliwa,+ oni na qai kila dina ni o yau ga o Jiova.” 3  Erau lako yani vei Fero o Mosese kei Eroni, erau tukuna vua: “Qo na ka e kaya o Jiova na nodra Kalou na Iperiu, ‘Ena vakacava na dede ni nomu bese ni vakamalumalumu vei au?+ Laivi ira na noqu tamata mera lako mera lai qaravi au. 4  Ke o bese tiko ga ni laivi ira na noqu tamata mera lako, au na tala yani na vodre ena loma ni nomu iyalayala ni vanua nimataka. 5  Era na robota na delanivanua, ena sega ni laurai rawa na qele. Era na kanilaka na veika e sega ni vakacacana na ucaqereqere kei na ka e vo tu vei kemuni, era na qai kanilaka na kau kece era tubu tu ena vanua.+ 6  Era na sinai ena nomu vale, na nodra vale na nomu dauveiqaravi, kei na vale kece e Ijipita, na kedra levu era se sega vakadua ni bau raica na tamamu kei na tukamu mai na gauna era tiko kina ena vanua qo, me yacova mai nikua.’”+ Oti oya e vuki qai gole tani mai vei Fero. 7  Era qai kaya vei Fero na nona dauveiqaravi: “Ena vakacava na dede ni nona vakaleqai* keda tiko na tagane qo? Laivi ira na tamata mera lai qaravi Jiova na nodra Kalou. Oni se sega tiko ga ni kila ni sa vakacacani tu o Ijipita?” 8  Erau mani kau lesu mai vei Fero o Mosese kei Eroni, e qai kaya vei rau o koya: “Lako ni lai qaravi Jiova na nomuni Kalou. Ia o cei soti ena lako?” 9  E tukuna o Mosese: “Keimami na lako kei ira na neimami gone, neimami qase, na luvei keimami tagane, na luvei keimami yalewa, na neimami sipi, kei na neimami bulumakau,+ ni keimami na lai vakayacora e dua na soqo vei Jiova.”+ 10  E kaya vei rau o koya: “Keu laivi kemuni kei ira na luvemuni moni lako, sa tiko dina kei kemuni o Jiova!+ E macala ga ni oni via cakava e dua na ka ca. 11  Sega! O ira ga na nomuni tagane mera lako ra lai qaravi Jiova, ni qori na ka oni kerea.” Erau qai cemuri laivi mai na mata i Fero. 12  E qai tukuna vei Mosese o Jiova: “Dodoka yani na ligamu ina delanivanua o Ijipita ena vukudra na vodre, mera lako cake mai kina ena vanua o Ijipita, mera qai kanilaka na kau kece ena vanua, na ka kece e vakavoca tu na ucaqereqere.” 13  Sega ni bera ni sa dodoka yani na nona ititoko o Mosese ina delanivanua o Ijipita, sa qai vakaliwava mai o Jiova na tokalau ina vanua ena siga kei na bogi taucoko oya. Ni sa mataka, e kauti ira mai na vodre na toka­lau. 14  Era qai lako cake mai na vodre ena vanua taucoko o Ijipita, ra qai robota na veiyasana kece e Ijipita.+ Era veivakaleqai sara ga,+ se sega vakadua ni bau levu va qori na vodre, se me na levu tale va qori ena dua na gauna. 15  Era robota yani na delanivanua taucoko, ni butobuto sara ga kina na vanua, era kanilaka na kau kece ni vanua kei na vuata kece ena vunikau e vakavoca tu na ucaqereqere, e sega ni vo tale e dua na ka drokadroka ena vunikau se na kau ena iteitei ena vanua taucoko o Ijipita. 16  E totolo sara nona kacivi Mosese kei Eroni o Fero qai kaya: “Au sa valavala ca vei Jiova na nomuni Kalou, vei kemuni tale ga. 17  Yalovinaka sara, ni vosota mada ga na noqu ivalavala ca qo, ni vakamamasu vei Jiova na nomuni Kalou me kauta laivi vei au na kuita dau veivakamatei qo.” 18  E lako tani mai vei Fero o Mosese qai vakamasuti Jiova.+ 19  E qai veisautaka na matanicagi o Jiova, sa qai liwa mai na ra e dua na batinicagi kaukaua, e kauti ira laivi na vodre qai lai biuti ira ina Wasa Damudamu. Sa sega ni qai vo tale ena veiyasa i Ijipita e dua na vodre. 20  Ia e vakalaiva o Jiova me kaukaua na loma i Fero,+ e sega kina ni laivi ira na Isireli mera lako. 21  E qai tukuna vei Mosese o Jiova: “Dodoka yani na ligamu i lomalagi, me lutu kina na buto ena vanua o Ijipita, na kena vavaku na butobuto e rawa sara ga ni vakilai.” 22  E sega ni bera ni sa dodoka yani i lomalagi na ligana o Mosese, sa qai yaco ena vanua taucoko o Ijipita e dua na butobuto levu me tolu na siga.+ 23  Era sega ni veirai rawa, qai sega ni dua vei ira e duri mai na vanua e tu kina me tolu na siga, ia e rarama tu ga na nodra itikotiko na Isireli kece.+ 24  E qai kacivi Mosese o Fero, e kaya: “Lako, ni lai qaravi Jiova.+ Na nomuni sipi ga kei na nomuni bulumakau mera na tiko mai. Era rawa mada ga ni lako kei kemuni na luvemuni.” 25  Ia e tukuna o Mosese: “Oni na vakarautaka tale ga vei keimami* na isoro kei na isoro kama, keimami na qai vakacabora vei Jiova na neimami Kalou.+ 26  Era na lako tale ga kei keimami na neimami manumanu. Ena sega ni tu mai e dua na manumanu,* ni keimami na vakayagataka eso qori me keimami sokalou kina vei Jiova na neimami Kalou, keimami qai sega ni kila se cava keimami na cabora ena sokalou vei Jiova me yacova ni keimami sa yaco i kea.” 27  E mani vakalaiva o Jiova me kaukaua mai na loma i Fero, e sega kina ni vakadonuya mera lako.+ 28  E kaya vua o Fero: “Lako tani mai mataqu! Qarauna sara mo kua ni saga mo raica tale na mataqu, ni siga o raica kina na mataqu o na mate.” 29  E qai tukuna o Mosese: “Me vaka ga o sa tukuna, au na saga meu kua ni raica tale na matamuni.”

iVakamacala e ra

Ipe., “nona coriti keda.”
Se “na vakatara vei keimami.”
Ipe., “na ququ ni manumanu.”