Lako Yani 1:1-22
1 Qo na yacadratou na luvei Isireli, eratou lakovata i Ijipita kei Jekope, eratou tomani koya na luvena tagane kei na nodratou dui vuvale:+
2 O Rupeni, o Simioni, o Livai, kei Juta,+
3 o Isakari, o Sepuloni, kei Penijamini,
4 o Tani, o Nafitalai, o Kata, kei Aseri.+
5 O ira kece na sucu era kawa i Jekope* era le 70, ia sa tiko rawa mai Ijipita o Josefa.+
6 Oti ya sa qai mate o Josefa,+ o iratou kece na tuakana kei tacina, kei na itabatamata kece oya.
7 Era mani vakawa na Isireli,* e tubu totolo na kedra iwiliwili, era le levu tiko ga ra kaukaua sara, ra qai robota na vanua.+
8 Sa qai basika e dua na tui vou e Ijipita, e sega ni kilai Josefa.
9 E mani kaya o koya vei ira na nona tamata: “Raica! Era sa le levu na Isireli ra qai kaukaua cake vei keda.+
10 Meda cakava mada vaqaseqase vei ira e dua na ka. Ke sega, era na tubu tiko ga, ke yaco na ivalu era na tovata kei na keda meca mera valuti keda, ra qai dro tani mai na vanua.”
11 Era qai lesia eso na iliuliu era dau veivakasaurarataki,* mera vakacakacakataki ira vakaukaua,+ era qai tara na koro i Fero me maroroi kina na iyaya, qo na koro o Picomi kei Reamisesi.+
12 Na levu ga ni nodra vakasaurarataki ira, na kena tubu na kedra iwiliwili kei na nodra tete yani, era tauvimate sara ga nira domobulataki ira na Isireli.+
13 Era qai vakasaurarataki ira na Isireli na kai Ijipita mera bobula.+
14 Era mani vakadredretaka tiko ga na nodra bula nira vakarota mera caka palasita, mera buli biriki, mera qai cakava na cakacaka kece ni bobula ena were. Io, era vakalolomataki ira mera cakava na cakacaka kece ni bobula.+
15 Oti e tukuna na tui Ijipita vei rau na yalewa Iperiu dauveivakasucumi, na yacadrau o Sifira kei Pua,
16 e vakaroti rau: “Ni drau vukei ira na yalewa Iperiu mera vakasucu,+ drau raici ira ena idabedabe ni vakasucu, ke tagane drau vakamatea, ke yalewa me bula.”
17 Ia erau rerevaka na Kalou dina na dauveivakasucumi, erau sega kina ni cakava na ka e tukuna vei rau na tui Ijipita, erau vakabulai ira tiko ga na gone tagane.+
18 Oti e kacivi rau na dauveivakasucumi na tui Ijipita qai kaya: “Na cava drau vakabulai ira kina na gonetagane?”
19 Erau kaya na dauveivakasucumi vei Fero: “Era sega ni vaka na yalewa ni Ijipita o ira na yalewa ni Iperiu. Era yalewa kaukaua, ni bera ni gole yani na dauveivakasucumi, era sa vakasucu oti.”
20 E qai caka vinaka na Kalou vei rau na dauveivakasucumi, era mani le levu tiko ga na Isireli ra qai kaukaua sara.
21 Ni rau rerevaka na Kalou dina na dauveivakasucumi, e qai vakalougatataki rau me rau vakavuvale.
22 E qai vakaroti ira kece na nona tamata o Fero: “Na gonetagane kece era Iperiu era se qai sucu moni kolotaka ena Uciwai na Naile, ia na goneyalewa kece moni vakabula.”+
iVakamacala e ra
^ Ipe., “era basika mai na saga i Jekope.”
^ Ipe., “na luvei Isireli.”
^ Se “o ira na dau lesia na cakacaka.”
