Josua 4:1-24
-
Vatu me ivakananumi (1-24)
4 Ena gauna ga era takosova kina na Joritani na matanitu taucoko, e kaya sara vei Josua o Jiova:
2 “Mo kauta e 12 na tagane mai vei ira na tamata, e dua na tagane mai na dua na yavusa,+
3 mo vakaroti ratou: ‘Mo dou kauta mai e 12 na vatu ena lomadonu ni Joritani, ena vanua e tu kina vakadua na yavadra na bete,+ dou kauta vata kei kemudou ina tai kadua, dou biuta ena vanua oni na moce kina ena bogi.’”+
4 E kaciva sara o Josua e 12 na tagane e lesia vei ira na Isireli, e dua na tagane mai na dua na yavusa,
5 e kaya vei ratou o Josua: “Dou lakosivita na Kato i Jiova na nomudou Kalou me yaco yani ena lomadonu ni Joritani, dou colata yadua na vatu e tabamudou me vaka na iwiliwili ni yavusa e Isireli
6 me ivakatakilakila vei kemuni. De ra taroga na luvemuni* ena dua na gauna e muri, ‘Na cava oni biuta tu kina eke na vatu qo?’+
7 moni tukuna vei ira: ‘Ni a mudu na drodro ni wai ena Joritani ena mata ni kato+ ni veiyalayalati i Jiova. Ena gauna e takosotaki kina ena Joritani, e mudu na drodro ni wai ena Joritani. Na vatu kece qo e ivakananumi vei ira na lewe i Isireli me tawamudu.’”+
8 Era vakayacora sara qori na Isireli me vaka e vakaroti ira kina o Josua. Era kauta mai e 12 na vatu ena lomadonu ni Joritani me vaka e tukuna o Jiova vei Josua, me tautauvata kei na iwiliwili ni yavusa e Isireli. Era kauta sara ena vanua mera moce kina ena bogi ra qai biuta kina.
9 E binia tale ga o Josua e 12 na vatu ena lomadonu ni Joritani ena vanua e tu kina na yavadra na bete era colata na kato ni veiyalayalati,+ e tiko ga e kea na vatu me yacova na siga qo.
10 Era duri tiko ga ena lomadonu ni Joritani na bete era colata tiko na Kato me vakayacori oti na ka kece e vakaroti Josua kina o Jiova me tukuna vei ira na tamata mera cakava, me salavata kei na ka kece e vakaroti Josua kina o Mosese. Ena gauna kece qori, era lako vakatotolo na tamata i tai kadua.
11 Nira sa takoso kece, era qai takoso na bete nira colata tiko na Kato i Jiova e matadra na tamata.+
12 Era takoso e liu vei ira na vo ni Isireli o ira na Rupeni, o ira na Kata, kei na veimama ni yavusa na Manasa nira tuva vakamataivalu,+ me vaka e tukuna vei ira o Mosese.+
13 Era vakaiyaragi e rauta ni 40,000 na sotia nira takoso ena mata i Jiova mera vala ena buca dravuisiga e Jeriko.
14 Ena siga oya e vakacerecerei Josua kina o Jiova e matadra taucoko na Isireli,+ era dokai koya vakalevu ena gauna kece ni nona bula me vaka ga nira dau dokai Mosese vakalevu.+
15 E kaya sara vei Josua o Jiova:
16 “Mo vakaroti ira na bete era colata tiko na kato+ ni iVakadinadina mera cabe cake mai na Joritani.”
17 E vakaroti ira sara na bete o Josua: “Ni cabe mai na Joritani.”
18 Ena gauna ga era cabe mai kina ena lomadonu ni Joritani na bete era colata tiko na kato+ ni veiyalayalati i Jiova me butuka na vanua mamaca na qeteqeteniyavadra na bete, e qai suka na wai ena Joritani, e vuabale na batiniwai+ me vaka e liu.
19 Era cabe cake mai na Joritani na tamata ena ikatini ni siga ena imatai ni vula, era keba sara e Kilikali+ ena iyala kei Jeriko ena tokalau.
20 Ia na 12 na vatu era kauta mai na Joritani e binia o Josua e Kilikali.+
21 E qai kaya vei ira na Isireli: “Nira tarogi kemuni na luvemuni ena dua na gauna e muri, ‘Na cava na ibalebale ni vatu qo?’+
22 moni vakamacalataka vei ira na luvemuni: ‘Era takosova na Isireli na vanua mamaca+ ena Joritani
23 ni vakamacara o Jiova na nomuni Kalou na wai ena Joritani e matadra ra qai takoso, me vaka ga e vakayacora o Jiova na nomuni Kalou ena Wasa Damudamu ni vakamacara vei keimami me keimami takoso.+
24 E vakayacora qori mera kila kece kina na lewe ni veivanua e vuravura ni kaukaua na liga i Jiova,+ moni dokai* Jiova tiko ga na nomuni Kalou.’”
