Josua 24:1-33
-
Vakamacalataka o Josua na kedra itukutuku na Isireli (1-13)
-
Uqeta mera qaravi Jiova (14-24)
-
“O yau kei ratou na noqu vuvale, keitou na qaravi Jiova” (15)
-
-
Veiyalayalati o Josua kei ira na Isireli (25-28)
-
Mate kei na bulu nei Josua (29-31)
-
Bulu e Sikemi na sui nei Josefa (32)
-
Mate kei na bulu nei Eliesa (33)
24 E soqoni ira vata na yavusa kece ni Isireli o Josua e Sikemi, e kacivi ira na qase ni Isireli, o ira na kena iliuliu, o ira na kena turaganilewa, kei na kena turaga lalai,+ era lai duri tu ena mata ni Kalou dina.
2 E qai kaya o Josua vei ira kece na tamata: “Qo na ka e tukuna o Jiova na Kalou ni Isireli, ‘Se makawa sara+ na nodra tiko na tukamuni+ ena tai ni Uciwai,* o Tira na tamai Eparama, na tamai Neori, era dau qarava eso tale na kalou.+
3 “‘Sa dede toka au qai kauti Eparama+ na tukamuni mai na tai ni Uciwai* me lakova na vanua taucoko o Kenani, au vakalevutaka na luvena.*+ Au soli Aisake sara vua+
4 au qai soli Jekope kei Iso+ vei Aisake. Oti au solia na Ulunivanua o Sia vei Iso me nona,+ e lako sobu sara i Ijipita o Jekope kei ratou na luvena.+
5 Au mani talai Mosese kei Eroni,+ au totogitaki Ijipita ena ka au vakayacora vei ira,+ au qai kauti kemuni tani mai kina.
6 Niu kauti ira tiko mai na tukamuni mai Ijipita+ mera yaco ena wasawasa, era qai cicimuri ira na tukamuni ina Wasa Damudamu na kai Ijipita ena qiqinivalu kei ira na dau vodo ose.+
7 Era kere veivuke sara vei Jiova,+ e qai biuta o koya na butobuto ena kedra maliwa kei ira na kai Ijipita, e kauta tale ga mai na wasawasa me luvuci ira,+ oni raica sara ga e matamuni na ka au cakava e Ijipita.+ Oni qai tiko ena vanua talasiga me vica vata na yabaki.*+
8 “‘Au kauti kemuni sara ina nodra vanua na Amoraiti era tiko ena tai* ni Joritani, era qai valuti kemuni.+ Ia au soli ira ina ligamuni moni taukena na nodra vanua, au vakarusai ira e matamuni.+
9 E lako sara o Pelaki na luvei Sipori na tui Moapi me valuti Isireli. E mani kacivi Pelami na luvei Piori me vosavakacacataki kemuni.+
10 Ia au sega ni via rogoci Pelami.+ E vosa vakalougatataki kemuni tiko ga,+ au qai vakabulai kemuni mai ligana.+
11 “‘Oni takosova sara na Joritani+ moni yaco i Jeriko.+ Era qai valuti kemuni na iliuliu* e Jeriko, o ira na Amoraiti, o ira na Perisaiti, o ira na kai Kenani, o ira na Itaiti, o ira na Kakesaiti, o ira na Aivaiti, kei ira na Jepusaiti, ia au soli ira e ligamuni.+
12 Au mani tala me liu vei kemuni na yalo ni taqaya* qai cemuri ira mai matamuni+—o rau na nodra tui na Amoraiti. E sega ni rawa qori ena nomuni iseleiwau se na nomuni dakaititi.+
13 Au solia gona vei kemuni na vanua oni sega ni cakacakataka kei na koro oni sega ni tara,+ oni qai tiko kina. Oni kana mai na loganivaini kei na veiolive oni sega ni tea.’+
14 “Ia moni dokai* Jiova, moni qaravi koya ena yalododonu kei na yalodina,*+ moni kauta tani na kalou era qarava na tukamuni ena tai ni Uciwai* vaka kina e Ijipita,+ moni qaravi Jiova ga.
15 Ke ca vei kemuni moni qaravi Jiova, moni digia nikua o koya oni na qarava,+ o ira na kalou era qarava na tukamuni ena tai ni Uciwai*+ se na nodra kalou na Amoraiti oni tiko ena nodra vanua.+ Ia o yau kei ratou na noqu vuvale, keitou na qaravi Jiova ga.”
16 Era sauma na tamata: “E sega sara ga ni keimami vakasamataka me keimami biuti Jiova me keimami qarava eso tale na kalou.
17 O Jiova ga na noda Kalou e kauti keda tani kei ira na tukada mai na vanua o Ijipita,+ mai na vale ni veivakabobulataki+ qai vakayacora na cakacaka veivakurabuitaki qo e matada,+ e taqomaki keda tiko ga ena vanua kece eda lakova, vaka kina vei ira kece na lewe ni veivanua eda lakosivita mai.+
18 O Jiova e cemuri ira kece na lewe ni veivanua e matada, wili kina o ira na Amoraiti era tiko ena vanua. O keimami tale ga, keimami na qaravi Jiova ni neimami Kalou.”
19 E qai kaya vei ira na tamata o Josua: “Oni na sega ni qaravi Jiova rawa ni Kalou savasava,+ ni Kalou e vinakata me qaravi duadua ga.+ Ena sega ni vosota na nomuni cala* kei na nomuni valavala ca.+
20 Ke oni biuti Jiova moni qarava na kalou tani, ena vuki tale ga me totogitaki kemuni qai vakawabokotaki kemuni ni caka vinaka oti vei kemuni.”+
21 Ia era kaya vei Josua na tamata: “Sega, keimami na qaravi Jiova ga!”+
22 E tukuna vei ira na tamata o Josua: “O kemuni ga oni ivakadinadina ena nomuni digia vakataki kemuni moni qaravi Jiova.”+ Era kaya sara: “O keimami ga na ivakadinadina.”
23 “Ia qo moni kauta laivi na kalou tani era tiko vei kemuni, moni vagolea na lomamuni vei Jiova na Kalou ni Isireli.”
24 Era kaya vei Josua na tamata: “Keimami na qaravi Jiova ga na neimami Kalou, keimami na muria na ka e tukuna!”
25 E veiyalayalati sara kei ira na tamata o Josua ena siga oya qai solia vei ira e dua na ivakaro kei na lewa e Sikemi.
26 E vola sara o Josua na vosa qori ena ivola ni Lawa+ ni Kalou, e kauta e dua na vatu levu+ me vakaduria ena ruku ni vunikau levu volekata na vanua tabu i Jiova.
27 E kaya sara o Josua vei ira kece na tamata: “Raica! Na vatu qo ena ivakadinadina vei keda+ ni rogoca na ka kece e tukuna vei keda o Jiova, ena ivakadinadina vei kemuni moni kua ni cakitaka na nomuni Kalou.”
28 Oti e tukuna sara o Josua vei ira na tamata mera lako ina nodra dui ivotavota.+
29 Oti kece qo sa qai mate o Josua na luvei Nuni, na tamata i Jiova, ni sa yabaki 110.+
30 Era buluti koya sara ena vanua e tiko kina na nona ivotavota e Timinacasere,+ ena veiulunivanua e Ifireimi ena vualiku ni Ulu i Keasi.
31 Era qaravi Jiova tiko ga na Isireli ena gauna taucoko i Josua kei na nodra gauna taucoko na qase era bula tiko ni sa mate o Josua, era kila tale ga na ka kece e vakayacora o Jiova vei ira na Isireli.+
32 Na sui nei Josefa+ era kauta tani mai Ijipita na Isireli e bulu e Sikemi ena tikiniqele a volia o Jekope ena 100 na tiki ni ilavo+ vei ira na luvei Emori,+ na tamai Sikemi. E qai nodra ivotavota na luvei Josefa.+
33 E mate tale ga o Eliesa na luvei Eroni.+ Era buluti koya sara ena Vanua Cecere nei Finiasi na luvena+ e soli vua ena veiulunivanua e Ifireimi.
iVakamacala e ra
^ Oya na Uferetisi.
^ Oya na Uferetisi.
^ Ipe., “nona kawa.”
^ Ipe., “siga.”
^ Oya ena tokalau.
^ Se rawa ni, “itaukeiniqele.”
^ Se rawa ni, “kidroa, domobula.”
^ Ipe., “rerevaki.”
^ Se “dina.”
^ Oya na Uferetisi.
^ Oya na Uferetisi.
^ Se “talaidredre.”
