Josua 23:1-16
23 Oti e dua na gauna balavu na nona vakacegui ira na Isireli+ o Jiova ni taqomaki ira mai na kedra meca taucoko era tiko wavoliti ira, ena gauna sa qase kina o Josua, sa toso na nona yabaki,+
2 e kacivi ira kece na Isireli+ o Josua, o ira na kena qase, o ira na kena iliuliu, o ira na kena turaganilewa, kei ira na turaga lalai,+ e kaya vei ira: “Au sa qase mai, sa toso na noqu yabaki.
3 Oni sa raica na ka kece e vakayacora o Jiova na nomuni Kalou vei ira na veimatanitu kece qo ena vukumuni, ni vala sara tiko ga ena vukumuni o Jiova na nomuni Kalou.+
4 Raica, au vota vei kemuni ena vakawirimadigi+ na nodra vanua na veimatanitu sa vo me nodra ivotavota na nomuni yavusa,+ vaka kina na nodra vanua na veimatanitu kece au vakarusa+ ena Joritani me yacova na Wasa Levu* donuya na ra.*
5 O Jiova ga na nomuni Kalou e vakasavi ira tiko ga e matamuni,+ e cemuri ira tani ena vukumuni moni taukena na nodra vanua me vaka ga e yalataka vei kemuni o Jiova na nomuni Kalou.+
6 “Moni yaloqaqa sara moni muria, moni vakayacora na ka kece e volai tu ena ivola ni Lawa+ e vola o Mosese, moni kua ni gole tani kina ina imatau se ina imawi,+
7 moni kua ni veimaliwai kei ira na lewe ni veimatanitu+ qo era vo tiko vei kemuni. Moni kua sara ni cavuta na yaca ni nodra kalou+ se bubului kina, moni kua sara ni qarava se cuva vei ira.+
8 Ia moni kabiti Jiova ga na nomuni Kalou+ me vaka ga oni cakava tiko me yacova mai na siga qo.
9 O Jiova ga ena cemuri ira e matamuni+ na veimatanitu lelevu qai kaukaua, ni sega ni dua e qaqa vei kemuni me yacova mai na siga qo.+
10 E dua ga vei kemuni ena cicimuria e le dua na udolu,+ ni o Jiova na nomuni Kalou e vala tiko ena vukumuni+ me vaka e yalataka vei kemuni.+
11 O koya gona moni qaqarauni tiko ga*+ ni oni lomani Jiova na nomuni Kalou.+
12 “Ia ke oni lesu moni kabita na ka e vo tu ena veimatanitu qo era vo tiko+ vei kemuni, moni bukia vei ira na isema ni vakawati,*+ moni maliwai ira, se ra maliwai kemuni,
13 moni kila vinaka tiko ni o Jiova na nomuni Kalou ena sega ni cemuri ira tiko ga na veimatanitu ena vukumuni.+ Era na kemuni dai kei na icori, kei na kuita ni yasamuni,+ kei na votonikau e matamuni moni mate mada mai na vanua vinaka qo e solia vei kemuni o Jiova na nomuni Kalou.
14 “Raica! Au sa vakarau mate,* oni kila vinaka ena lomamuni taucoko kei na nomuni bula* taucoko ni sega ni daro na vosa ni yalayala vinaka kece e tukuna vei kemuni o Jiova na nomuni Kalou. Era yaco kece vei kemuni. E sega ni dua e daro.+
15 Ia nira yaco kece na ka vinaka e yalataka vei kemuni o Jiova na nomuni Kalou,+ ena vakayacora vaka kina vei kemuni o Jiova na ka ca kece e yalataka, ena vakawabokotaki kemuni mai na vanua vinaka qo e solia vei kemuni o Jiova na nomuni Kalou.+
16 Ke oni beca na veiyalayalati i Jiova na nomuni Kalou e vakaroti kemuni moni muria, ke oni lai qarava eso tale na kalou moni cuva vei ira, ena waqa sara ga vei kemuni na cudru i Jiova,+ oni na mate totolo ena vanua vinaka e solia vei kemuni.”+
iVakamacala e ra
^ Oya na Mediterranean.
^ Se “donuya na idromudromu ni siga.”
^ Se “qarauna vinaka na nomuni bula.”
^ Se “vakawati veicurumaki.”
^ Ipe., “Au lako tiko qo ena sala era na lako kece kina na lewe i vuravura.”
^ Ipe., “neʹphesh.” Raica na iVakamacala ni Vosa.
