Jona 1:1-17
1 E vosa o Jiova vei Jona*+ na luvei Amitai, e kaya:
2 “Tucake, mo lako i Ninive+ na koro vakaitamera, mo vunauca, niu raica na ca ni nodra ivalavala.”
3 Ia e tucake o Jona me drovaki Jiova i Tasisi, e lako sobu i Jopa, e raica e dua na waqa ni vakarau soko i Tasisi. E sauma nona ivodovodo, e vodo sara me soko vata kei ira i Tasisi ni drovaki Jiova.
4 E vakaliwava sara o Jiova e dua na cagi kaukaua e wasawasa, e draki ca vakalevu na wasawasa qai voleka ni voca na waqa.
5 Era rere vakalevu na kaiwaqa ra qai kere veivuke yadua vua na nodra kalou. Era tekivu viritaka i wai na iyaya e tu e waqa me vakamamadataka.+ Ia o Jona e lako sobu ina dreke ni waqa, e davo qai mocelutu.
6 E lako yani na kavetani ni waqa, e kaya vua: “Na cava o mocera tiko? Duri, masuta na nomu kalou! De na kauaitaki keda mai na Kalou dina meda kua ni mate.”+
7 Era qai veikayaka: “Mai meda vakawirimadigi,+ meda kila kina se o cei me beitaki ena leqa qo.” Era mani vakawirimadigi, e dusi Jona na madigi.+
8 Era tukuna vua: “Yalovinaka, tukuna vei keitou se o cei me beitaki ena leqa e yacovi keda qo? Na cava nomu cakacaka, o lako mai vei? I vei nomu vanua, o cei o ira nomu kawa?”
9 E sauma: “O yau na Iperiu, au qaravi Jiova na Kalou ni lomalagi, o koya e bulia na waitui kei na vanua mamaca.”
10 Era qai rere ga vakalevu na tamata, era tarogi koya: “Na cava o cakava?” (Era kila na tamata ni a drovaki Jiova tiko mai, ni tukuna vei ira o koya.)
11 Era mani tukuna vua: “Na cava me keimami cakava vei iko me maravu vei keimami na waitui?” Ni veitubutuburi vakalevu na biau e wasawasa.
12 E kaya vei ira o koya: “Ni laveti au moni biuti au i wai, ena maravu vei kemuni na waitui, au kila ni bale ga vei au na draki ca levu qo e donui kemuni.”
13 Ia era voce vakaukaua na tamata mera tosoya na waqa i vanua mamaca, era sega ni rawata ni veitubutuburi vakalevu na biau.
14 Era qai masuti Jiova, era kaya: “Oilei kemuni Jiova, yalovinaka me keimami kua ni mate ena vuku ni tamata qo! Me kua ni beitaki vei keimami na dra e sega ni cala, ni oni vakayacora na ka oni vinakata, kemuni Jiova!”
15 Era mani laveti Jona era biuti koya i wai, mai maravu yani na waitui.
16 Era dokai* Jiova vakalevu na tamata,+ era qai vakacaboisoro vei Jiova, era bubului vua.
17 E tala o Jiova e dua na ika levu me tilomi Jona, e mani tiko o Jona ena kete ni ika me siga tolu, bogi tolu.+