Jeremaia 6:1-30
6 Moni dro tani mai Jerusalemi, o kemuni na luvei Penijamini,Moni uvuca na davui*+ e Tikoa,+Moni waqara na buka me ivakatakilakila e Peci-akerimi!
Ni sa voleka sara na ca mai na vualiku, io na veivakarusai levu.+
2 Na goneyalewa ni Saioni e vaka na yalewa matavinaka, e tabusiga.+
3 Era na lako yani na ivakatawa kei na nodra qelenimanumanu.
Era na birika na nodra valelaca me wavokiti koya.+
Era na dui vakania na qelenisipi e lesi mera qarava.+
4 “Moni vakarau* valuti koya!
Moni tucake meda lai valuti koya ena sigalevu tutu!”
“Eda kalouca ni sa kala na siga,Ni sa balavu na yaloyalo ni yakavi!”
5 “Moni tucake, meda ravuravu ena bogiMeda vakarusa na nona valececere vakabai.”+
6 Ni qo na ka e kaya o Jiova ni lewe vuqa:*
“Moni taya na kau, moni vakaduria na bainivalu e Jerusalemi.+
Qo na koro me totogitaki,E yaco tiko e loma na veivakasaurarataki.+
7 Me vaka na batabata ni wai ena mataniwai,E vakabatabatataka vaka kina o koya na nona ivakarau ca.
Na itovo voravora kei na veivakarusai e rogoci kina,+Na mate kei na rarawa e tu ga e mataqu e veisiga.
8 Mo rogoca na ivakasala Jerusalemi, deu na gole tani niu vakasisilataki iko,+Au na vakalalai iko, mo vanualala.”+
9 Qo na ka e kaya o Jiova ni lewe vuqa:
“Era na vetia na vo ni Isireli me vaka na vuanivaini.
Mo vakalesuya tale na ligamu me vakataki koya e veti vuanivaini.”
10 “O cei meu vosa vua se vakasalataka?
O cei ena rogoca?
Raica! E tasogo* tu na daligadra mera kua ni vakatudaliga kina.+
Raica! Era beca na vosa i Jiova,+Era sega ni taleitaka.
11 Ia au sa sinai ena cudru i Jiova,Au sa oca na vosota.”+
“Mo sova vua na gone e gaunisala,+Ina ilala cauravou era soqoni vata.
Era na vesu kece, na tagane kei na watina,Na qase kei na dua e qase sara.+
12 Ena soli na nodra vale vua e dua tale,Vaka kina na nodra were kei na watidra.+
Niu na dodoka na ligaqu meu mokuti ira na lewenivanua,” e kaya o Jiova.
13 “Nira rawaka vakailawaki na tamata wale me yacovi ira na turaga,+Me tekivu vua na parofita me yacova na bete, era dau veidabui kece.+
14 Era via vakatotolotaka na mavo ni nodra mavoa* na noqu tamata, era kaya,‘Na vakacegu! Na vakacegu!’
Ni sega na vakacegu.+
15 Era bau maduataka na vakasevaki ni ka era cakava?
Era sega sara ga ni madua!
Era sega mada ga ni kila na madua!+
O koya gona, era na bale vata kei ira na bale.
Niu totogitaki ira era na tarabe,” e kaya o Jiova.
16 Qo na ka e kaya o Jiova:
“Moni duri ena basoganisala moni vakararai.
Moni taroga na gaunisala makawa,Moni taroga i vei na sala vinaka, moni muria,+Moni vakacegu kina.”
Ia era kaya: “Keimami na sega ni muria.”+
17 “Au lesia eso na ivakatawa,+ era kaya,‘Moni vakarorogo ina domo ni davui!’”+
Ia era kaya: “Keimami na sega ni vakarorogo.”+
18 “O koya gona moni rogoca, na veimatanitu!
Moni kila, na isoqosoqo,Na ka ena yacovi ira.
19 Rogoca mada, na vuravura!
Au na kauta mai na ca vei ira na tamata qo+Me isau ni ka era nakita,Nira sega ni vakatudaliga ina noqu vosaEra cata na noqu lawa.”*
20 “Na cava meu kauaitaka kina na drega boivinaka oni kauta mai SipaKei na kalamo* mai na vanua yawa?
Na nomuni isoro kama taucoko e sega ni vakadonui,Kei na nomuni isoro e sega ni vakamarautaki au.”+
21 Ia qo na ka e kaya o Jiova:
“Au na vakarautaka na ka mera tarabe kina na tamata qo,Era na tarabe kina,Na tama kei na luvedra,Na tamata kei na nona itokani,Era na mate kece.”+
22 Qo na ka e kaya o Jiova:
“Raica! E dua na mataqali e lako mai na vanua ena vualiku,Kei na dua na matanitu levu, ena vakayadrati mai na vanua yawa kei vuravura.+
23 Era na taura na dakaititi kei na moto.*
Era yaloca, era na sega ni loloma.
Ena vadugu na domodra me vaka na wasawasa,Era vodo ose.+
Era tuva vakaivalu me vaka na tamataivalu mera valuti iko, na goneyalewa ni Saioni.”
24 Keimami rogoca na kena itukutuku.
E wadamele na liga i keimami,+Keimami rarawa,Keimami yaluma* me vaka na yalewa e vakarau vakasucu.+
25 Moni kua ni lako ina were,Moni kua ni lakova na gaunisala,Ni vakaiseleiwau na meca,Era rere kece na veiyasana.
26 O iko na goneyalewa ni kainoqu,Mo vakaisulutaga,+ mo qiqi ena dravusa.
Mo tagi me vaka e dua e qolouvaka tiko na luvena tagane duabau,+Ni na vakasauri ga na nona lakovi keda mai na dauveivakarusai.+
27 “Au lesi iko* mo dau tovolea na kaukamea ena kedra maliwa na noqu tamata,Mo vaqaqara vinaka,Mo kauaitaka, mo dikeva na nodra ivalavala.
28 Era tamata lomaqa kece,+Era veilakoyaki me vakataki ira na dauvakaucaca,+Era vaka na kopa kei na kaukamea,E ca kece na nodra ivalavala.
29 Sa kama na irinibuka.
E rawa na uma mai na nodra bukawaqa.
O koya e gumatua ni vakasavasavataka tiko ga ena tawayaga,+Nira sega ni tawasei na tamata ca.+
30 Era na vakatokai mera siliva sa biu,Ni biuti ira o Jiova.”+
iVakamacala e ra
^ Ipe., “ileu.”
^ Ipe., “vakasavasavataki.”
^ Qo na mataivalu vakalomalagi.
^ Ipe., “sega ni cilivi na daligadra.”
^ Se “ramusu.”
^ Se “ivakavuvuli.”
^ Qo e dua na kau boivinaka. E sega ga ni kilai na yacana dina.
^ Se “moto mamada.”
^ Ipe., “taratara.”
^ Oya o Jeremaia.
