Jeremaia 39:1-18
39 na ikaciwa ni yabaki i Tui Setekaia e Juta, ena ikatini ni vula, e lako i Jerusalemi o Tui Nepukanesa* e Papiloni kei na nona mataivalu kece mera viribaita.+
2 Ena ika11 ni yabaki i Setekaia, ena ikava ni vula, ena ikaciwa ni siga ni vula, era botea na bai ni koro.+
3 Era curu i loma na turaga nei tui Papiloni, era dabe ena Matamata e Loma,+ oya o Nakali-sarisa na Samikari, o Nipu-sasikimi na Rapisarisi,* o Nakali-sarisa na Rapimaki,* kei ira kece na vo ni turaga nei tui Papiloni.
4 Ni raici ira ga o Tui Setekaia e Juta kei ira kece na sotia, era dro,+ era biuta na koro ena bogi nira muria na sala ina nona basenikau na tui, ena matamata ena maliwa ni bai ruarua, era muria tiko ga na gaunisala ina Arapa.+
5 Ia e cicimuri ira na nodra mataivalu na Kalitia, era toboki Setekaia ena buca dravuisiga mai Jeriko.+ Era vesuki koya ra qai kauti koya vei Tui Nepukanesa* e Papiloni mai Ripila+ ena vanua o Emaci,+ e lewai koya e kea.
6 E vakamatei ratou na luvei Setekaia o tui Papiloni e Ripila ni rai tu o koya, e vakamatei+ ira tale ga na turaga kece ni Juta.
7 E qai vakamatabokotaki Setekaia, oti e vesuki koya ena ivesu kopa me kauti koya i Papiloni.+
8 Era vakama na Kalitia na valenitui kei na nodra vale na lewenivanua,+ era basuka tale ga na bai e Jerusalemi.+
9 Ia o Nipusaretani+ na iliuliu ni yadra e kauti ira vakavesu i Papiloni na tamata era vo tiko ena koro, o ira na dro mera to vua, kei ira na kena vo.
10 E biuta tu mai ena vanua o Juta o Nipusaretani na iliuliu ni yadra eso na lewenivanua era dravudravua sara, e sega vei ira na ka. E solia tale ga vei ira ena siga oya na loganivaini kei na were mera qarava.+
11 Ia e tukuna na ivakaro qo o Tui Nepukanesa* e Papiloni vei Nipusaretani na iliuliu ni yadra me baleti Jeremaia:
12 “Mo kauti koya mo vakaraici koya vinaka, mo kua ni cakava vua e dua na ka ca, mo cakava na ka ga e tukuna vei iko.”+
13 E mani talai o Nipusaretani na iliuliu ni yadra, o Nipusasipani na Rapisarisi,* o Nakali-sarisa na Rapimaki,* kei ira kece na vakailesilesi liu nei tui Papiloni,
14 mera kauti Jeremaia mai na Raranivale ni Yadra+ mera soli koya vei Kitalaia,+ na luvei Eikami,+ na luvei Safani,+ me kauti koya ina nona vale. E mani tiko vata kei ira na lewenivanua o koya.
15 Ni vesu tiko o Jeremaia ena Raranivale ni Yadra+ e vosa vua o Jiova, e kaya:
16 “Mo lai tukuna vei Epetimeleki+ na turaga ni Iciopea, ‘Qo na ka e kaya o Jiova ni lewe vuqa,* na Kalou ni Isireli: “Au na vakayacora na noqu vosa ina koro qo me ca, ena sega ni vinaka, o na raica ni yaco ena siga oya.”’
17 “‘Ia au na vakabulai iko ena siga oya,’ e kaya o Jiova, ‘o na sega ni soli vei ira na tamata o rerevaka.’
18 “‘Niu na vakarautaka na vanua mo dro kina, o na sega ni bale ena iseleiwau. Na nomu bula ga ena nomu itokinivalu*+ ni o vakararavi vei au,’+ e kaya o Jiova.”
iVakamacala e ra
^ Ipe., “Nepukatiresa,” e dua tale na kena ivolavolai.
^ Se dua tale na kena wasewasei na vosa vakaIperiu, “Nakali-sarisa, o Samikari-nipu, o Sasikimi, o Rapisarisi.”
^ Se “iliuliu ni cakaiba (dauraikalokalo).”
^ Ipe., “Nepukatiresa,” e dua tale na kena ivolavolai.
^ Ipe., “Nepukatiresa,” e dua tale na kena ivolavolai.
^ Se “na vakailesilesi liu ni valenitui.”
^ Se “iliuliu ni cakaiba (dauraikalokalo).”
^ Qo na mataivalu vakalomalagi.
^ Se “dro bula.”
