Jeremaia 38:1-28
38 E rogoca o Sefataia na luvei Matani, o Kitalaia na luvei Pasuri, o Jukali+ na luvei Selemaia, kei Pasuri+ na luvei Malikaia na vosa e tukuna o Jeremaia vei ira kece na lewenivanua, e kaya:
2 “Qo na ka e kaya o Jiova, ‘O koya ena tiko ga ena koro qo ena mate ena iseleiwau, ena viakana, kei na matedewa.+ Ia o koya e soro* vei ira na Kalitia ena bula tiko ga, ena nona itokinivalu* ga na nona bula, ena bula.’+
3 Qo na ka e kaya o Jiova, ‘Ena soli dina na koro qo ina mataivalu nei tui Papiloni, ena vakadruka o koya.’”+
4 Era tukuna vua na tui o ira na turaga: “Yalovinaka, me vakamatei na tamata qo+ ni vakayalolailaitaki* ira na sotia era vo tiko ena koro qo kei ira na lewenivanua kece, ni tukuna vei ira na vosa qo. Ni sega ni saga na tamata qo mera tikovakacegu na lewenivanua qo, ia mera ca ga.”
5 E kaya o Tui Setekaia: “Raica! Sa tiko e ligamuni o koya, ni sega ni cakava rawa e dua na ka na tui me tarovi kemuni.”
6 Era mani kauti Jeremaia era biuti koya ena ikeliniwai nei Malikaia na luvenitui, e tiko ena Raranivale ni Yadra.+ Era tukuci Jeremaia sobu ena dali. Ia e sega na wai ena ikeli, na soso ga, e mani lobo ena soso o Jeremaia.
7 E rogoca o Epetimeleki+ na turaga ni Iciopea, e dua na vakailesilesi ni valenitui, nira sa biuti Jeremaia ena ikeliniwai. E dabe tiko na tui ena Matamata i Penijamini,+
8 e mani biubiu mai na valenitui o Epetimeleki me vosa vua na tui, e kaya:
9 “Kemuni na noqu turaga na tui, e ca na ka era cakava na tamata qo vei Jeremaia na parofita! Era biuti koya ina ikeliniwai, ena mate e kea ena viakana ni sa oti na madrai ena koro.”+
10 E tukuna sara na tui vei Epetimeleki na turaga ni Iciopea: “Mo kauta eke e 30 na tamata, moni dreti Jeremaia na parofita cake mai na ikeliniwai ni bera ni mate.”
11 E mani kauti ira na tamata o Epetimeleki mera lako ina valenitui ena ruku ni valeniyau,+ era kauta mai kea eso na tikinisulu kadresu kei na tikinisulu madra, ra qai tukuca sobu ena dali ina ikeliniwai vei Jeremaia.
12 E kaya vei Jeremaia o Epetimeleki na turaga ni Iciopea: “Yalovinaka, mo biuta na tikinisulu madra kei na tikitikinisulu ena maliwa ni kirikiriwamu kei na dali.” E cakava sara o Jeremaia,
13 era yavi Jeremaia mai na ikeliniwai ena dali ra qai dreti koya tani mai na ikeliniwai. E tiko ga o Jeremaia ena Raranivale ni Yadra.+
14 E talatala o Tui Setekaia me kau yani vua o Jeremaia na parofita ena ikatolu ni katuba ena vale i Jiova, e kaya na tui vei Jeremaia: “Dua na ka au via taroga vei iko. Mo kua ni vunia vei au e dua na ka.”
15 E kaya sara o Jeremaia vei Setekaia: “Keu tukuna vei kemuni, oni na vakamatei au sara ga. Keu vakasalataki kemuni, oni na sega ga ni rogoci au.”
16 E mani bubului lo vei Jeremaia o Tui Setekaia, e kaya: “Ni bula dina tiko o Jiova, o koya e solia vei kedaru na bula qo, au na sega ni vakamatei iko, au na sega tale ga ni soli iko vei ira na via vakamatei iko tiko.”*
17 E qai kaya vei Setekaia o Jeremaia: “Qo na ka e tukuna o Jiova, na Kalou ni mataivalu vakalomalagi, na Kalou ni Isireli, ‘Ke o na soro* vei ira na turaga nei tui Papiloni, o na bula, ena sega ni vakamai na koro qo, o na bula kei ira na lewe ni nomu vuvale.+
18 Ke o na sega ni soro* vei ira na turaga nei tui Papiloni, ena soli na koro qo vei ira na Kalitia, era na vakama ena bukawaqa,+ o na sega tale ga ni drovaka na ligadra.’”+
19 E qai kaya o Tui Setekaia vei Jeremaia: “Au rerevaki ira na Jiu era to vei ira na Kalitia, keu soli e ligadra era na vakararawataki au.”
20 Ia e kaya o Jeremaia: “Oni na sega ni soli vei ira. Yalovinaka, moni muria na vosa i Jiova au tukuna tiko vei kemuni, ena vinaka vei kemuni, oni na bula tiko ga.
21 Ke oni sega ni via soro,* qo na ka e vakaraitaka vei au o Jiova:
22 Raica! Na yalewa kece era vo tiko ena vale ni tui Juta era na kau vei ira na turaga nei tui Papiloni,+ era kaya tiko,‘O ira na tamata oni nuitaka* era bacani kemuni, ra qai rawai kemuni.+
Era vakavuna me lobo na yavamuni ena lolobo.
Qo era sa gole tani vei kemuni.’
23 Ia na watimuni kece kei ira na luvemuni era solia vei ira na Kalitia, oni na sega ni drovaka na ligadra, ena vesuki kemuni na tui Papiloni,+ ena vukumuni ga ena kama kina na koro qo.”+
24 E qai kaya vei Jeremaia o Setekaia: “Mo kua ni tukuna vua e dua na ka qo, mo kua kina ni mate.
25 Ke ra rogoca na turaga niu vosa vei iko, era mani lako yani mera kaya vei iko, ‘Yalovinaka, mo tukuna mada vei keimami na ka o kaya vua na tui. Mo kua ni vunia vei keimami e dua na ka, keimami na sega ni vakamatei iko.+ Na cava e tukuna vei iko na tui?’
26 mo tukuna vei ira, ‘Au vakamasuta tiko na tui me kua ni vakasukai au ina vale nei Jionacani deu mate kina.’”+
27 Oti era lako kece yani na turaga vei Jeremaia mera vakatarogi koya. E qai tukuna vei ira o koya na vosa kece e tukuna vua na tui. Era sega tale ni tukuna vua e dua na ka ni sega ni dua e rogoca na veivosaki qori.
28 E tiko ga o Jeremaia ena Raranivale ni Yadra+ me yacova na siga e kabai kina o Jerusalemi, e tiko ga e kea o koya ena gauna e kabai kina o Jerusalemi.+
iVakamacala e ra
^ Ipe., “lako.”
^ Se “dro bula.”
^ Ipe., “vakamalumalumutaka na ligadra.”
^ Se “via vaqarai iko tiko.”
^ Ipe., “lako.”
^ Ipe., “lako.”
^ Ipe., “lako.”
^ Ipe., “O ira na tamata oni dau veiyaloni.”
