Jeremaia 34:1-22
34 E vosa vei Jeremaia o Jiova ena gauna e valuti Jerusalemi tiko kina kei na kena koro kece+ o Tui Nepukanesa* e Papiloni, na nona mataivalu kece, na veimatanitu kece e vuravura e lewa, kei ira kece na lewe ni veivanua:
2 “Qo na ka e tukuna o Jiova na Kalou ni Isireli, ‘Mo lai tukuna vei Tui Setekaia+ e Juta, mo kaya vua: “Qo na ka e kaya o Jiova, ‘Au na solia na koro qo e liga i tui Papiloni, ena vakama ena bukawaqa.+
3 O na sega ni dro mai ligana, o na vesu sara ga mo soli vua.+ O na raica na mata i tui Papiloni ni drau veiraimata, ena vosa vei iko o koya ni drau veirai, o na lako i Papiloni.’+
4 Ia moni rogoca mada na vosa i Jiova, o kemuni Tui Setekaia e Juta, ‘Qo na ka e tukuna o Jiova me baleti kemuni: “O na sega ni mate ena iseleiwau.
5 O na mate ena vakacegu,+ era na cakava vei iko e dua na soqo ni vakamakama me vaka era cakava vei ira na nomu qase, na tui era liu vei iko, era na tagicaki iko, ‘Oilei na neimami turaga!’ niu ‘cavuta na vosa qori,’ e kaya o Jiova.”’”’”
6 E tukuna sara na vosa kece qori o Jeremaia na parofita vei Tui Setekaia e Juta mai Jerusalemi,
7 ni valuti Jerusalemi tiko na mataivalu nei tui Papiloni, kei na koro kece e vo e Juta,+ vaka kina o Lakisi+ kei Aseka,+ ni qori ga na vo ni koro vakabai e Juta.
8 Qo na vosa e tukuna o Jiova vei Jeremaia ni veiyalayalati oti o Tui Setekaia kei ira kece na tiko e Jerusalemi, me tukuna vei ira na veisereki+
9 mera dui sereka na nodra bobula, na tagane kei na yalewa, me kua ni dua na nodra itokani Jiu me qaravi ira.
10 Era mani talairawarawa kece na turaga kei ira kece na lewenivanua. Era veiyalayalati mera dui sereka na nodra tagane kei na yalewa bobula, mera kua ni bobula tale. Era talairawarawa ra qai sereki ira.
11 Ia ni oti oya, era kauta tale mai na tagane kei na yalewa bobula era sereka, era vakacakacakataki ira tale mera bobula.
12 O koya gona e vosa o Jiova vei Jeremaia, e kaya o Jiova:
13 “Qo na ka e tukuna o Jiova na Kalou ni Isireli, ‘Au veiyalayalati kei ira na tukamuni+ ena siga au kauti ira tani kina mai na vanua o Ijipita, mai na vale ni veivakabobulataki,+ au kaya:
14 “Ni cava e vitu na yabaki moni dui sereka na tacimuni Iperiu e volitaki vei kemuni, e qaravi kemuni me ono na yabaki, moni sereki koya.”+ Ia era sega ni vakarorogo na tukamuni, se ra vakatudaliga vei au.
15 Oni saumaki sara qo* moni cakava na ka dodonu e mataqu moni tukuna na veisereki vei ira na nomuni itokani, oni veiyalayalati tale ga e mataqu ena vale e vakayacani vei au.
16 Ia oni veisau tale moni vakarogocataka na yacaqu+ ni oni kauti ira lesu mai na nomuni tagane kei na yalewa bobula oni sereka me vaka era vinakata, oni vakacakacakataki ira tale mera bobula.’
17 “O koya gona qo na ka e tukuna o Jiova: ‘Oni sega ni talairawarawa vei au moni tukuna yadua na veisereki vei ira na tacimuni kei ira na nomuni itokani.+ Au na tukuna na veisereki vei kemuni,’ e kaya o Jiova, ‘ena iseleiwau, na matedewa, kei na dausiga,+ au na cakava mera domobulataki kemuni na veimatanitu kece e vuravura.+
18 Qo na ka ena yacovi ira na tamata era beca na noqu veiyalayalati nira sega ni muria na vosa ni veiyalayalati era cakava e mataqu, nira musuka rua na luvenibulumakau mera lako ena maliwa ni tikina,+
19 o ira na turaga ni Juta, o ira na turaga ni Jerusalemi, o ira na vakailesilesi lelevu, o ira na bete kei ira kece na lewenivanua era lako ena maliwa ni tiki ni luvenibulumakau:
20 Au na soli ira vei ira na kedra meca kei ira na via vakamatei ira tiko,* ena kania na yagodra mate na manumanuvuka ni lomalagi kei na manumanu e vuravura.+
21 Au na soli Tui Setekaia e Juta kei ira na nona turaga vakaitutu e ligadra na kedra meca, e ligadra na via vakamatei ira tiko,* kei na ligadra na mataivalu ni tui Papiloni+ era lako tani vei kemuni.’+
22 “‘Ia au na vakarota,’ e kaya o Jiova, ‘au na vakalesui ira mai ina koro qo, era na valuta, era na vakadruka ra qai vakama ena bukawaqa,+ au na vakalala na koro e Juta me kua ni dua e tiko kina.’”+
iVakamacala e ra
^ Ipe., “Nepukatiresa,” e dua tale na kena ivolavolai.
^ Ipe., “nikua.”
^ Se “via vaqarai ira tiko.”
^ Se “via vaqarai ira tiko.”
