Jeremaia 32:1-44
32 E vosa vei Jeremaia o Jiova ena ikatini ni yabaki i Tui Setekaia e Juta, oya ena ika18 ni yabaki i Nepukanesa.*+
2 Ena gauna oya era viribaiti Jerusalemi tiko na mataivalu nei tui Papiloni, ia e vesu tiko o Jeremaia na parofita ena Raranivale ni Yadra+ ena vale ni tui Juta.
3 Ni vesuki koya o Tui Setekaia e Juta,+ e kaya, “Na cava o parofisai kina va qo? O kaya, ‘Qo na ka e kaya o Jiova: “Au na solia na koro qo e liga i tui Papiloni, ena vakadruka o koya,+
4 ena sega ni drovaki ira na Kalitia o Tui Setekaia e Juta, ni na soli dina e liga i tui Papiloni, erau na veivosaki ni rau veirai, ena raici koya na matana.”’+
5 ‘Ena kauti Setekaia i Papiloni o koya, ena tiko e kea me yacova niu nanumi koya,’ e kaya o Jiova. ‘Oni na valuti ira tiko ga na Kalitia, ia oni na sega ni qaqa.’”+
6 E tukuna o Jeremaia: “E vosa vei au o Jiova, e kaya,
7 ‘Sa lako yani qori o Anameli na luvei Salumi na taci tamamu, ena kaya: “Mo volia na noqu tikiniqele e tiko e Anacoci+ me nomu, ni dodonu mo volia lesu ni o taravi au.”’”+
8 E mani lako mai vei au o Anameli na luvei taci tamaqu ina Raranivale ni Yadra me vaka na vosa i Jiova, e kaya vei au: “Yalovinaka, mo volia na noqu tikiniqele e tiko e Anacoci ena vanua o Penijamini, ni dodonu mo taukena mo volia lesu ni o taravi au. Mo volia me nomu.” Au kila sara ni qo na vosa i Jiova.
9 Au mani volia vei Anameli na luvei taci tamaqu na tikiniqele e tiko e Anacoci. Au vakarautaka sara vua na ilavo,+ e vitu na sikeli* kei na tini na tikinisiliva.
10 Au vola na ivolavakadinadina,+ au dregata, au kaciva eso na ivakadinadina,+ au vakarautaka tale ga na ilavo ena ivakarau ni bibi.
11 Au taura mai na ivolavakadinadina ni veivoli, na kena e dregati e tukuni ena ivakaro kei na lawa, kei na kena e sega ni dregati,
12 au solia sara na ivolavakadinadina ni veivoli vei Peruki+ na luvei Narai+ na luvei Mesea, e matai Anameli na luvei taci tamaqu, o ira na ivakadinadina era vola na yacadra ena ivolavakadinadina ni veivoli, kei na matadra kece na Jiu era tiko ena Raranivale ni Yadra.+
13 Au vakaroti Peruki sara nira rai tu, au kaya:
14 “Qo na ka e kaya o Jiova ni lewe vuqa,* na Kalou ni Isireli, ‘Mo kauta na ivola qo, na ivolavakadinadina ni veivoli qo, na kena e dregati kei na kena e sega ni dregati, mo biuta ena loma ni dua na saqa qele me maroroi vakadede kina.’
15 Ni qo na ka e kaya o Jiova ni lewe vuqa, na Kalou ni Isireli, ‘Ena voli tale na vale, na qele, kei na loganivaini ena vanua qo.’”+
16 Au masu sara vei Jiova niu solia oti na ivolavakadinadina ni veivoli vei Peruki na luvei Narai, au kaya:
17 “Oilei, kemuni na Turaga Cecere Duadua Jiova! Raica! Oni bulia na lomalagi kei na vuravura ena nomuni kaukaua levu,+ kei na ligamuni e dodo tu. E sega ni dredre vei kemuni e dua na ka,
18 oni vakaraitaka na dei ni nomuni loloma vei ira na vica vata na udolu, ia oni sauma na cala nei tamadra vei* luvedra e taravi ira,+ o kemuni ga na Kalou dina, oni cecere, oni kaukaua, na yacamuni o Jiova ni lewe vuqa.
19 E uasivi na ka oni nakita, e kaukaua na nomuni cakacaka,+ e raica na matamuni na nodra ivalavala kece na tamata,+ moni sauma yadua na nodra ivalavala kei na vua ni ka era cakava.+
20 Oni cakava na ivakatakilakila kei na cakamana ena vanua o Ijipita, e kilai me yacova mai na siga qo, me rogo kina na yacamuni e Isireli, vei ira tale ga na tamata+ me vaka ena siga qo.
21 Oni kauti ira tani na nomuni tamata na Isireli mai na vanua o Ijipita ena ivakatakilakila, ena cakamana, ena ligamuni kaukaua, ena ligamuni e dodo tu, kei na cakacaka rerevaki.+
22 “Oni qai solia vei ira na vanua qo oni a bubuluitaka moni solia vei ira na tukadra,+ na vanua e drodro kina na sucu kei na oni.+
23 Era lako mai mera taukena, ia era sega ni rogoca na domomuni se muria na nomuni lawa. Era sega ni muria na ka kece oni vakaroti ira kina, oya na vuna oni kauta mai kina na ca kece qo vei ira.+
24 Raica! Era lako mai na tamata mera viria na bainivalu mera valuta na koro,+ ena bale dina na koro e ligadra na Kalitia era valuta tiko, ena vuku ni iseleiwau,+ na dausiga, kei na matedewa,+ na ka kece oni tukuna sa yaco tiko me vaka oni raica ena gauna qo.
25 Ia oni tukuna vei au, kemuni na Turaga Cecere Duadua Jiova, ‘Mo volia na tikiniqele ena ilavo me nomu, mo kaciva eso na ivakadinadina,’ ia ena soli sara ga na koro e ligadra na Kalitia.”
26 E vosa vei Jeremaia o Jiova:
27 “O yau o Jiova na nodra Kalou na tamata kece. E dredre vei au e dua na ka?
28 Ia qo na ka e tukuna o Jiova, ‘Au na solia na koro qo vei ira na Kalitia kei na liga i Tui Nepukanesa* e Papiloni, ena vakadruka.+
29 Era na lako mai na Kalitia era valuta tiko na koro qo mera vakama ena bukawaqa me kamayavu,+ kei na dela ni veivale era cabora kina na lewenivanua na isoro vei Peali ra qai livia kina na isoro livi vei ira na kalou tani mera vakacudrui au.’+
30 “‘Era vakayacora ga na ka ca e mataqu na Isireli kei ira na Juta mai na gauna era itabagone kina,+ era vakacudrui au tiko ga na Isireli ena cakacaka ni ligadra,’ e kaya o Jiova.
31 ‘Ni vakatubura na noqu rarawa kei na noqu cudru na koro qo me tekivu mai na siga era tara kina me yacova mai na siga qo,+ me kau tani kina e mataqu,+
32 ena vuku ni nodra caka ca kece na Isireli kei na Juta mera vakacudrui au kina, o ira, na nodra tui,+ na nodra turaga,+ na nodra bete, na nodra parofita,+ o ira na lewe i Juta, kei ira na lewe i Jerusalemi.
33 Era vakanadakui au tiko ga, era sega ni vakanamata mai,+ ia au saga meu vakavulici ira wasoma,* e sega ni dua vei ira e rogoca na veivakavulici.+
34 Era biuta na nodra matakau vakasisila ena vale e vakayacani ena yacaqu mera vakadukadukalitaka.+
35 Era tara tale ga na vanua cecere vei Peali ena Buca ni Luvei Inomi*+ mera vakama kina na luvedra tagane kei na luvedra yalewa vei Moleke,+ na ka au sega ni vakaroti ira kina,+ e sega sara ga ni tubu e lomaqu* mera vakayacora na ka vakasevaki qo mera valavala ca kina na Juta.’
36 “Ia qo na ka e kaya o Jiova na Kalou ni Isireli me baleta na koro qo oni kaya tiko ena soli e liga i tui Papiloni ena iseleiwau, ena dausiga, kei na matedewa,
37 ‘Au na kumuni ira mai na vanua kece au vakasavi ira kina ena noqu cudru kei na noqu cudru levu kei na noqu cudru katakata,+ au na kauti ira lesu mai ina vanua qo mera tikovakacegu kina.+
38 Era na noqu tamata, au na nodra Kalou.+
39 Au na solia vei ira e dua na yalo+ kei na dua na sala, mera dokai au tiko ga mera vinaka kina, mera vinaka tale ga kina na luvedra e taravi ira.+
40 Au na veiyalayalati kei ira ena dua na veiyalayalati e sega ni mudu,+ au na sega ni vakanadakui ira meu vakayacora vei ira na ka vinaka,+ au na tugana i lomadra mera dokai au, mera kua ni biuti au.+
41 Au na rekitaki ira meu vakayacora vei ira na ka vinaka,+ au na tei ira mera tudei ena vanua qo+ ena lomaqu taucoko kei na noqu vinaka kece.’”*
42 “Qo na ka e kaya o Jiova, ‘Me vaka niu kauta mai vei ira na tamata qo na ca levu kece qo, au na solia tale ga vei ira na ka vinaka kece au yalataka vei ira.+
43 Ena voli tale na qele ena vanua qo,+ ia oni kaya: “Sa lala, e sega kina na tamata kei na manumanu, sa soli vei ira na Kalitia.”’
44 “‘Ena voli na qele ena ilavo, ena volai na ivolavakadinadina ni veivoli, ena dregati, ena kacivi eso na kena ivakadinadina ena vanua o Penijamini,+ ena yasayasa e Jerusalemi, ena koro e Juta,+ ena koro ena veiulunivanua, ena koro ena vanua lolovira,+ kei na koro ena ceva, niu na vakalesui ira mai na nodra bobula,’+ e kaya o Jiova.”
iVakamacala e ra
^ Ipe., “Nepukatiresa,” e dua tale na kena ivolavolai.
^ Qo na mataivalu vakalomalagi.
^ Ipe., “e lomasere i.”
^ Ipe., “Nepukatiresa,” e dua tale na kena ivolavolai.
^ Ipe., “au yadra vakamataka meu veivakavulici.”
^ Se “tubu ena noqu vakasama.”
^ Raica na iVakamacala ni Vosa, “Qiena.”
^ Ipe., “neʹphesh.” Raica na iVakamacala ni Vosa.
