Jeremaia 28:1-17
-
Vakasota o Jeremaia kei na parofita lasu o Enanaia (1-17)
28 Ena yabaki vata oya ni tekivu lewa o Tui Setekaia+ e Juta, ena ikava ni yabaki ena ikalima ni vula e vosa vei au ena vale i Jiova na parofita o Enanaia na luvei Asura mai Kipioni,+ e matadra na bete kei ira kece na tamata:
2 “Qo na ka e tukuna o Jiova ni lewe vuqa* na Kalou ni Isireli, ‘Au na musuka na ivua nei tui Papiloni.+
3 Ena loma ni rua na yabaki au na kauta lesu mai ina vanua qo na iyaya kece ni vale i Jiova e taura ena vanua qo o Tui Nepukanesa e Papiloni me kauta i Papiloni.’”+
4 “‘Au na vakalesui Jekonaia+ mai na luvei Jioiakimi+ na tui Juta ena vanua qo kei ira kece na kau vakavesu mai Juta era lako i Papiloni,’+ e kaya o Jiova, ‘niu na musuka na ivua nei tui Papiloni.’”
5 E kaya o Jeremaia na parofita vei Enanaia na parofita e matadra na bete kei ira kece na tamata era duri tu ena vale i Jiova.
6 E kaya o Jeremaia na parofita: “Emeni!* Me cakava mada ga qo o Jiova! Me vakayacora mada ga o Jiova na nomu vosa o parofisaitaka me kauta lesu mai ina vanua qo na iyaya ni vale i Jiova kei ira kece na kau vakavesu i Papiloni!
7 Yalovinaka, mo rogoca na vosa au tukuna qo e daligamu kei na daligadra kece na tamata.
8 Ena gauna makawa era dau parofisaitaka na parofita era liu vei kedaru na ivalu, na ca, kei na matedewa ena yaco ina levu na vanua kei na veimatanitu qaqa.
9 Ke parofisaitaka e dua na parofita na vakacegu qai yaco dina na vosa ni parofita qori, ena kilai ni tala dina mai na parofita qori o Jiova.”
10 E taura sara o Enanaia na parofita na ivua mai na domo i Jeremaia na parofita qai musuka.+
11 E mani kaya o Enanaia e matadra kece na tamata: “Qo na ka e tukuna o Jiova, ‘Au na musuka va qo na ivua nei Tui Nepukanesa e Papiloni mai na domodra na veivanua kece ena loma ni rua na yabaki.’”+ E lako sara yani o Jeremaia na parofita.
12 Ni musuka oti o Enanaia na parofita na ivua mai na domo i Jeremaia na parofita, e qai tukuna na itukutuku qo o Jiova vei Jeremaia:
13 “Mo lai tukuna vei Enanaia, ‘Qo na ka e kaya o Jiova: “O sa musuka na ivua kau,+ ia o na cakava na ivua kaukamea me kena isosomi.”
14 Ni qo na ka e tukuna o Jiova ni lewe vuqa, na Kalou ni Isireli: “Au na biuta na ivua kaukamea e domodra na veivanua kece qo mera qaravi Tui Nepukanesa e Papiloni, mera qaravi koya.+ Au na solia mada ga vua na manumanu kila ni vanua.”’”+
15 E kaya o Jeremaia na parofita vei Enanaia+ na parofita: “Mo rogoca mada Enanaia! E sega ni talai iko mai o Jiova, ia o uqeti ira na tamata qo mera nuitaka na ka lasu.+
16 Qo na ka e tukuna o Jiova, ‘Raica! Au na kauti iko tani mai na delaniqele. O na mate ena yabaki qo ni o uqeta na talaidredre vei Jiova.’”+
17 E mani mate o Enanaia na parofita ena yabaki oya ena ikavitu ni vula.
