Jeremaia 27:1-22
27 Ni tekivu lewa o Jioiakimi na luvei Josaia na tui Juta, e tukuna na vosa qo o Jiova vei Jeremaia:
2 “Qo na ka e tukuna vei au o Jiova, ‘Mo cakava eso na nomu ivesu kei na ivua mo biuta e domomu.
3 Mo vakauta vei tui Itomi,+ na tui Moapi,+ na nodra tui na Amoni,+ na tui Taia,+ kei na tui Saitoni+ ena ligadra na italai era lako mai Jerusalemi vei Tui Setekaia e Juta.
4 Mo tukuna vei ira na ivakaro qo mera tukuna vei ira na nodra turaga:
“‘“Qo na ka e kaya o Jiova ni lewe vuqa,* na Kalou ni Isireli, qo na ka moni tukuna vei ira na nomuni turaga,
5 ‘O yau ga au bulia na vuravura, na kawatamata, kei na manumanu era tiko ena dela i vuravura ena noqu kaukaua levu kei na ligaqu e dodo tu, au qai solia vei koya ga au vinakata.*+
6 Ia au sa solia na vanua kece qo e ligana na noqu italai o Tui Nepukanesa+ e Papiloni, au solia mada ga vua na manumanu kila ni vanua me qaravi koya.
7 Ena qaravi koya na veivanua kece, na luvena kei na makubuna me yaco mada na gauna ni nona vanua,+ nira na vakamalumalumutaki koya e levu na veivanua kei na tui rogo me nodra bobula.’+
8 “‘“‘Ia na vanua se matanitu e sega ni via qaravi Tui Nepukanesa e Papiloni, e sega ni via biuta e domona na ivua nei tui Papiloni au na totogitaka na vanua qori ena iseleiwau,+ ena dausiga, kei na matedewa,’ e kaya o Jiova, ‘meu vakaoti ira mada e ligana.’
9 “‘“‘Moni kua ni vakarorogo vei ira na nomuni parofita, o ira na nomuni daurairai, o ira na nomuni dautadra, o ira na nomuni daucakaiba, kei ira na nomuni daucakaisausau era kaya tiko vei kemuni: “Oni na sega ni qarava na tui Papiloni.”
10 Nira parofisaitaka tiko vei kemuni na ka lasu, moni kau tani vakayawa kina mai na nomuni vanua, au na vakatalai kemuni, oni na rusa.
11 “‘“‘Ia na vanua e taqara e domona na ivua nei tui Papiloni me qaravi koya, au na biuti koya tiko ga ena nona vanua,’ e kaya o Jiova, ‘me teivaka, me tiko kina.’”’”
12 Au tukuna tale ga qori vei Tui Setekaia+ e Juta, au kaya: “Moni taqara e domomuni na ivua nei tui Papiloni moni qaravi koya kei ira na nona tamata, oni na bula tiko ga kina.+
13 Na cava mo mate kina kei ira na nomu tamata ena iseleiwau,+ ena dausiga,+ kei na matedewa+ me vaka e tukuna o Jiova ina vanua ena sega ni qaravi tui Papiloni?
14 Moni kua ni rogoca na ka era tukuna tiko vei kemuni na parofita, ‘Oni na sega ni qarava na tui Papiloni,’+ ni lasu na ka era parofisaitaka tiko vei kemuni.+
15 “‘Niu sega ni talai ira yani,’ e kaya o Jiova, ‘e lasu na ka era parofisaitaka tiko ena yacaqu, oya na vuna au na vakatalai kemuni kina, oni na rusa, o kemuni kei ira na parofita era parofisai tiko vei kemuni.’”+
16 Au kaya vei ira na bete kei ira kece na tamata qo: “Qo na ka e tukuna o Jiova, ‘Moni kua ni rogoca na ka era tukuna na nomuni parofita era parofisai tiko vei kemuni: “Raica! Sa voleka sara ni kau lesu mai Papiloni na iyaya ni vale i Jiova!”+ ni lasu na ka era parofisaitaka tiko vei kemuni.+
17 Moni kua ni rogoci ira. Moni qarava na tui Papiloni oni na bula tiko ga kina.+ Na cava me rusa kina na koro qo?
18 Ia ke ra parofita, ke tiko vei ira na vosa i Jiova, mera masuti Jiova mada ni lewe vuqa me kua ni kau i Papiloni na iyaya e vo tiko ena vale i Jiova, ena vale ni tui Juta, kei Jerusalemi.’
19 “Ni qo na ka e tukuna o Jiova ni lewe vuqa me baleta na duru,+ na Wasawasa,*+ na qiqi,+ kei na vo ni iyaya e tiko ena koro qo,
20 e sega ni kauta o Tui Nepukanesa e Papiloni, ena gauna e kauti Jekonaia kina vakavesu na luvei Jioiakimi na tui Juta mai Jerusalemi i Papiloni, kei ira kece na turaga ni Juta kei Jerusalemi,+
21 io, qo na ka e kaya o Jiova ni lewe vuqa, na Kalou ni Isireli me baleta na iyaya e vo tiko ena vale i Jiova, ena vale ni tui Juta, kei Jerusalemi:
22 ‘“Ena kau i Papiloni,+ ena tu ga kina me yacova na siga au nanuma kina,” e kaya o Jiova. “Au na kauta lesu mai meu vakasuka ina vanua qo.”’”+
iVakamacala e ra
^ Qo na mataivalu vakalomalagi.
^ Ipe., “koya e donu e mataqu.”
^ Oya na Wasawasa kopa ni valenisoro.
