Jeremaia 23:1-40
23 “Era rarawa na ivakatawa era vakarusa, era tawasea na sipi ni noqu veico!” e kaya o Jiova.+
2 Ia qo na ka e tukuna o Jiova na Kalou ni Isireli vei ira na ivakatawa era vakatawa tiko na noqu tamata: “O kemuni ga oni tawasei ira na noqu sipi, oni vakatalai ira tiko ga, oni sega ni golevi ira.”+
“O koya gona, au na totogitaki kemuni ena ca ni nomuni ivalavala,” e kaya o Jiova.
3 “Au na kumuni ira na ivovo ni noqu sipi mai na veivanua kece au vakasavi ira kina,+ au na kauti ira lesu ina nodra veico,+ era na vakawa, era na le levu mai.+
4 Au na lesia na kedra ivakatawa, era na vakatawani ira sara ga.+ Era na sega tale ni rere, se ra domobula, ena sega ni yali e dua,” e kaya o Jiova.
5 “Raica! Sa roro mai na gauna,” e kaya o Jiova, “au na vakatubura vei Tevita e dua na sulina* yalododonu.+ Ena veiliutaki e dua na tui,+ ena yalomatua qai tokona na lewadodonu kei na cakadodonu ena vanua.+
6 Ena nona gauna ena vakabulai o Juta,+ ena bula vakacegu tale ga o Isireli.+ Qo na yaca ena vakatokai kina: O Jiova na Noda Yalododonu.”+
7 “Ia sa roro mai na gauna,” e kaya o Jiova, “era na sega ni tukuna tale, ‘E bula dina tiko o Jiova a kauti ira tani na Isireli mai na vanua o Ijipita!’+
8 era na tukuna ga, ‘Ni bula dina tiko o Jiova a kauti ira tani na kawa ni vuvale nei Isireli qai kauti ira lesu mai na vanua ena vualiku, kei na vanua kece au vakasavi ira kina,’ era na tiko ga ena nodra vanua.”+
9 Ena vukudra na parofita:
E rarawa na yaloqu e lomaqu.
E yavavala kece na suiqu.
Au vaka na tamata mateniMe vaka na tamata e rawai koya na waini,Ena vuku i Jiova, ena vuku tale ga ni nona vosa savasava.
10 Ni osodrigi ena vanua o ira na dau veibutakoci,+Ena vuku ni cudru, e tagi kina na vanua,+E malai na veico ni veikau.+
E ca na nodra ivalavala, era vakayagataka vakatani na nodra lewa.
11 “Era dukadukali* na parofita kei na bete.+
Au raica mada ga ena noqu vale na nodra ca,”+ e kaya o Jiova.
12 “O koya gona na nodra sala ena sisisi ena butobuto,+Era na laubili era na bale.
Niu na kauta mai vei ira na caEna yabaki mera totogitaki kina,” e kaya o Jiova.
13 “Au raica vei ira na parofita ni Samaria+ na ka vakasisila.
Na ka era parofisaitaka e uqeta o Peali,Era vakacalai ira na noqu tamata na Isireli.
14 Au raica vei ira na parofita ni Jerusalemi na ka velavela.
Era veibutakoci,+ era muria na ka lasu,+Era bukani* ira na tamata ca,Era sega ni gole tani mai na nodra ivakarau ca.
Era vakataki Sotoma kece vei au,+Kei ira na lewena era vakataki Komora.”+
15 Ia qo na ka e tukuna o Jiova ni lewe vuqa* vei ira na parofita:
“Au na vakani ira ena kaugagaAu na vagunuvi ira ena wai gaga.+
Nira vakatetea na vukitani na parofita mai Jerusalemi ena vanua taucoko.”
16 Qo na ka e tukuna o Jiova ni lewe vuqa:
“Moni kua ni rogoca na vosa era parofisaitaka vei kemuni na parofita.+
Era vakalialiai kemuni tiko.*
Era tukuna tiko ga na raivotu ni lomadra,+E sega ni tukuna na gusu i Jiova.+
17 Era kaya tiko ga vei ira na beci au,‘E tukuna o Jiova: “Oni na vakacegu.”’+
Era kaya vei ira na muria na drecala ni lomadra ca,‘Ena sega ni yacovi kemuni na ka ca.’+
18 O cei e tovata kei JiovaMe kila, me rogoca na nona vosa?
O cei e vakatudaliga ina nona vosa me rogoca?
19 Raica! Na cagi kaukaua i Jiova ena vakacaca ena cudru waqawaqa,Me vaka na covulaca ena liwava sobu na uludra na tamata ca.+
20 Ena sega ni ruru na cudru i JiovaMe vakayacora mada se cakava na nanuma ni lomana.
Ena veisiga mai muri oni na qai kila vinaka qo.
21 Au sega ni talai ira na parofita, era cici ga.
Au sega ni vosa vei ira, era parofisai ga.+
22 Ia ke ra tovata kei au,Era na tukuna vei ira na noqu tamata na noqu vosa
Era na uqeti ira mera biuta na nodra itovo ca kei na nodra ivakarau ca.”+
23 “O yau ga na Kalou au tiko voleka,” e kaya o Jiova, “au sega tale ga ni Kalou au tiko vakayawa?”
24 “Me vunitaki koya rawa e dua ena yasana vuni meu kua ni raici koya?”+ e kaya o Jiova.
“Au sega ni roboti lomalagi kei na vuravura?”+ e kaya o Jiova.
25 “Au rogoca nira parofisai lasu tiko na parofita ena yacaqu, ‘Au tadra! Au tadra!’+
26 Ena vakacava na dede ni kena tiko na ka qo e lomadra na parofita mera parofisaitaka na ka lasu? Era parofita dau lawaki ga e lomadra.+
27 Era nakita mera guilecava na noqu tamata na yacaqu ena tadra era veitukuniyaka tiko, me vaka ga nira guilecava na tukadra na yacaqu ena vuku i Peali.+
28 Na parofita e tu vua na tadra me tukuna na tadra, ia o koya e tu vua na noqu vosa me tukuna vakadodonu na noqu vosa.”
“Na cava e tautauvata kina na tolonicovuata madu kei na covuata?” e kaya o Jiova.
29 “E sega ni vaka na bukawaqa na noqu vosa,”+ e kaya o Jiova, “qai vaka na ituki e vorolaka na vatu?”+
30 “O koya gona au cudruvi ira na parofita,” e kaya o Jiova, “era dui butakoca vakataki ira na noqu vosa.”+
31 “Au cudruvi ira na parofita,” e kaya o Jiova, “era vakayagataka na yamedra mera tukuna, ‘E kaya o koya!’”+
32 “Au cati ira na parofita era tadra na ka lasu,” e kaya o Jiova, “era tukuna mera vakacalai ira na noqu tamata ena nodra lasulasu kei na nodra dokadoka.”+
“Ia au sega ni talai ira se vakaroti ira. Era na sega kina ni yaga vei ira na tamata qo,”+ e kaya o Jiova.
33 “Nira tarogi iko na tamata qo, se na parofita, se bete, ‘Na cava na icolacola* i Jiova?’ mo tukuna vei ira, ‘“O kemuni ga na icolacola! Au na biuti kemuni,”+ e kaya o Jiova.’
34 Ia na parofita, se na bete, se o ira na tamata era kaya, ‘Qo na icolacola* i Jiova!’ Au na totogitaka na tamata oya kei na nona vuvale.
35 Qo na ka oni dui tukuna tiko vua na nomuni itokani kei na tacimuni, ‘Na cava e tukuna mai o Jiova? Na cava e kaya o Jiova?’
36 Ia na icolacola* i Jiova moni kua ni tukuna tale, ni nona icolacola* na tamata yadua na nona vosa ga, oni sa veisautaka na vosa ni Kalou bula o Jiova ni lewe vuqa, na noda Kalou.
37 “Qo na ka o na tukuna vua na parofita, ‘Na cava e tukuna mai vei iko o Jiova? Na cava e kaya o Jiova?
38 Ke oni tukuna tiko ga, “Qo na icolacola* i Jiova!” qo na ka e kaya o Jiova: “Ni oni tukuna tiko, ‘Na vosa qo na icolacola* i Jiova,’ niu tukuna oti vei kemuni, ‘Moni kua ni kaya: “Na icolacola* i Jiova!”’
39 Raica! Au na tauri kemuni cake, au na kolotaki kemuni tani mai mataqu, o kemuni kei na koro au solia vei kemuni kei ira na tukamuni.
40 Au na kauta yani vei kemuni na veivakalialiai tawamudu kei na madua e sega ni oti rawa, ena sega sara ni guilecavi.”’”+
iVakamacala e ra
^ Se “kawa.”
^ Se “vukitani.”
^ Ipe., “vakaukauataka na ligadra.”
^ Qo na mataivalu vakalomalagi.
^ Se “Ra vakacegui kemuni ena inuinui matewale.”
^ Se “itukutuku bibi.” E rua tiko na ibalebale ni vosa vakaIperiu: “na itukutuku bibi ni Kalou” se “dua na icolacola bibi.”
^ Se “itukutuku bibi.”
^ Se “itukutuku bibi.”
^ Se “itukutuku bibi.”
^ Se “itukutuku bibi.”
^ Se “itukutuku bibi.”
^ Se “itukutuku bibi.”
