Jeremaia 21:1-14
21 E vosa vei Jeremaia o Jiova ena gauna e talatala kina o Tui Setekaia,+ oya ni talai Pasuri+ na luvei Malikaia kei Sefanaia+ na luvei Mesea na bete, me rau kerea:
2 “Yalovinaka, mo tarogi Jiova mada ena vukuda ni mai valuti keda o Tui Nepukanesa* e Papiloni.+ De na vakayacora vei keda o Jiova e dua na nona cakacaka vakatubuqoroqoro, ena qai lako tani vei keda o koya.”+
3 E kaya vei rau o Jeremaia: “Qo na ka mo drau tukuna vei Setekaia,
4 ‘Qo na ka e kaya o Jiova na Kalou ni Isireli: “Au na vakasuka na iyaragi ni ivalu e tiko e ligamuni moni valuti tui Papiloni+ kina kei ira na Kalitia era viribaiti kemuni tiko ena taudaku ni bai. Au na kumuni ira vata ena lomanikoro.
5 Au na valuti kemuni sara ga+ ena ligaqu e dodo tu kei na ligaqu kaukaua, ena cudru, ena cudru levu, kei na cudru katakata.+
6 Au na mokuti ira na lewenikoro qo, na tamata kei na manumanu. Era na mate ena dua na matedewa levu.”’+
7 “‘“Ni oti oya,” e kaya o Jiova, “Au na soli Tui Setekaia e Juta kei ira na nona tamata kei ira na tiko ena koro qo, era bula mai na matedewa, na iseleiwau, kei na dausiga ena liga i Tui Nepukanesa* e Papiloni, ena ligadra na kedra meca, kei ira na via vakamatei ira.*+ Ena vakamatei ira o koya ena iseleiwau. Ena sega ni lomani ira, ena sega ni yalovinaka se yalololoma vei ira.”’+
8 “Mo kaya vei ira na tamata qo, ‘Qo na ka e tukuna o Jiova: “Au sa tauca e matamuni na sala ni bula kei na sala ni mate.
9 O ira na tiko ga ena koro qo era na mate ena iseleiwau, ena dausiga, kei na matedewa. Ia o koya e lako yani me soro vei ira na Kalitia era viribaiti kemuni tiko ena bula tiko ga, ena nona itokinivalu ga na nona bula.”’*+
10 “‘“Ni duatani na mataqu ina koro qo me ca, ena sega ni vinaka,”+ e kaya o Jiova. “Ena soli ena liga i tui Papiloni,+ ena vakama o koya ena bukawaqa.”+
11 “‘Vei kemuni na lewe ni vuvale nei tui Juta: Moni rogoca na vosa i Jiova.
12 Kemuni na vuvale i Tevita, qo na ka e kaya o Jiova:
“Me dodonu na nomuni lewa ena veimataka,Moni vakabulai koya e butakoca na liga ni daulawaki,+Me kua ni waqa na noqu cudru me vaka na bukawaqa+E caudre qai sega ni dua me bokoca rawaEna ca ni nomuni ivalavala.”’+
13 ‘Au na valuti kemuni na tiko ena buca,O kemuni na vatu ni vanua tautauvata,’ e kaya o Jiova.
‘Ia o kemuni na kaya tiko: “O cei ena lako sobu mai me valuti keimami?
O cei ena curu mai ina neimami itikotiko?”
14 Au na totogitaki kemuniMe vaka na nomuni ivalavala,’+ e kaya o Jiova.
‘Au na vakama na kena veikau,Ena yameca na ka kece e wavokita.’”+
iVakamacala e ra
^ Ipe., “Nepukatiresa,” e dua tale na kena ivolavolai.
^ Se “via vaqarai ira.”
^ Ipe., “Nepukatiresa,” e dua tale na kena ivolavolai.
^ Se “dro bula.”
