Jeremaia 18:1-23

  • Na qele ena liga ni dautulituli (1-12)

  • Vakanadakui Isireli o Jiova (13-17)

  • Veretaki o Jeremaia, nona kerekere (18-23)

18  Qo na vosa e tukuna o Jiova vei Jeremaia:  “Mo tucake, mo lako sobu ina vale ni dautulituli,+ au na vosa vei iko e kea.”  Au mani lako sobu ina vale ni dautulituli, e tulituli tiko o koya ena nona itutu wiri.  Ia e qai ca na iyaya e bulia tiko e ligana. E tulia tale na dautulituli e dua na iyaya e donu vua.*  E qai vosa vei au o Jiova, e kaya:  “‘Au na sega ni cakava rawa vei kemuni na vuvale ni Isireli na ka e cakava na dautulituli qo?’ e kaya o Jiova. ‘Raica! Me vaka ga na qele ena liga ni dautulituli, oni va tale ga qori e ligaqu kemuni na vuvale ni Isireli.+  Ena gauna ga au kaya kina meu cavuraka, meu basuka, meu vakarusa e dua na vanua se dua na matanitu,+  mani vakanadakuya na vanua qori na nona ivakarau ca au tukuna vua, au na veisautaka tale ga na noqu nanuma me baleta* na ka au nakita meu vakayacora kina.+  Ia ena gauna ga au tukuna kina meu tara meu tea e dua na vanua se dua na matanitu, 10  mani caka ca e mataqu, e sega ni muria na noqu vosa, au na veisautaka na noqu nanuma me baleta* na ka vinaka au nakita meu vakayacora vua.’ 11  “Ia qo yalovinaka, mo tukuna vei ira na lewe i Juta kei ira na lewe i Jerusalemi, ‘Qo na ka e kaya o Jiova: “Au sa vakarautaka tiko e dua na ka ca, au nakita tale ga e dua na vere me yacovi kemuni. Moni biuta mada na nomuni itovo ca, moni vakavinakataka tale na nomuni itovo kei na nomuni ivalavala.”’”+ 12  Era kaya: “E tawayaga!+ Ni keimami na muria ga na neimami nanuma, keimami na dui vakayacora ga na drecala ni loma i keimami ca.”+ 13  Ia qo na ka e kaya o Jiova: “Moni taroga mada na veimatanitu. O cei e bau rogoca na ka va qo? E vakayacora na goneyalewa ni Isireli e dua na ka velavela sara.+ 14  Ena yali na ucacevata ni Lepanoni mai na baba ni uluvatu? Se na maca na waibatabata e drodro mai vakayawa? 15  Ia era sa guilecavi au na noqu tamata.+ Nira vakacaboisoro* ina ka wale,+Era vakatarabetaka na tamata ena nodra sala, na sala makawa,+Mera lako vakatikitiki ena sala sukusukura, e sega ni tautauvata,* 16  Me domobulataki kina na nodra vanua,+Me kaluvi me tawamudu.+ O ira kece na lakosivita era na kidroataka, era na kurea na uludra.+ 17  Me vaka na cagi na tokalau, au na vakasavi ira e matana na meca. Au na vakaraitaka vei ira na dakuqu, sega ni mataqu ena siga ni nodra rarawa.”+ 18  Era kaya: “Moni lako mai meda veretaki Jeremaia+ ni na sega ni yali na lawa* vei ira na bete se na ivakasala vei ira na vuku se na vosa vei ira na parofita. Moni lako mai meda vosavakacacataki koya,* meda kua ni rogoca na ka e kaya.” 19  Moni vakatudaliga vei au, kemuni Jiova,Moni rogoca na ka era tukuna na kequ meca. 20  Me saumi na vinaka ena ca? Nira kelia na qara meu biu kina.+ Moni nanuma niu tu e matamuni meu tukuna na ka vinaka me baleti ira,Moni vagolea tani vei ira na nomuni cudru. 21  O koya gona moni solia na luvedra mera viakana,Moni soli ira ena kaukaua ni iseleiwau.+ Me kau tani mada ga vei watidra na luvedra, mera yada tale ga.+ Mera vakamatei na nodra tagane ena mate rerevaki,Na nodra cauravou mera moku ena iseleiwau ena ivalu.+ 22  Me rogo na tagi mai na nodra vale,Ni oni tala vakasauri vei ira e dua na ilala daukabakoro. Nira kelia e dua na qara mera vesuki auEra biri dai me coko kina na yavaqu.+ 23  Ia o kemuni ga Jiova,Oni kila vinaka na vere era bukia meu mate kina.+ Moni kua ni ubia na nodra cala,Moni kua ni qusia na nodra ivalavala ca mai matamuni. Mera tarabe e matamuni.+ Ni oni totogitaki ira ena nomuni cudru.+

iVakamacala e ra

Ipe., “donu e matana na dautulituli me tulia.”
Se “rarawataka.”
Se “rarawataka.”
Se “vakama na isoro.”
Se “bulu.”
Se “ivakavuvuli.”
Ipe., “mokuti koya e yameda.”