Jeremaia 13:1-27
13 Qo na ka e tukuna vei au o Jiova: “Mo lako, mo volia mai e dua na nomu beleti lineni, mo vauca e tolomu, ia mo kua ni tonia ena wai.”
2 Au mani volia na beleti me vaka na vosa i Jiova, au vesuka wavoki sara e toloqu.
3 E vosa tale vei au o Jiova ena ikarua ni gauna:
4 “Mo taura na beleti o volia mai, o dara tiko, mo tucake mo lako ina Uferetisi, mo vunia e kea ena qaravatu.”
5 Au lako sara meu vunia ena Uferetisi me vaka e vakaroti au kina o Jiova.
6 Ia ni oti e vica na siga, e kaya vei au o Jiova: “Mo tucake, mo lako ina Uferetisi mo kauta mai kea na beleti au vakarota mo vunia toka e kea.”
7 Au lako sara ina Uferetisi, au kelia na beleti, au taura mai na vanua au vunia toka kina, au raica ni sa ca tu na beleti, sa sega sara ga ni yaga.
8 E qai vosa vei au o Jiova:
9 “Qo na ka e kaya o Jiova, ‘Au na vakacacana tale ga va qori na dokadoka nei Juta kei na levu ni dokadoka nei Jerusalemi.+
10 O ira na tamata ca qo era sega ni via muria na noqu vosa,+ era muria ga na nodra yalokaukaua,+ era muria tiko na kalou tani mera qarava ra qai cuva kina, era na vaka na beleti qo ni sega sara ga ni yaga.’
11 ‘Me vaka ni kabita na tolo ni tamata na beleti, au na cakava mera kabiti au va qori na vuvale taucoko ni Isireli kei na vuvale taucoko ni Juta,’ e kaya o Jiova, ‘mera noqu tamata,+ meu rogo,+ meu vakacaucautaki, meu lagilagi kina. Ia era sega ni muria.’+
12 “Mo kaya tale ga vei ira na itukutuku qo, ‘Qo na ka e tukuna o Jiova na Kalou ni Isireli: “Me vakasinaiti na saqa lelevu kece ena waini.”’ Era na kaya vei iko, ‘Keimami sega ni kila ni dau vakasinaiti ga na saqa lelevu kece ena waini?’
13 Mo kaya vei ira, ‘Qo na ka e tukuna o Jiova: “Au na vakamatenitaki ira kece na lewenivanua qo,+ o ira na tui era dabeca tiko na idabedabe vakaturaga i Tevita, o ira na bete kei ira na parofita, kei ira kece na lewe i Jerusalemi.
14 Au na botobotolaki ira vata na tama kei na luvedra,” e kaya o Jiova.+ “Au na sega ni yalololoma, se rarawa, se lomani ira, ena sega ni dua na ka me tarova noqu vakarusai ira.”’+
15 Moni rogoca, moni vakatudaliga.
Moni kua ni qaciqacia ni vosa o Jiova.
16 Moni vakalagilagi Jiova na nomuni KalouNi bera ni kauta mai na butobutoNi bera ni tarabe na yavamuni ena veiulunivanua ni sa karobo.
Oni nuitaka me rarama,Ia ena kauta mai o koya na butobuto loaloa,Ena vukica me o vavaku.+
17 Ke oni sega ni via rogoca,Au na tagi ena yasana vuni ena vuku ni nomuni dokadoka.
Au na tagi vakalevu, ena drodro na wainimataqu,+Ni sa kau vakavesu na qelenisipi nei Jiova.+
18 Mo kaya vua na tui kei na tinana,*+ ‘Mo drau dabe i ra,Ni na lutu mai ulumudrau na isala vakatui totoka.’
19 Sa sogo* na koro ena ceva, me kua ni dua e dolava.
Era sa kau vakavesu kece na lewe i Juta, era kau vakavesu taucoko.+
20 Mo tacake, mo raici ira na lako mai na vualiku.+
I vei na qelenisipi a soli vei iko, na nomu sipi matavinaka?+
21 Na cava o na kaya ni o mai totogitaki,Vei ira na nomu itokani dredre o tauyavutaka mai liu?+
O na sega ni taratara me vaka na yalewa e vakasucu?+
22 Ni o kaya e lomamu, ‘Na cava me yacovi au kina na ka qo?’+
Ena levu ni nomu cakacala ni luvati na nomu isulu+Qai vakasaurarataki na bukubukuniyavamu.
23 Ena veisautaka rawa na kai Kusi* na kuliniyagona, se na lepate na kena tavutonotono?+
Ke vaka kina, oni na qai rawa ni caka vinaka,O kemuni na vakavulici moni caka ca.
24 Au na vakasavi ira gona me vaka na vunicovuata e vukataka na cagi mai na vanua talasiga.+
25 Qo na nomu ivotavota au vakarautaka me nomu,” e kaya o Jiova,“Ni o sa guilecavi au,+ o nuitaka na ka lasu.+
26 Ia au na cereka cake na nomu isulu me ubia na matamu,Ena laurai na nomu luvawale,+
27 Na nomu veibutakoci,+ na nomu tagi ni gagano,Na vakasisila* ni nomu saqamua.
Ena veidelana, ena veivanua,Au raica na nomu ivalavala vakasisila.+
O na rarawa Jerusalemi!
Ena vakacava na dede ni nomu dukadukali tiko ga?”+
