Isikeli 9:1-11
9 E mani kacivaka ena domolevu meu rogoca: “Mo kacivi ira mai era na totogitaka na koro, mera dui taura na nodra iyaragi ni veivakarusai!”
2 Au raica ni ratou lako mai e ono na tagane mai na matamata e cake+ e qara ina vualiku, eratou taura tiko na nodratou iyaragi ni ravuravu. E maliwai ratou e dua na tagane e vakaisulu lineni, e toka e tolona e dua na ileu* ni iqi nei vunivola, eratou curu i loma eratou lai duri volekata na icabocabonisoro kopa.+
3 E qai toso na lagilagi ni Kalou ni Isireli+ e vakaruruga tiko na jerupi me lai tiko ena ilago ni katuba ni vale,+ e kaciva o koya na tagane e vakaisulu lineni e toka e tolona na ileu ni iqi nei vunivola.
4 E kaya vua o Jiova: “Mo lako ena lomanikoro, oya e loma i Jerusalemi, mo vakatakilakilataka na yadredra era rarawataka, era vutugutaka+ na ka vakasevaki kece e vakayacori tiko ena koro.”+
5 Ia e kaya vei ratou na kena vo niu vakarorogo tu: “Dou muri koya ena lomanikoro mo dou ravuravu. Me kua ni lomani ira na matamudou, dou kua sara ni nanumi ira.+
6 Dou vakamatei ira vakadua na qase, na cauravou, na goneyalewa, na gone lalai, kei ira na yalewa.+ Ia dou kua ni volekata e dua e vakatakilakilataki.+ Mo dou tekivu ena noqu tikina tabu.”+ Eratou mani tekivu vei ira na qase era tiko ena mata ni vale.+
7 E kaya tale vei ratou: “Dou vakadukadukalitaka na vale, dou vakasinaita na raranivale ena yago mate.+ Dou lako!” Eratou lako yani me ratou vakamatei ira na tiko ena koro.
8 Ni ratou veivakamatei tiko, sa qai vo ga o yau, au mani davo vakatoboicu, au tagicaka: “Oilei kemuni na Turaga Cecere Duadua Jiova! Oni na vakarusai ira kece na vo tiko e Isireli ni oni sova na nomuni cudru levu e Jerusalemi?”+
9 E mani kaya vei au: “Sa rui sivia na nodra cala na vuvale ni Isireli kei na Juta.+ E robota na vanua na vakadavedra,+ e levu tale ga na veidabui ena koro.+ Nira kaya, ‘Sa biuta na vanua o Jiova, e sega ni raica o Jiova.’+
10 Ia ena sega ni lomani ira na mataqu, au na sega ni nanumi ira.+ Au na sauma vei ira* me vaka na nodra ivalavala.”
11 Au raica sara ni mai tukutuku na tagane e vakaisulu lineni e toka e tolona na ileu ni iqi nei vunivola, e kaya: “Au sa vakayacora na ka oni vakaroti au kina.”
