Isikeli 7:1-27

  • Yaco mai na icavacava (1-27)

    • Duatani na ca (5)

    • Kolotaki na ilavo e gaunisala (19)

    • Beca na valenisoro (22)

7  E vosa tale vei au o Jiova:  “O iko na luve ni tamata, qo na ka e kaya na Turaga Cecere Duadua o Jiova ina vanua o Isireli: ‘Na icavacava! Sa yaco mai na icavacava ena iyalayala vava ni vanua.  Sa yacovi iko na icavacava, au na cudruvi iko, au na lewai iko ena nomu ivalavala, au na tarogi iko ena nomu itovo sevaki kece.  Ena sega ni lomani iko na mataqu, au na sega ni nanumi iko,+ au na sauma vei iko na nomu ivalavala, ena sauti iko ga na sevaki ni nomu itovo.+ Oni na qai kila ni o yau o Jiova.’+  “Qo na ka e tukuna na Turaga Cecere Duadua o Jiova: ‘Raica! Sa voleka mai na ca, e duatani na ca qo.+  Sa voleka mai na icavacava; ena yaco mai na icavacava; ena vakayadrati iko. Raica! Sa voleka mai.  Sa nomu gauna qo,* o iko o tiko ena vanua. Ena yaco mai na gauna, sa voleka na siga.+ O na veilecayaki, ena sega na kaila ni marau ena veiulunivanua.  “‘Au na sova vei iko na noqu cudru levu ena dua na gauna qo,+ au na cudruvi iko sara ga,+ au na lewai iko me vaka na nomu ivalavala, au na tarogi iko ena nomu itovo sevaki kece.  Ena sega ni lomani iko na mataqu, au na sega tale ga ni nanumi iko.+ Au na sauma vei iko na nomu ivalavala, ena sauti iko ga na sevaki ni nomu itovo. Oni na qai kila ni o yau o Jiova au mokuti iko tiko.+ 10  “‘Raica, na siga! Raica, sa voleka mai!+ Sa nomu gauna qo;* sa se na kau, sa tubu na viavialevu. 11  Sa tubu na ivalavala kaukaua me kau ca.+ Era na sega ni bula, ena sega tale ga ni vo na nodra iyau, na nodra ilala, se na nodra itutu. 12  Ena yaco mai na gauna, ena yaco mai na siga. Me kua ni marau na dauvolivoli, me kua ni rarawa na dauvolivolitaki, nira na cudruvi taucoko.*+ 13  Ke bula mada ga na dauvolivolitaki ena sega ni taukena tale na ka sa volitaki, ni baleti ira kece na raivotu. Ena sega ni dua e lesu, ena sega ni dua e bula ena vuku ni nona cala. 14  “‘Era uvuca na biukila,+ era vakarau kece tu, ia e sega ni dua e lako ina ivalu niu cudruvi ira kece.+ 15  E tiko e tuba na iseleiwau,+ e tiko e loma na matedewa kei na leqa ni kakana. Ena mate ena iseleiwau o koya e tiko ena were, era na mate ena leqa ni kakana kei na matedewa o ira na tiko ena lomanikoro.+ 16  Era na lako ina veiulunivanua o ira na dro bula, era na dui tagicaka na nodra cala me vaka na ruve ni buca.+ 17  Ena wadamele kece na ligadra, ena turu kece mai durudra na wai.*+ 18  Era vakaisulutaga,+ e rawai* ira na sokonu. Era na vakamaduataki kece, era na cou* kece.+ 19  “‘Era na kolotaka e gaunisala na nodra siliva, era na vakasisilataka na nodra koula. Ena sega ni vakabulai ira na nodra siliva se na nodra koula ena siga ni cudru waqawaqa i Jiova.+ Era na sega ni mamau, era na sega ni tawana na ketedra, ni* vakatarabetaki ira mera cala. 20  Era sakitaka na totoka ni nodra iukuuku; era bulia kina* na nodra ivakatakarakara vakasevaki, na nodra matakau vakasisila.+ Oya na vuna au na vukica kina mera vakasisilataka. 21  Au na solia* mera kovea na vulagi, me nodra itokinivalu tale ga na tamata ca, era na beca. 22  “‘Au na vakanadakui ira,+ era na beca na noqu yasana vuni,* era na lako kina na daubutako mera vakacacana.+ 23  “‘Mo cakava na sinucodo,*+ ni robota na vanua na lewa e tini ena vakadavedra,+ sa sivia tale ga na ivalavala kaukaua ena koro.+ 24  Au na kauti ira mai era ca sara mai na veimatanitu,+ era na taukena na nodra vale,+ au na muduka na nodra dokadoka na tamata kaukaua, ena vakacacani na nodra itikotiko tabu.+ 25  Ena gauna era yaluma kina era na via veisaututaki, ia ena sega.+ 26  Ena veitaravi na leqa, ena veitaravi na itukutuku, era na taroga na lewenivanua na raivotu vua na parofita,+ ia ena yali vua na bete na lawa* kei na ivakasala vei ira na qase.+ 27  Ena rarawa na tui,+ ena vakaisulu na turaga ena yalolailai, ena ninini na ligadra na lewenivanua nira taqaya. Au na sauma vei ira me vaka na nodra ivalavala, au na lewai ira ena lewa era tauca. Era na qai kila ni o yau o Jiova.’”+

iVakamacala e ra

Se rawa ni, “Sa tu qo na nomu senikau.”
Se rawa ni, “Sa tu qo na nomu senikau.”
Oya ni na sega ni yaga vei ira na volivoli kei ira na volivolitaki, nira na vakarusai kece.
Oya era suasua nira rere.
Ipe., “ubi.”
Ena tasi na uludra nira lolosi tiko.
Oya na nodra siliva kei na nodra koula.
Oya na nodra iyaya koula kei na siliva.
Oya na nodra siliva kei na koula e buli kina na matakau.
Rairai dusia na rumu sara e loma ni tikina tabu i Jiova.
Oya na sinucodo ni veivesu.
Se “ivakavuvuli.”