Isikeli 40:1-49
40 Ena ika25 ni yabaki ni neimami vesu tu,+ ena itekivu ni yabaki, ena ikatini ni siga ni vula, ni oti e 14 na yabaki na kena bale na koro,+ e tiko vei au na liga i Jiova ena siga oya, e kauti au sara ina koro.+
2 Ena raivotu ni Kalou e kauti au o koya ena vanua o Isireli, e vakatikori au ena dua na ulunivanua cecere,+ e tiko kina e dua na vale e vaka na koro e tiko ena ceva.
3 Ni kauti au i kea, au raica sara e dua na tamata e vaka na kopa na kena irairai.+ E taura tu e ligana e dua na wa feleki* kei na dua na gasau ivakarau,*+ e duri tu ena matamata.
4 E kaya vei au o koya: “O iko na luve ni tamata, mo raica vinaka, mo vakatudaliga, mo nanuma matua* na ka kece au vakaraitaka vei iko, ni qori na vuna o kau mai kina eke. Mo tukuna vua na vuvale ni Isireli na ka kece o raica.”+
5 Au raica ni vakabai wavoki na valenisoro.* E taura tiko e ligana na tamata oya na gasau ivakarau e ono na kiupiti na kena balavu (e kuri e dua na rabaniliga ena kiupiti yadua).* E vakarautaka sara o koya na bai, na kena vavaku e dua na gasau, kei na kena cere e dua na gasau.
6 E lako sara ina matamata e donuya na tokalau,+ e cabeta na kena ikabakaba. Ni vakarautaka o koya na ilago ni matamata, na kena raba e dua na gasau, na raba ni ilago adua e dua tale ga na gasau.
7 E dua na gasau na balavu ni valeniyadra yadua, e dua na gasau na kena raba, e lima na kiupiti na kedra veiyawaki na valeniyadra.+ E dua na gasau na ivakarau ni ilago ni matamata ena yasa ni varada ena matamata i loma.
8 E vakarautaka sara o koya na varada ni matamata i loma, e dua na gasau.
9 E qai vakarautaka na varada ni matamata, e walu na kiupiti, e vakarautaka tale ga na duru e sau, e rua na kiupiti, ia na varada ni matamata e tiko e sau qai qara i loma.
10 E tiko e tolu na valeniyadra ena yasa yadua ni matamata ena tokalau. E tautauvata ga na kedratou levu tolutolu, e tautauvata tale ga na kedratou levu na duru e tiko ena yasana adua.
11 E qai vakarautaka o koya na raba ni matamata, e 10 na kiupiti, na balavu ni matamata e 13 na kiupiti.
12 E dua na kiupiti na vanua e lati ena mata ni valeniyadra ena yasana ruarua. Na valeniyadra ena yasana ruarua e ono na kiupiti.
13 E qai vakarautaka o koya na matamata me tekivu mai na dela ni valeniyadra* qo ina dela ni valeniyadra oya, e 25 na kiupiti na kena raba, e dua na matamata e veidonui kei na dua na matamata.+
14 E vakarautaka sara o koya na duru e sau, e 60 na kiupiti na kena cere, vaka kina na duru e sau ena matamata ena lomanibai kece.
15 Mai na mata ni katuba ni matamata me yaco ina mata ni varada ena matamata i loma e 50 na kiupiti.
16 E vakatubaleka na valeniyadra, e duidui na kedra raba e loma vaka kina e tuba,+ kei na kedra duru e sau ena loma ni matamata ruarua. E vakatubaleka tale ga na yasa ruarua ni varada e loma qai ceuti ena duru e sau na ibulibuli ni vuniniuniu.+
17 E kauti au sara ina raranivale e tuba, au mani raica eso na rumunikana,*+ qai wavokita na raranivale na raravatu. E 30 na rumunikana e tiko ena raravatu.
18 E tautauvata na balavu ni raravatu kei na balavu ni matamata, qori na raravatu e ra.
19 E qai vakarautaka o koya na yawa* ni vanua mai na matamata e ra me yacova na iyala ni raranivale e loma. E 100 na kiupiti ena tokalau kei na vualiku.
20 E donuya na vualiku na matamata ni raranivale e sau, e vakarautaka na kena balavu kei na kena raba.
21 E tiko e tolu na valeniyadra ena yasa yadua ni matamata ena tokalau. Na kena duru e sau kei na kena varada e tautauvata ga na kena ivakarau kei na imatai ni matamata. E 50 na kiupiti na kena balavu, e 25 na kiupiti na kena raba.
22 Na kena katubaleka, na kena varada, kei na kena ibulibuli ni vuniniuniu+ e tautauvata kei na kena ena matamata ena tokalau. Era cabeta na lewenivanua e vitu na ikabakaba mera yacova, e veidonui kei na kena varada.
23 E tiko e dua na matamata ena raranivale e loma donuya na matamata ena vualiku kei na dua tale e donuya na matamata ena tokalau. E mani vakarautaka na veiyawaki ni matamata qori, e 100 na kiupiti.
24 E qai kauti au o koya ina ceva, au raica sara e dua na matamata ena yasayasa ena ceva.+ E vakarautaka na kena duru e sau kei na kena varada, e tautauvata ga na kedra lelevu.
25 E vakatubaleka na yasana kece kei na kena varada, me vaka ga na vo ni katubaleka. E 50 na kiupiti na kena balavu, e 25 na kiupiti na kena raba.
26 E vitu na kena ikabakaba,+ e veidonui kei na kena varada. E ceuti na ibulibuli ni vuniniuniu ena yasa ruarua ni duru e sau.
27 E donuya na ceva na matamata ni raranivale e loma, e mani vakarautaka e dua na matamata ina dua tale me gole ina ceva, e 100 na kiupiti na kena yawa.
28 E qai kauti au o koya ina raranivale e loma ni keirau muria na matamata ena ceva, ni vakarautaka na matamata ena ceva na kena levu e tautauvata ga kei na vo ni matamata.
29 Na kena valeniyadra, na kena duru e sau, kei na kena varada e tautauvata kei na kena vo. E vakatubaleka kece na yasana kei na kena varada. E 50 na kiupiti na kena balavu, e 25 na kiupiti na kena raba.+
30 E vakavarada wavoki, e 25 na kiupiti na kena balavu, e 5 na kiupiti na kena raba.
31 E donuya na raranivale e sau na kena varada, e ceuti na ibulibuli ni vuniniuniu ena kena duru e sau,+ e walu na kena ikabakaba.+
32 E kauti au ina raranivale e loma ni keirau muri mai na tokalau, e vakarautaka sara na matamata, na kena levu e tautauvata ga kei na kena vo.
33 Na kena valeniyadra, na kena duru e sau, kei na kena varada e tautauvata kei na kena vo, e vakatubaleka na yasana kece kei na kena varada. E 50 na kiupiti na kena balavu, e 25 na kiupiti na kena raba.
34 E donuya na raranivale e sau na kena varada, e ceuti na ibulibuli ni vuniniuniu ena yasa ruarua ni duru e sau, e walu na kena ikabakaba.
35 E qai kauti au ina matamata ena vualiku,+ ni vakarautaka na kena levu e tautauvata ga kei na kena vo.
36 Na kena valeniyadra, na kena duru e sau, kei na kena varada e tautauvata kei na kena vo. E vakatubaleka na yasana kece. E 50 na kiupiti na kena balavu, e 25 na kiupiti na kena raba.
37 E donuya na raranivale e tuba na kena duru e sau, e ceuti na ibulibuli ni vuniniuniu ena yasa ruarua ni duru e sau, e walu na kena ikabakaba.
38 Ia na rumunikana kei na kena katuba e volekata na duru e sau ni matamata, e dau sava kina na isoro kama taucoko.+
39 E tiko e rua na teveli ena yasa ruarua ni varada ni matamata me vakamatei kina na isoro kama taucoko,+ na isoro ni ivalavala ca,+ kei na isoro ni cakacala.+
40 E tiko e rua na teveli ena taudaku ni matamata ena sala e gole cake ina matamata ena vualiku. E rua tale na teveli e tiko ena yasa kadua ni varada ni matamata.
41 E tiko e va na teveli ena yasa ruarua ni matamata, e walu kece na teveli, era vakamatea kina na isoro.
42 E ta ena vatu na va na teveli ni isoro kama taucoko. E dua veimama na kiupiti na kena balavu, e dua veimama na kiupiti na kena raba, e dua na kiupiti na kena cere. E dau biu kina na iyaya ni vakamate isoro kama kei na isoro.
43 E viri wavoki eso na vata ena lalaga taucoko e loma, na kena raba e dua na rabaniliga, e biu ena dela ni teveli na isoro lewe ni manumanu.
44 E tiko na nodra rumunikana na daulagasere ena taudaku ni matamata e loma,+ era tiko ena raranivale e loma volekata na matamata ena vualiku donuya na ceva. E dua tale na rumunikana e tiko ena matamata ena tokalau donuya na vualiku.
45 E kaya vei au o koya: “Me nodra na bete era veiqaravi ena valenisoro na rumunikana qo e donuya na ceva.+
46 Na rumunikana e donuya na vualiku me nodra na bete era qarava na icabocabonisoro.+ Qo o ira na luvei Setoki+ era Livai, era lesi mera torovi Jiova mera qaravi koya.”+
47 E qai vakarautaka na raranivale e loma. E 100 na kiupiti na kena balavu, e 100 na kiupiti na kena raba, e tautauvata kece na balavu ni yasana. E toka ena mata ni valenisoro na icabocabonisoro.
48 E kauti au sara o koya ina varada ni valenisoro,+ e qai vakarautaka na duru e sau ni varada, e lima na kiupiti e dua na yasana, e lima tale na kiupiti na yasana adua. Na raba ni matamata e tolu na kiupiti e dua na yasana, e tolu na kiupiti na yasana adua.
49 E 20 na kiupiti na balavu ni varada, e 11* na kiupiti na kena raba. Era na yacova na lewenivanua nira cabeta na kena ikabakaba. E tu na duru lelevu volekata na duru e sau, e yadua na yasana.+
iVakamacala e ra
^ Dua na kau e tei ena gauna makawa. Na kena wa e dau caka kina na isululineni.
^ Ipe., “tugana e lomamu.”
^ Ipe., “vale.” E vakadewataki va qo ena wase 40-48 ni dusia na vale kece ena valenisoro se na valenisoro ga.
^ Ipe., “na gasau ivakarau e ono na kiupiti, e dua na kiupiti kei na dua na rabaniliga.” Qo e dusia e dua na kiupiti balavu. Raica na iKuri B14.
^ Rairai dusia na delanibai ni valeniyadra.
^ Se “au raica eso na rumu.”
^ Ipe., “raba.”
^ Se rawa ni, “12.”
