Isikeli 4:1-17

  • Vakaraitaki na viribaiti kei Jerusalemi (1-17)

    • Colati na cala me 390 na siga kei na 40 na siga (4-7)

4  “Mo taura e dua na biriki o iko na luve ni tamata, mo biuta e matamu mo ceuta kina e dua na koro, o Jerusalemi.  Mo wavokita na koro,+ mo tara kina e dua na bai,+ mo tara kina e dua na bainivalu,+ mo biria kina na kebanivalu, mo biuta wavokita na itukinibai.+  Mo taura e dua na itavutavu kaukamea, mo vakaduria me bai kaukamea ena kemudrau maliwa kei na koro. Mo vagolea kina na matamu, ena qai viribaiti, o iko ga mo viribaita. Qo na ivakatakilakila vei ira na vuvale ni Isireli.+  “Mo qai davo ena yasamu imawi, mo taqara vei iko* na nodra cala na vuvale ni Isireli.+ O na cola na nodra cala me vaka na iwiliwili ni siga o davo tiko kina vakanatutu.  Au na lokuca vei iko e 390 na siga, me tautauvata kei na veiyabaki ni nodra cakacala,+ o na cola tiko kina na nodra cala na vuvale ni Isireli.  Mo vakacavara sara qori. “Ia ena ikarua ni gauna o na davo ena yasamu imatau, o na cola tiko na nodra cala na vuvale ni Juta+ me 40 na siga. Au solia vei iko e dua na siga me dua na yabaki, io e dua na siga me dua na yabaki.  O na vagolea na matamu ina koro viribaiti o Jerusalemi+ ni o sega ni taura tu e dua na ka e ligamu, mo parofisaitaka kina na ka ca.  “Raica! Au na vesuki iko ena dali mo kua ni vuki ena yasamu adua, me oti mada na siga ni nomu viribai.  “Mo kauta na witi, na varile, na bini lelevu, na lenitili,* na mileti,* kei na so na covuata* mo biuta ena dua na dari, mo bulia kina na kemu madrai. O na kania tiko me 390 na siga, na iwiliwili ni siga o davo vakanatutu tiko kina.+ 10  O na vakarautaka mo kania e 20 na sikeli* kakana ena dua na siga. O na kania vagauna. 11  “Ena vakarautaki na memu wai, e dua na ikaono na hini.* O na gunu vagauna. 12  “O na kania me vaka na ibuli madrai varile mokimokiti, o na vavia e matadra ni o vakayagataka na benu mamaca ni tamata me kena buka.” 13  E kaya o Jiova: “Era na kania va qo na Isireli na kedra madrai e sega ni savasava* ena veimatanitu au na vakasavi ira kina.”+ 14  Au qai kaya: “Me kua kemuni na Turaga Cecere Duadua Jiova! Au sega ni dukadukali niu kania na lewe ni manumanu e kunei ni mate tu se na manumanu basuraki,+ e sega ni curu i gusuqu na lewe ni manumanu duka niu se cauravou me yacova mai qo.”+ 15  E mani kaya vei au o koya: “Sa donu, au na vakadonuya mo vakayagataka na denibulumakau me isosomi ni benu ni tamata, o na vavia kina na kemu madrai.” 16  E kaya tale vei au o koya: “O iko na luve ni tamata, au na muduka na ivakarau kakana* e Jerusalemi,+ ena vakarautaki na kedra madrai,+ era na kania ena nuiqawaqawa. Ena vakarautaki na medra wai, era na gunu ena rere.+ 17  Ena yaco qori me tini leqa kina na madrai kei na wai, era na veiraici ena kidroa qai lutu na yagodra ena vuku ni nodra cala.

iVakamacala e ra

Ipe., “kina,” oya na yasa i Isikeli ena imawi.
Dua na mataqali bini.
Dua na mataqali co e tiko na sorena lalai, e buli kina na madrai.
Na kena vosa vakaIperiu e dusia e dua na mataqali witi e dau tei e Ijipita makawa, e sega soti ni witi vinaka.
Rauta ni 230 na karamu (7.3 na onisi). Raica na iKuri B14.
Rauta ni 0.6 na lita (1.3 na paidi). Raica na iKuri B14.
E sega ni savasava ena Lawa.
Ipe., “musuka na kau ni madrai.” Rairai dusia na kau dau maroroi kina na madrai.