Isikeli 21:1-32
21 E vosa tale vei au o Jiova, e kaya:
2 “O iko na luve ni tamata, mo vakanamata i Jerusalemi mo vunauca na veivanua tabu, mo parofisaitaka na ka ca ena vanua o Isireli.
3 Mo kaya ena vanua o Isireli, ‘Qo na ka e tukuna o Jiova: “Au saqati iko, au na ucuna na noqu iseleiwau ena kena taga+ meu vakamatei ira na yalododonu kei ira na tamata ca era tiko vei iko.
4 Niu na muduka tani vei iko na yalododonu kei ira na tamata ca, ena ucuni na noqu iseleiwau mai na kena taga me vakamatei ira kece na lewenivanua ena ceva me yaco ina vualiku.
5 Era na kila na lewenivanua kece ni o yau o Jiova au ucuna na noqu iseleiwau mai na kena taga. Ena sega ni biu lesu kina.”’+
6 “O iko na luve ni tamata, mo rarawa ni o* domobula, io mo rarawa vakalevu e matadra.+
7 Ke ra tukuna vei iko, ‘Na cava o rarawataka?’ o na kaya, ‘E dua na itukutuku.’ Ena lako dina mai, ena waicala kece na lomadra ena rere, ena wadamele kece na ligadra, era na rarawa kece, ena tuturu kece mai durudra na wai.*+ ‘Raica! Ena lako dina mai, ena yaco,’ e kaya na Turaga Cecere Duadua o Jiova.”
8 E vosa tale vei au o Jiova, e kaya:
9 “O iko na luve ni tamata, mo parofisai, mo tukuna, ‘Qo na ka e kaya o Jiova: “Mo tukuna, ‘Na iseleiwau! Sa vagatari na iseleiwau,+ sa masiraki.
10 E vagatari me veivakamatei vakalevu, e masiraki me tatibi vaka na liva.’”’”
“Vakacava, meda reki?”
“‘Ena* cata na ititoko nei luvequ,+ me vaka ni beca na kau kece?
11 “‘E soli me masiraki me taura na liga. E vagatari na iseleiwau qo, e masiraki me soli vua na dauveivakamatei.+
12 “‘Mo tagi mo qolou,+ o iko na luve ni tamata, ena lauti ira na noqu tamata na iseleiwau, ena lauti ira kece na turaga ni Isireli.+ Qori o ira na mate ena iseleiwau vata kei ira na noqu tamata. Mo sabica gona na sagamu ena rarawa.
13 Ni sa yaco na veivakatovolei,+ na cava ena yaco ke cata na iseleiwau na ititoko? Ena* yali vakadua,’+ e kaya na Turaga Cecere Duadua o Jiova.
14 “Mo parofisai o iko na luve ni tamata, mo vakasausau, mo cavuta vakatolu ‘Na iseleiwau!’ Qo na kedra iseleiwau na vakamatei, na iseleiwau e veivakamatei vakalevu, e wavokiti ira.+
15 Ena waicala na lomadra ena rere,+ era na bale e levu ena nodra matamatanikoro. Au na veivakamatei ena iseleiwau. Io ena tatibi me vaka na liva, e masiraki me veivakamatei!
16 Mo taya vakavinaka ina imatau! Mo wiricaka ina imawi! Mo lako ina vanua ga e qara kina na yame ni nomu iseleiwau!
17 Au na vakasausau tale ga meu vakaotia na noqu cudru levu.+ O yau o Jiova au tukuna.”
18 E vosa tale vei au o Jiova, e kaya:
19 “O iko na luve ni tamata, mo dusia e rua na sala me lako mai kina na iseleiwau nei tui Papiloni. Erau na tekivu ruarua ena dua vata ga na vanua, me vakaduri e dua na ivakatakilakila* ena basoganisala e gole ina koro ruarua.
20 Mo dusia na sala me curu kina na iseleiwau me valuti Rapa+ na nodra na Amoni, me dua tale na sala me valuti Jerusalemi+ e viribaiti vinaka e Juta.
21 E tu vakadua na tui Papiloni ena basoganisala, oya ena vanua e basoga rua kina na sala me rairai kina. E yavalata na gasau. E taroga na nona matakau,* e vakaraica na yate.
22 Na macala ni rairai ena ligana imatau e dusi Jerusalemi, me vakarautaki na itukinibai, me kacivaki na veivakamatei, me vakarogoi na kaila ni ivalu, me vakarautaki na itukinibai ena matamata, me viri na bai, me tara na bainivalu.+
23 Ia ena vaka na rairai lasulasu e matadra* na bubului vei ira.+ E nanuma o koya na nodra cala, ena vesuki ira.+
24 “O koya gona, qo na ka e kaya na Turaga Cecere Duadua o Jiova: ‘Oni vakavuna me nanumi na nomuni cala ni oni vakavotuya na nomuni cakacala kei na nomuni ivalavala ca ena ka kece oni cakava. Ia qo ni oni nanumi, oni na kau vakaukaua.’*
25 “Sa yaco mai na nomu siga, o iko na turaga ca ni Isireli o mavoa vakaca,+ oya na gauna me tau kina na iotioti ni kemu itotogi.
26 Qo na ka e tukuna na Turaga Cecere Duadua o Jiova: ‘Mo kauta tani na ivauniulu, mo luvata na isalanitui.+ Ena sega ni tautauvata.+ Mo vakacerecerei koya e lolovira,+ mo vakalolovirataki koya e cecere.+
27 Na veivakarusai, na veivakarusai, au na veivakarusai. Ena sega ni dua tale e nona, me lako mada mai o koya e dodonu me nona,+ au na solia vua.’+
28 “O iko na luve ni tamata, mo parofisai, mo kaya, ‘Qo na ka e tukuna na Turaga Cecere Duadua o Jiova me baleti ira na Amoni kei na nodra veivakalialiai.’ Mo kaya, ‘Na iseleiwau! Sa ucuni na iseleiwau me veivakamatei, e masiraki me veivakarusai, e tatibi me vaka na liva.
29 E lasu na raivotu, e lasu na rairai ena vukumu, ia o na biu e deladra na vakamatei,* o ira na tamata ca sa yaco mai na nodra siga, oya na gauna me tau kina na iotioti ni kedra itotogi.
30 Mo vakasuka na iseleiwau ina kena taga. Au na lewai iko ena vanua o buli kina, na vanua o vu mai kina.
31 Au na sova vei iko na noqu cudru. Au na uvuca vei iko na bukawaqa ni noqu cudru waqawaqa, au na soli iko e ligadra na tamata voravora, era kenadau na veivakarusai.+
32 O na buka ni bukawaqa,+ ena dave na nomu dra ena vanua, o na sega ni nanumi tale, ni o yau o Jiova au tukuna.’”
iVakamacala e ra
^ Ipe., “rarawa na tolomu.”
^ Oya era suasua nira rere.
^ Oya na iseleiwau nei Jiova.
^ Se “Na ititoko ena.”
^ Ipe., “liga.”
^ Ipe., “terafimi.”
^ Oya o ira na lewe i Jerusalemi.
^ Ipe., “tauri ena liga.”
^ Ipe., “na domodra na moku.”
