Vei Ira na Iperiu 12:1-29
12 O koya gona, nira vakavolivoliti keda e levu sara na ivakadinadina era vaka na o, meda biuta laivi kece na ka e vakabibitaki keda kei na ivalavala ca eda dau tacori rawarawa kina,+ meda qai ciciva tiko ga ena vosota na cere e tu e matada,+
2 nida vakaraici koya matua na noda iLiuliu Levu, o koya e Vakataucokotaka noda vakabauta, o Jisu.+ Ena vuku ni marau e tu e matana, e vosota kina na kaunirarawa* qai sega ni dua na ka vua me vakamaduataki, e sa dabe tale ga ena ligaimatau ni itikotiko vakaturaga ni Kalou.+
3 O koya gona, moni vakasamataki koya vinaka a vosota na nodra vosa ni veivakalialiai na ivalavala ca+ ena nodra vakaleqai ira tiko ga vakataki ira, moni kua kina ni oca se soro.+
4 Ena nomuni vala kei na ivalavala ca ya, oni se sega ni vala me yacova ni dave na nomuni dra.
5 Oni sa guilecava vakadua na nona okati kemuni na Kalou moni luvena ni vakamasuti kemuni: “Luvequ, kua ni beca na veivakadodonutaki i Jiova,* kua tale ga ni soro ni vakavulici iko,
6 ni o koya e lomana o Jiova* e vakavulica, e kuitataki koya e okata me luvena.”+
7 Na ka oni vosota tiko e kena inaki moni vakadodonutaki* kina. E okati kemuni na Kalou moni luvena.+ Na gone cava ena sega ni vakadodonutaka o tamana?+
8 Ke oni sega ni vakaivotavota ena veivakadodonutaki qo, oni sa luvenisala, oni sega ni luvena dina.
9 Kena ikuri, era dau vakadodonutaki keda na tamada vakayago, eda dau dokai ira kina. Vakacava, e sega ni dodonu meda vakamalumalumu sara vakalevu vei koya na Tamada vakayalo meda bula kina?+
10 Nira dau vakadodonutaki keda na Tamada vakayago ena dua na gauna lekaleka me vaka na ka era nanuma ni vinaka, ia na veivakadodonutaki e cakava na Kalou ena yaga vei keda nida na vakaivotavota kina ena nona savasava.+
11 E sega ni dau marautaki na veivakadodonutaki ena gauna e tau kina, e dau kauta mai na rarawa, ia e muri, vei ira na vakavulici kina, ena kauta mai vei ira na vakacegu, ena dodonu na nodra ivalavala.
12 O koya gona, moni vakaukauataka na liga e wadamele, kei na duru e malumalumu,+
13 vakadodonutaka tiko ga na sala e muria na yavamuni,+ me kua kina ni veisivi na isema ena tikina e sa malumalumu tu, me vakavinakataki ga.
14 Saga moni veiyaloni kei ira na tamata kece,+ moni yalosavasava tale ga.+ Ke oni sega ni yalosavasava, oni na sega ni raica na Turaga.
15 Moni raica matua me kua ni dua e bureitaki vua na loloma soli wale ni Kalou, me kua kina ni rovu mai vakasauri e dua na waka gaga e veivakaleqai, de ra vakadukadukalitaki kina e levu,+
16 me kua tale ga ni dua vei kemuni e dau veiyacovi tawadodonu,* se beca na veika tabu me vakataki Iso ni a solia na nona dodonu vakaulumatua me isosomi ni dua na veleti kakana.+
17 Oni kila ni a qai vinakata e muri me taukena na veivakalougatataki, e sega ga ni vakadonui. E dina ni tagici tamana me veisautaka na lomana,+ ia e dreve na nona sasaga.
18 Oni sega ni torova na ulunivanua e tarai rawa,+ e caudre,+ e solega na o loaloa, na butobuto kei na draki ca levu,+
19 na tagi ni biukila+ kei na rorogo ni domo e vosa mai.+ Nira rogoca na tamata na domo ya, era vakamamasu me kua ni dua tale na ka e tukuni vei ira.+
20 Era rere sara ga ena vuku ni ivakaro: “Ke yacova na ulunivanua e dua na manumanu yavaiva, me vakaviriki ena vatu.”+
21 E vakarisekete tale ga na ka e vakaraitaki, mani kaya kina o Mosese: “Au rere, au sautaninini sara ga.”+
22 Ia oni torova na Ulunivanua o Saioni+ kei na koro ni Kalou bula, o Jerusalemi vakalomalagi,+ kei ira na agilosi e sega ni wiliki rawa na kedra levu
23 era soqoni vakailawalawa,+ kei na ivavakoso ni ulumatua era sa volai mai lomalagi, kei na Kalou e noda Turaganilewa kece,+ kei na nodra bula vakayalo+ na yalododonu era sa vakataucokotaki,+
24 kei Jisu na dauveisorovaki+ ni veiyalayalati vou,+ kei na dra e kureitaki, ni vinaka cake na kena vosa tiko na dra qori ni vakatauvatani kei na dra i Epeli.+
25 Raica moni kua ni bese na vakarorogo vei koya e vosa tiko. Ke ra sega ni dro rawa o ira na talaidredre vei koya e tukuna na ivakasala vakalou e vuravura, eda na sega tale ga ni dro rawa ke da vakanadakui koya e vosa tiko mai lomalagi.+
26 Ena gauna ya e yavalata sara ga na vuravura na domona,+ ia qo e sa yalataka ena nona kaya: “Ia vakadua tale, au na sega wale ga ni yavalata na vuravura, au na yavalata tale ga na lomalagi.”+
27 Na ivosavosa “ia vakadua tale” e vakaibalebaletaka na kena kau laivi na veika e yavalati, oya na veika e sega ni bulia na Kalou, mera na dei tiko ga na veika era sega ni yavalati.
28 O koya gona, me vaka nida na lewe ni matanitu e sega ni yavalati rawa, me tiko ga kei keda na loloma soli wale, me vakadonui kina noda veiqaravi tabu vua na Kalou ena veidokai kei na qoroqoro.
29 Ni bukawaqa e dauveivakarusai na noda Kalou.+
